黃師奶廚藝小百科

<<什菌意大利飯伴黑松露醬>>
~~~HAPPY FRIDAY!~~~~大家今日係咪好開心呢~?! ~~唸好呢個WEEKEND 嘅節目未呀?不過天氣咁熱~~~有時咪埋喺家仲爽過出去玩呢~~!黃師奶呢個星期六日都好忙~~2日都約咗朋友仔~呵呵呵~~~

~嗱~今日玩煮意大利飯~~就係因為黃先生一句我想食~~….搞到黃師奶對住個爐係咁煮~開大冷氣都唔夠涼~~煮得咁辛苦~佢一下子又清哂~~~~黃先生仲話好好味~~話抵佢成日帶我出去食嘢攞靈感喎~!~

材料: 意大利米一杯, 上湯600ml , 忌廉隨意 , 牛油一大匙 , 白蘑菇+啡蘑菇16隻, 日本本菇一PACK , 黑松露醬

上湯做法 (可以頹用史X生嘅~不過我覺得咁煲菇味更濃)
將菇菌清潔乾淨, ~煲一升水 (或者平時煲開嘅湯整咗高湯啦)~~拌入菇菌滾大約半小時~再隔出600-700ml ~備用

意大利飯做法
煮融少少牛油~拌入意大利米~再逐少逐少加入上湯等D 米吸收~期間要炒下炒下咁~
當D 米開始變得軟身嗰時(都要炒大約20-25分鐘)~就加入菇菌兜炒片刻~再加入忌廉~兜勻至收水~最後拌入黑松露醬食得~!~

<<蛇年五月糉>>
~.仲有2個星期就係端午節喇~~唔知大家忙包粽未呢?!黃師奶今年就開始包lu~不過都係包住少少先~~~廢事包咁多啦~因為手累嘛~~~~~點知包完之後~阿黃先生就話想食上海粽多過廣東粽喎~~!你話佢係咪煩吖~~~之後我就應佢話我係廣東人~唔包上海粽~!!!點知佢串我話咁你又食西餐日本菜~~!!實在太過份喇~!!又搞d 功夫俾人做~~!!!

~好喇~其實包粽冇咩難度~~至於d 餡料~醃夠味應該唔會難食得去邊~!鹹蛋記得唔好買現盛pack 好哂嗰d 蛋王~因為黃師奶覺得新鮮最好味~!!都係嗰句啦~一年一次~要花d功夫呢~!~

材料: 鹹蛋, 開邊綠荳, 糯米, 瑤柱, 冬菇隨意, 五花, 糭葉, 鹹水草
五花腩醃料: 生抽兩湯匙, 五香粉半湯匙, 麻油及糖少許
糯米醃料: 油一湯匙, 鹽兩湯匙, 五香粉少許 (一斤糯米醃料)
冬菇醃料: 麻油少許, 糖一茶匙

STEP 1
五花腩洗淨後用醃料醃最少一晚備用~

STEP 2
糭葉洗淨後用滾水浸一晚備用~

STEP 3
糯米洗淨後浸至少兩個小時, 再與醃料拌勻備用; ~開邊綠荳淨後浸至少兩個小時

STEP 4
瑤柱及冬菇用暖水浸軟; 冬菇去蒂後與醃料拌勻備用

STEP 5
將所有材料用糭葉包好後大火烚約兩小時即成~!

<<香菇炆素雞柳>>
~好喇~SOGO減價2星期~~黃師奶第一日就夜晚晚先去到喇~~~頭2晚開到凌晨十二點~~呵呵呵~夜遊SOGO又真係少人D!~~買都買得爽D~唔知大家去咗未呢?!如果未~不妨考慮吓夜晚先出動吖~~~不過出動前~記得STUDY吓份減價清單先~~因為有D根本冇減到同埋~其他超市仲平D~~唔研究過好易呻笨呢~

好喇~~~又到齋口唔齋心系列~~~食齋就食齋啦~~又要買素雞柳~~呵呵呵~~~~見黃先生又咁鍾意食冬菇~就加少少蠔油炆到入味~~簡簡單單又一個小菜~~唔知大家鍾唔鍾意呢~?!

材料: 素雞柳2一包, 冬菇八隻, 蒜茸一茶匙
調味: 蠔油一大湯匙

STEP 1
冬菇浸軟後去蒂~用少許糖加麻油醃一會備用~

STEP 2
爆香少少蒜茸~拌入素雞柳~炒香~再加入冬菇兜炒片刻~

STEP 3
~拌入調味兜勻~加少半碗水煮滾後炆煮約廿分鐘即成~~

<<天使蛋糕之黃先生生日篇>>
~~YEAH!~~又到五月十五日喇~~今日係黃先生嘅生日~~~~大家得閒就留個言~祝我個黃先生生日快樂~~~~身體健康~~心想事成~~~仲要越來越錫老婆~~~將全副身家都俾哂黃師奶~~黃先生今日唔駛返工~我哋2個會出去飲飲食食~~~~~大家唔駛掛住我哋喇~~~~呵呵呵~~~~

~好喇~黃師奶真係好少可整CAKE~~因為黃先生唔太喜歡食CAKE~~~!不過見佢生日~~冇計啦~~~點都要有個CAKE!應吓節嘛~~~整咗個天使蛋糕~~~希望我個黃先生鍾意~同明白我嘅心意啦~~~~~~

材料: 蛋黃三隻 , 蛋白三隻, 糖65g , 鹽dd, 菜油43g, 牛奶75g , 中筋粉65g , 泡打粉約3g, 塔塔粉2g
餅面CREAM: 淡忌廉220g + 糖霜8g

STEP 1
焗爐預熱160度~菜油加熱至60度 ; 蛋黃+糖25g+鹽打起~再將菜油逐少加入蛋黃中拌勻

STEP 2
將30g牛奶注入STEP 1中, 再拌入已過篩嘅中粉及泡打粉~~~拌勻至有少許筋性~再逐少注入餘下牛奶~

STEP 3
將蛋白加入餘下砂糖+塔塔粉打起~然後拌入STEP 2 粉漿中輕力拌勻~

STEP 4
將粉漿注入模中~焗約45分鐘後倒扣再鋪上CREAM 及裝飾即成~!

<<蒜香XO醬蒸大扇貝>>
~~周五快樂~~~~天氣陰陰沉沉咗幾個星期~尋日終於好好天~~~下午嗰陣仲好熱TIM!~~希望今日繼續好天啦~~黃師奶今晚會同朋友仔去學插花呀~~!!!個地方好似喺花墟附近…都幾吊腳吓~~~如果天氣唔好就大單喇~~嗱~唔好期望黃師奶會放個製成品上黎呀!~~黃師奶自問呢方面冇咩天份..都唔知會插咗D 咩怪獸出黎~

~好喇~~喺街市買咗D大扇貝~~有幾大?!真係好大囉~~幾錢? 冇肥媽嗰D 咁平囉~嗱嗱嗱~~黃師奶唔係話百五蚊買唔到海鮮呀~!!!講真~平有平食貴有貴食JER!~幾十蚊唔會買唔到餐餸架喎!~只係睇你去邊樹買同食D咩JER!~~

材料: 大扇貝四隻 (通常魚佬都幫你劏內臟), 粉絲一紮

調味: 蒜茸一大匙, XO醬一大匙

STEP 1
大扇貝清洗乾淨; 粉絲浸軟後瀝乾水份備用

STEP 2
煲滾水; 將調味拌勻再搽上大扇貝上~鋪上少少粉絲後大火蒸約七分鐘即成~~!