黃師奶廚藝小百科

<<炸蕃薯>>
追咗套如妃2日~~吖~~黃師奶好似仲未get到佢講咩~~唔通真係事隔九年唔記得咗d 劇情?!~拍法唔同咗~~吖~~不過是但啦~點都好睇過套布布囉~….阿視帝唔係唔好戲…只係搵佢做型男….~唔襯囉..都叔叔輩啦~~~搵林峯就差不多~~

~好喇~~發完UP瘋~黃師奶今日整咗個小食~~~~~<<炸蕃薯>>~~其實易到爆~黃師奶用咗幾年前喺報紙搵到嘅炸漿配方~~~凍咗食都仲好脆~~黃先生仲好BUY~~好快食光光TIM!~~~~大家快D 試吓吖~~~

材料: 蕃薯一大件
炸漿: 麵粉150G~泡打粉約1.5茶匙~生粉10G~水250G~鹽少許~油30G

STEP 1
蕃薯~切件後用水浸約半小時備用

STEP 2
炸漿嘅材料拌勻; 將蕃薯沾上炸漿~

STEP 3
燒熱2杯油, 將蕃薯炸至金黃即成~!

<<獨子蒜炒雞>>
尋日睇電視~訪問見到阿熊小姐沒趣咁交代同鹹蛋王分手~~講真~都拍咗咁多年啦~隻鹹蛋王~都唔認同佢一齊~~仲要越浸越鹹~~真係早走早著啦~~~衰d嗰句~佢都係因為食鹹蛋王食到多人識咗~~~~不過女人青春有限~都係蝕~

~好喇~~又煮頹餸~~乜鬼嘢都冇加~只係用咗獨子蒜黎炒d雞~~最後灒埋酒~搞掂~~~~所以話呢~~有時黃師奶真係好懶~亦好冇煮意~~~不過屋企老細冇炸形~~就算~~~

材料: 雞件 (半隻雞 ) , 獨子蒜隨意 , 薑二片, 紹酒一碗
醃料: 生抽約一湯匙, 胡椒粉及麻油少許, 紹酒適量

STEP 1
雞件洗淨後抺乾水份~與醃料拌勻備用~獨子蒜去衣啪啪~

STEP 2
爆香獨子蒜~薑~~再放雞件煎香~煎至金黃後灒酒快炒至熟透即成~!

<<蕃薯糖水伴湯圓>>
~~又到星期五lu~~今日天氣涼咗喎又~~大家記得著多件衫喇~!~~黃師奶好想買部HITACHI嘅導出導入機呀!~~~見網上評價好似講到幾好用咁~~~唔知BLOG友仔有冇用開呢?有就同黃師奶分享吓啦~~呵呵呵~~~
好喇~~作為一個好老婆~~~黃先生如果夜返就一定有夜宵食~因為佢返親黎都話肚餓….問我有咩食…所以已經習慣咗煮夜宵~!係咪覺得好肥呢~~~肥都冇計~~因為黃先生鍾意食~~~黃師奶就會煮架喇~~~~

蕃薯糖水材料: 蕃薯兩個, 薑片四小片 , 片糖一塊半, 水大半煲
湯圓材料: 糯米粉200g , 暖水(自己慢慢加啦~) 片糖適量

湯圓做法
STEP 1
糯米粉篩1次~再慢慢加暖水搓至麵糰光滑 ; 片糖整碎~

STEP 2
將大約1/5嘅麵糰分割出黎~~壓平~~煲滾水後~將呢1/5麵糰煮熟盛起~再將熟麵糰與其餘4/5麵糰搓勻至光滑~再包餡~(呢個方法上網學嘅~個人認為湯圓真係煙UN咗) ~

蕃薯糖水做法
STEP 1
蕃薯先去皮切大件, 再用清水浸約半小時備用 (浸咗水先煲就唔會變深色)

STEP 2
煲滾水後加入蕃薯煲約二十分鐘至腍, 再下片糖調味~拌入湯圓煮滾即成!!

<<香菇滑雞粥>>
~~話咁快~三月同四月嘅復活節同清明假期又完咗lu~~不過冇所謂啦~大家捱多唔夠一個月~又有五一喇~~~不過今年五一唔知道大家會唔會好驚呢?!內地d H7N9已經開始爆發~而內地人嘅衛生又咁差..~..到時都唔知會唔會搞到好大單呢?!~~

好喇~家吓黃師奶有時會煲粥做早點嘅~~~~落街食一碗細細哋都要三四十蚊..有時真係自己煲冇咁嬲~~煲出黎一大煲…化算好多~~!!

材料: 雞件隨意, 冬菇隨意, 一杯米, 十三杯水

STEP 1
雞件少許鹽醃過夜; 冬菇浸軟後與少許糖及DD麻油醃一會

STEP 2
將米洗淨、隔水，加入鹽及油醃一會。

STEP 3
預備大煲滾水, 加入米~冬菇大火煲至綿身後~拌入雞件~拌勻滾一會熄火蓋上蓋焗一會後下鹽調味即成.

** 間歇地攪拌煲內的粥，以防底部起焦.**

<<碗仔翅>>
~一連四日嘅假期又完咗lu~~大家今日係咪冇哂mood 呢?!~不過冇所謂啦~~捱多2日~打工仔又放1日~咁呢個星期就好快完呢~!!~~~懶咗咁多日~個blog 又發咗毛~~係時候清清佢~

今日整咗個碗仔翅~!~黃先生睇完戲返黎當夜宵食~~佢話好食喎!~~不過衰在買唔到素翅~唔係會再好味d!~

材料:上湯500g , 浸菇水200g , 冬菇六隻, 木耳隨意, 粉絲一個, 雞蛋一隻 , 豬展肉200g
豬肉醃料: 生抽半湯匙, 糖一茶匙, 胡椒粉及麻油少許
調味: 老抽一至二湯匙, 鹽及胡椒隨意

STEP 1
冬菇浸軟後去蒂切絲, 木耳浸軟後與冬菇絲加少許糖同麻油醃一會 ; 粉絲浸軟

STEP 2
豬展肉洗淨後用滾水煮約半小時後拆絲, 加入醃料拌勻

STEP 3
煮滾上湯及浸菇水後加入冬菇絲,木耳及豬肉絲煮約十五分鐘後下粉絲~最後用生粉水埋芡至杰身~加入蛋花及調味調色即成~!