黃師奶廚藝小百科

<<鑽石蜆>>
~尋日睇套愛作戰~真係睇到笑爆咀~~~嗰個VIVIAN~真係檢討吓啦~口氣又大成日話自己屋企有錢~~!!仲成日開口埋口話JUSTIN 係佢~…話唔會俾人搶走個老公..其他人係小三~!!~~見班仔都怕咗佢~~仲咁團結咁救JUSTIN!~~節目出咗街~睇黎佢都好魚爆…

好喇~~~黃師奶之前入咗唔少貨個雪櫃就黎爆~入咗2pack 鑽石蜆~~呵呵呵~~第一個煮法就係就水都冇加~放入個pan 到焗到開蓋~~~黃先生話好正喎!食到個鮮味~~講明先~我冇浸水吐沙架~~~只係沖乾淨咗d 蜆~~~有機會~大家買包黎試啦~~~~~

材料: 鑽石蜆一包

STEP 1
鑽石蜆清洗乾淨~!~

STEP 2
燒熱個鑊~~~拌入鑽石蜆後蓋上蓋至熟即成~~!!

<<焗法式香草田螺拌薯蓉>>
~周五快樂喔~~~今朝晨早就掛咗一號風球~~~仲話呢幾日會有狂風暴雨tim!~~放假先黎落雨~又真係好冇mood~~~睇個路線圖又好似吹得幾正吓~~~!不過個風又好似好弱雞~~唔知打唔打得成呢~!?!~

好喇~~~黃師奶有日上網喺海洋三到購物~~~~~就買咗一pack法式香草田螺~~一pack 有24隻~黃師奶分咗2次黎整~~!個田螺冇咩難度~因為已經調好味~無須解凍~只係要自己整個~~薯蓉拌住黎食jer!~黃先生係咁話個薯蓉好好食~~!仲一路食~一路話今次又肥死~~~~真係好鬼麻煩~~

材料: 香草田螺12隻 (急凍) , 焗薯2個, 牛奶約4湯匙(室溫) , 鹽隨意 , 有鹽牛油40g(室溫)

STEP 1
焗薯~去皮~煲滾水後煮至腍身~盛起瀝乾水份~~再匙壓成蓉

STEP 2
將薯蓉拌入牛油至完全拌勻~再慢慢注入牛奶再調味攪拌至無粉粒~

STEP 3
焗爐預熱230度15分鐘~將田螺放上薯蓉面上~~焗約10分鐘至薯蓉金黃即成~!

<<金奇偉果西米露>>
~話說黃師奶星期六晚去咗打牌啦~~~真係要同大家分享呢單爆騎呢事~~!黃師奶嘅雀友們~~~都係由細玩到大嘅朋友~~~大家都好friend~爆趣嘅事係其中有條友打打下牌問個屋主借支洗面奶話要落妝喎~….喺條煩友喺個屎坑到執緊自己個樣嘅時候~~~我哋另外三個真係覺得好爆趣~!打打下牌做埋呢d 嘢..真係打到第朝都唔知打咗2個東未囉…..

~好喇~~講返我個甜品~~黃先生好鍾意食金奇偉果~~~~~貪佢夠甜喎!~~~梗係甜啦~~呢款貴過普通嗰隻幾多呀~!!!咁見屋企仲有西米喺到~就煲個糖水~加多幾片金奇偉果~雪凍佢~~cool~~~~~~~~~~~

材料: 西米200g, 凍滾水5杯 , 椰漿一小罐 , 奶600ml , 糖隨意, 金奇偉果隨意(去皮切片)

STEP 1
西米浸約一小時盛起~再將西米與凍滾水煮滾~~其間要時不時攪拌~煮大約5分鐘到啦~熄火蓋上蓋焗至西米透明~~

STEP 2
~將熟透嘅西米盛起~煮熱奶後下西米及椰漿攪勻~下糖調味後雪凍~拌入生菓即成~!

<<蒜香排骨>>
~端午節快樂呀!~~~大家今日會唔會出去睇下龍舟~~~或者游過龍舟水呢~~~黃師奶呢~~就冇咁好心走去迫喇~~都係d有冷氣嘅地方啱我多d~~打埋篇blog~~等我個黃先生起床呢~~~我哋就入娘家同阿娘佢哋飲茶喇~~呵呵呵~

好喇~今日又食排骨~~其實黃先生好鍾意食排骨~~~黃師奶都好常整~見有朋友仔成日問點蒸會滑d~~~黃師奶覺得除咗排骨部位要注意外~~~最好就先醃有味醬料~最後煮前先加麻油生粉拌勻~~咁就實冇失手呢~~

材料: 腩排/飛排三十蚊,生粉一茶匙及麻油適量, 辣椒隨意 , 蒜茸1大湯匙
醃料: 生抽一湯匙, 老抽少許, 糖一茶匙, 胡椒粉少許

STEP 1
排/飛排洗淨後與醃料醃約二十分鐘~~

STEP 2
將醃好嘅排/飛排與少許麻油~~~及生粉拌勻~~蒸前再拌入蒜茸同辣椒絲

STEP 3
煲滾水後大火隔水蒸約12分鐘至熟

<<蒜香韓國菇菇>>
~又到星期五~~~HAPPY FRIDAY 喔~~~~呢幾日真係夏日炎炎~~好熱喔~家吓先六月~幾時夏天先過呢~~~唔覺唔覺~黃師奶跳咗~鄭多燕就黎三個月~~由最初日日跳~變到家吓隔日~~~WELL..唔覺自己瘦咗囉~~~不過好似冇咁鬆D肉~~~希望可以KEEP 住當運動咁每星期跳3次啦~~~~~

好喇~~~今時今日乜都貴哂~~~~要打斧頭真係唔易~.~~見到超市d韓國菇仔賣10蚊多d一大pack~~~~有理冇理立咗先~~~~~返到家~又唔知點煮~求奇用蒜茸兜一兜~~想再香d~~我又加咗牛油~~黃先生話好好味~~叫我再整喎!~

材料: 韓國菇菇一pack , 蒜茸一湯匙, 牛油隨意 , 蒜鹽少許

STEP 1
菇菇清潔乾淨

STEP 2
爆香蒜茸~拌入菇姑炒香~加少少牛油兜勻~~煮熟再落蒜鹽調味即成~!