黃師奶廚藝小百科

<<蒜香菇>>
今朝起身又覺得自己上左天堂~望出窗係白濛濛一片~~白到你唔信…究竟係因為黃師奶住得太高定係呢區真係濕太咁呢?!一出街仲要有雨咁~討厭~!今個星期日仲話去拜山~如果咁濕~到時實鬼呢hea~~~

呢款韓國迷你直菇~黃師奶堅鍾意食~今次將呢款菇加埋pack 日本本菇一齊煮~well..其實係因為個人懶~見乜煮乜…爆香少少蒜茸~快手兜炒~已經好好味~加多少少青椒~賣相又靚d~又食得開心d~呵呵~!

材料: 韓國菇菇一pack , 日本本菇一pack , 蒜茸半湯匙, 青椒

STEP 1
菇菇清潔乾淨(最好用濕布清潔~沖水太勁..吸水太多的話..煮嗰時會出水..) ; 青椒洗淨去籽切絲備用;

STEP 2
先爆香蒜茸~拌入菇類兜炒片刻後再加青椒絲兜勻~~煮熟下少許鹽調味即成~!

<<黑椒辣雞鎚>>
呢幾日睇新聞~台灣民眾真係好熱血~~個個都唔怕事~坐喺到死守~黃師奶幾欣賞佢哋嘅精神~先唔理佢哋呢個集會有冇用先啦~喺馬會行出黎發言~比起香港~真係差好遠~可能香港人個個掛住搵食~手停口停~又或者香港人覺得點反都冇用啦~

家下逄周三吉吉島會有大特價~咁呢日黃師奶就掃咗D雞鎚返家喇~返到家嗰時未唸到點煮~求奇用D生抽醃咗佢先~WELL..到煮飯嗰時人又懶…咁就又灑少少黑椒同辣椒碎放入焗爐算…搞到個食譜唔中唔西…不過味道幾好架~黃先生激讚~!

材料: 雞鎚6隻
醃料: 生抽一湯匙 , 糖一茶匙 , 胡椒粉少許, 麻油及生粉少許, 紹酒一大匙, 黑胡椒及辣椒碎隨意(呢2樣可以焗時先加)

STEP 1
將雞鎚與醃料拌勻備用

STEP 2
預熱焗爐180度15分鐘; 燒紅鑊後將雞鎚煎香

STEP 3
灑上黑胡椒及辣椒碎~將雞鎚放入焗爐焗至熟透(20-30分鐘咁上下啦) 即成~!

<<蠔汁香菇浸時蔬>>
雖然呢幾日玩forum到有d沒趣事發生~不過黃師奶好高興有唔少網友jm為黃師奶發聲..幫黃師奶抱不平..實在非常感動…冇唸過素未謀面嘅jm會為我呢個師奶仔做咁多嘢…喺到多謝哂大家嘅關心同努力~!

講返碟餸先~黃先生好like 食冬菇架~所以都好常煮~呵~家下後生食多d冇咩所謂~遲多十年八年應該冇呢支歌仔唱~今次煮咗個娃娃菜~炆好d冬菇就淋上去~如果想d冬菇靚仔d~可以放d冰糖落去炆~咁d 冬菇炆出黎會好有光澤喔~~

材料: 冬菇十隻 , 薑2片, 娃娃菜3小棵
調味: 蠔油一大匙
汁料: 生抽半湯匙, 麻油及胡椒粉少許, 冰糖一小粒, 生粉一茶匙, 浸菇水大半碗 (全部拌勻)

STEP 1
將冬菇洗淨後浸軟去蒂, 浸菇水留用 (用黎調個汁料) ; 娃娃菜洗淨後瀝乾水份

STEP 2
爆香薑片後拌入冬菇略略煎香~ 下蠔油後兜炒片刻; 注入汁料煮滾後慢火炆煮約20分鐘

STEP 3
煲好水後下少許油鹽糖~將娃娃菜烚熟; 將煮好嘅冬菇連汁淋上娃娃菜上即成~

<<混醬牛肋條>>
呢幾日玩FORUM玩到好HIGH~能夠俾一班人圍插話黃師奶借佢個FORUM黎宣傳~實在係黃師奶嘅福氣~點解你哋封殺我?!咪就係一串酸葡萄累事囉~BLOG我會繼續寫~酸葡萄你哋繼續食~如果你哋踩到黎呢邊~就係你本事喔~~~

嗱~今日呢碗咖哩真係好得黃先生嘅欣賞…事關黃師奶開好飯~畢埋碟菜一出黎..已經見到黃先生食完咗碗飯…佢話因為D咖哩好送飯..問我仲有冇喎..(滴汗中)…心唸:有冇咁餓呀你…?!不過難得黃先生喜歡~對住個爐幾熱都係煮得心甜~~~

材料: 牛肋條600g, 薯仔2個 , 洋蔥 一個, 乾蔥茸一湯匙, 辣椒油隨意, 黃薑粉少許
醬汁: 油咖哩三大湯匙, 沙嗲醬2湯匙

STEP 1
牛肋條先出水去減啲油

STEP 2
洋蔥去衣後切角備用~薯仔去皮洗淨切大件

STEP 3

將牛肋條同薯仔略略煎香~再爆香洋蔥後盛起

STEP 4
慢火將油咖哩~同沙嗲醬炒香~!拌入洋蔥~乾蔥茸~同黃薑粉~炒香下牛肋條~兜炒片刻~

STEP 5
加水蓋過所有材料後用炆焗方法大火煮滾轉細~火炆煮約30分鐘後熄火焗30分鐘~!再重覆~~!.

STEP 6
最後拌入薯仔炆多15分鐘焗多15分鐘~加上辣椒油同鹽調味~打個生粉水~煮至汁稠即成~!