黃師奶廚藝小百科

<<蝦醬蒸豬軟骨>>
尋日落咗成日雨~今日本來都天色唔錯~但係夜晚又無啦啦黃雨~好在已經喺屋企~唔係真係好呢HEA呢~!

屋企附近開咗唔少凍肉鋪~今日買咗豬軟骨~!加少少蝦醬一齊蒸~味道都唔錯呢~!

材料: 豬軟骨500g , 生粉一茶匙及麻油適量,
豬軟骨醃料: 生抽一湯匙, 老抽少許, 糖一茶匙, 胡椒粉少許
調味: 蝦醬約一湯匙

STEP 1
豬軟骨洗淨後與醃料醃約二十分鐘再拌入調味醃一會 ; 煮前再將醃好嘅豬軟骨與少許麻油及生粉拌勻~~

STEP 2
煲滾水後將所有材料及調味放於碟上再大火隔水蒸約12-15分鐘即成

<<雙蔬炒肥牛>>
話咁快又一個星期~終於可以HEA下~不過天氣開始熱~仲要戴住個口罩…有時都係冇心機出街….寧願喺家透氣都爽D~大啖D~!

今日煮牛肉~我哋鍾意買手切肥牛黎炒~又滑又香~不過就咁炒一碟~一啲都唔經濟~~想打斧頭真係要唸一唸~!

材料: 肥牛肉約1磅, 蘆筍隨意, 直菇1包 (搣成小片)
醃料: 油及糖少許, 生粉1茶匙, 生抽約2湯匙, 胡椒粉少許
調味: 蒜茸約1湯匙及黑胡椒少許

STEP 1
肥牛跟醃料拌勻備用; 蘆筍略略刨去外層切小件

STEP 2
燒紅鑊後爆香直菇再將肥牛炒至轉色

STEP 3
拌入蘆筍兜炒至8成熟後下調味再煮至熟透即成

<<混醬牛腩>>
呢2日天氣不太好~好在剛接送返學時冇落雨~唔係的話真係好呢HEA~不過落一落雨感覺又涼返啲~唔駛咁濕焗呢~!

買咗款醬叫牛羊鴨醬~佢話有南乳, 腐乳同柱侯醬溝埋~味道都唔差~可以一試~!

材料: 牛坑腩約400G , 蘿蔔半個 , 上湯 2升, 冰糖一粒, 洋蔥2個, 蒜頭約10粒
調味: 牛羊鴨醬2湯匙

STEP 1
將蘿蔔去皮切角; 煲滾水後下少許薑及蔥段, 將牛坑腩汆水

STEP 2
爆香洋蔥蒜頭及調味, 拌入牛坑腩煎香

STEP 3
注入上湯後加冰糖煮瀼, 細火炆煮約30分鐘後熄火焗30分鐘;

STEP 4
拌入蘿蔔後再重複炆焗30分鐘; 最後再炆焗15分鐘~!

<<麻辣醬蒸排骨>>
呢2日天氣熱咗唔少~尋日仲同月月去咗廸廸尼~多人到呢….同初爆肺炎時差好遠~相信唔少人同已經麻木咗…

家中有人愛試新醬料~買咗樽混醬麻辣味返黎~~樽醬教人煮排骨~我覺得煮雞會夾D~~下次再試下先~!

材料: 腩排300g , 生粉一茶匙及麻油適量,
腩排醃料: 生抽一湯匙, 老抽少許, 糖一茶匙, 胡椒粉少許
調味: 混醬麻辣味約一湯匙

STEP 1
腩排洗淨後與醃料醃約二十分鐘再拌入調味醃一會 ; 煮前再將醃好嘅腩排與少許麻油及生粉拌勻~~

STEP 2
煲滾水後將所有材料及調味放於碟上再大火隔水蒸約12-15分鐘即成

<<煎雞翼>>
個BLOG最近成日都生草~家下感覺自己有女萬事足~成日顧住隻衰豬~好少自己嘅ME TIME 喇~下年月月讀咗小學後~我又可能陪做書僮…到時應該都摺得架喇個BLOG..

今日整雞翼~加咗少少蒜粉~慢火煎香~呢個天氣煎雞翼就好~過多排夏天真係咪搞我喇….

材料: 雞翼約12隻
雞肉醃料: 蠔油約1湯匙 , 糖及薑茸一茶匙 , 麻油及生粉少許
調味: 蒜粉隨意, 黑胡椒粉少許

STEP 1
將雞翼洗淨後, 跟醃料醃最少1小時

STEP 2
燒紅鑊將雞翼煎至金黃熟透後灑上調味即成~!