黃師奶廚藝小百科

<<馬年 – 腰果>>
尋晚黃師奶走咗2場~第1場就同張媽媽慶生日~第2場在去班朋友仔到~~佢哋好好呀!~知道黃師奶走2場~就就黃師奶改咗8:30pm 先開始~呵呵呵~不過黃師奶唔知係咪食錯嘢..回家途中個肚痛到爆…差d未過年就搞到成地金…..

好喇~~~~一年一到~張媽媽系統之炸腰果又出爐~~佢話佢自己買咗7斤黎炸~~well!~~炸黎都係送人多~自己食其實好少架咋~~炸呢家嘢只會一年玩一次~~因為..太多油…太熱氣了~!!~張媽媽聲稱佢嘅秘笈係~~~~~~~~~

材料: 腰果 , 鹽 , 油 (唔好咁多呀!~剛剛蓋過你所炸嘅份量好喇)

STEP 1
腰果汆水三分鐘後瀝乾水份

STEP 2
下油~(放粒腰果落去~D油出大泡泡~就油溫啱架喇~) 拌入腰果大火炸佢5秒到~轉慢火炸至開始金黃~轉返大火~炸到金黃盛起

STEP 3
腰果盛起後隔去油份~~再灑鹽拌勻就食得LU!~~~~

大家可以Click入 黃師奶廚藝小百科 facebook 粉絲專頁度交流吓吖~!!!

<<馬年 – 芋頭糕>>
哈~今日來到黃師奶過年系列之芋頭糕~!!呵呵呵~~~其實芋頭糕真係好易整~因為唔駛刨蘿蔔~哈~慳返好多功夫呢~尋日朝黃師奶蒸好咗幾底~又炸炸林咁拎返娘家~~跟手整多d鯉魚年糕~~忙咗成朝~~~

嗱~今日就出芋頭糕喇~其實每人口味唔同~個個人整糕嗰時落粉比例都有出入架~所以大家唔好奇怪點解你加澄麵…另外d人就整用沾米咁~總之要試到啱自己口味啦~~記得d 料唔好加得太誇~加得太多切嗰時好易散~唔好咁貪心~呵~~

材料: 芋頭一斤
餡料: 半條臘肉, 一條臘腸, 一條膶腸, 6隻冬菇, 蝦米及瑤柱隨意
調味料: 一茶匙雞粉, 一茶匙五香粉, 一茶匙胡椒粉
粉漿: 粘米粉170g, 澄麵粉10g, 浸菇水2杯 (完全拌勻)
煮芋頭水: 浸菇水2杯

STEP 1
芋頭 去皮切粒; 冬菇浸軟後去蒂切粒(浸菇水留用)

STEP 2
蝦米及瑤柱浸軟; 臘肉,臘腸同膶腸用熱水沖淨後切粒

STEP 3
燒紅鑊後將臘肉,臘腸同膶腸炒香~炒到好香出油後拌入蝦米, 冬菇粒及瑤柱爆香盛起

STEP 4
原鑊拌入芋頭炒香~之後盛起一碗芋頭粒留用

STEP 5
注入2杯浸菇水後將芋頭煮至滾起 後下調味料試味~再拌入其他餡料及芋頭粒兜勻

STEP 6
拌入粉漿~不斷兜勻至收水~收水後熄水再完全拌勻所有餡料

STEP 7
將器皿掃油後拌入餡料鋪平, 大水隔水蒸約30分鐘後即成~

大家可以Click入 黃師奶廚藝小百科 facebook 粉絲專頁度交流吓吖~!!!

<<馬年 – 蘿蔔糕>>
原本朋友仔約咗黃師奶聽日出街食飯~不過有條友仔話唔得閒~呵呵呵~咁就改咗下星期二食飯LU!~都好吖~因為黃師奶聽晚就可以喺企睇哈利波特大結局~~呵呵呵~不過黃先生聽晚有約…得返黃師奶喺家睇~~~怨婦ING……

唔怕你哋睇到嘔~哈哈哈~冇錯~繼續黃師奶過年系列~今日出返個蘿蔔糕先~整蘿蔔糕其實一D都唔難架~只係刨嗰下煩咋~呵呵呵~不過黃師奶有部機~3斤蘿蔔唔駛3分鐘就變絲~冇咗呢部機~黃師奶刨到腰骨痛都未刨完呀!~

材料: 蘿蔔三斤
餡料: 半條臘肉, 一條臘腸, 一條膶腸, 6隻冬菇, 蝦米及瑤柱隨意
調味料: 一茶匙雞粉, 一茶匙糖, 一茶匙胡椒粉及五香粉少許
粉漿: 粘米粉80g, 鷹粟粉160g, 蘿蔔湯400g (完全拌勻)
煮蘿蔔水: 浸菇水150g杯

STEP 1
蘿蔔刨絲~其中約一碗蘿蔔切粗絲; 冬菇浸軟後去蒂切粒(浸菇水留用)

STEP 2
蝦米及瑤柱浸軟; 臘肉,臘腸同膶腸用熱水沖淨後切粒

STEP 3
燒紅鑊後將臘肉,臘腸同膶腸炒香~炒到好香出油後拌入蝦米, 冬菇粒及瑤柱爆香盛起

STEP 4
原鑊拌入蘿蔔連刨蘿蔔時的汁炒片刻~加150g浸菇水煮至蘿蔔剛軟身再下調味

STEP 5
將剛煮起的蘿蔔隔去上湯, 留起蘿蔔上湯約400g用黎開粉漿

STEP 6
唔駛開火~再拌入其他餡料兜勻

STEP 7
拌入粉漿~不斷兜勻~ 再開慢火兜勻至收水~收水後熄火再完全拌勻所有餡料

STEP 8
將器皿掃油後拌入餡料鋪平 , 大水隔水蒸約60分鐘後即成~

大家可以Click入 黃師奶廚藝小百科 facebook 粉絲專頁度交流吓吖~!!!

<<花蝴蝶杯子蛋糕>>
哈~~係咪覺得黃師奶好得閒呢~呵呵呵~~一個平凡嘅杯子蛋糕~加咗少少buttercream 做裝飾~~整個感覺唔同哂~呵呵呵~你哋鍾意黃師奶呢個杯子蛋糕嘛?!

大家可以Click入 黃師奶廚藝小百科 facebook 粉絲專頁度交流吓吖~!!!