黃師奶廚藝小百科

黃師奶烘培工作坊

想跟黃師奶整靚靚動物cupcake, 請即報名參加
黃師奶烘焙工作坊啦! 黃師奶烘焙工作坊

黃師奶專欄

日日煮星級「煮」廚


SalaD blog 星級blogger


點煮網推介用戶


myTaste.tw

近期迴響

Google+ Badge

萬聖節杯子蛋糕系列

20141026cakecake
<<萬聖節杯子蛋糕系列>>
哈~唔知大家有冇去到海浪公園同迪迪尼D萬聖節派對呢~黃師奶~成世女去過一次咁大把~都已經好耐之前嘅事~不過記得人太多~其實冇乜點玩過D乜~哈~

話咁快又到咗萬聖節喇~~黃師奶點都要應下節嘅~~哈哈~~簡單一個蛋糕再配上BUTTERCREAM 同糖皮~~咁就為呢個節日加添咗唔少色彩呢~呵呵呵~~~

材料: 低筋粉120g, 牛油120g, 蛋2個, 砂糖100g, 粘米粉30g, 牛奶40g,  泡打粉5g,  buttercream / 糖皮適量

STEP 1
將低筋粉, 泡打粉及粘米粉過篩3次

STEP 2
焗爐預熱180度10分鐘

STEP 3
先將牛油打發再拌入糖打至均勻; 再拌入其他材料至中速打至變成稠身麵糊 (約4分鐘)

STEP 4
將麵糊倒入容器內再拌入提子以180度焗約30分鐘至熟透

STEP 5
最後用buttercream / 糖皮 做上裝飾即成

 

大家可以Click入 黃師奶廚藝小百科 facebook 粉絲專頁度交流吓吖~!!!

點煮網秋冬烘焙食譜比賽 – 優異獎

IMG_7826

黃師奶早前參加咗點煮網舉辦嘅秋冬烘焙食譜比賽得到優異獎~呵呵~~~同大家分享吓呢份喜悅先~~
喺到實在多謝點煮網嘅賞識~同埋大家嘅支持呢~!

大家可以Click入 黃師奶廚藝小百科 facebook 粉絲專頁度交流吓吖~!!!

七色頸巾

20141026巾巾
<<七色頸巾>>
差不多11月~~黃師奶呢個得閒怪又化身織女喇~今次呢款冷好多隻色~織出黎好sharp好易襯~黃師奶好鍾意呀!~~呵呵呵~~

元寶針~
織法係針數要用3倍數=>掛一針 => 加針=>2針拼一針

大家可以Click入 黃師奶廚藝小百科 facebook 粉絲專頁度交流吓吖~!!!

點煮網-萬聖節黑芝麻CUPCAKE — 黃師奶廚藝小百科


<<點煮網-萬聖節黑芝麻CUPCAKE — 黃師奶廚藝小百科>>
黃師奶喺到感謝點煮網 嘅邀請同賞識~為今個萬聖節拍咗一段CUPCAKE教學片~呵呵呵~如果大家想睇黃師奶教整CUPCAKE, 快D CLICK 入去睇啦~~

大家可以Click入 黃師奶廚藝小百科 facebook 粉絲專頁度交流吓吖~!!!

軟綿綿朱古力蛋糕

20141015古古力糕1
<<軟綿綿朱古力蛋糕>>
尋日同黃先生講起中大~哈~我哋年青時嘅回憶~上當年可以轉堂嗰時由山腰仆落山腳上堂~或者由山腳行返上山腰都仲得~佢話家下叫我行~我實剷爆佢喎!~家下唸返都覺得痴線~行完咁多路仲可以繼續上堂~哈~

呢個蛋糕仔呢~黃師奶記得係朝早焗嘅~因為唔駛開機~用膠刮就得~整嗰時唔會嘈住黃先生瞓覺~等佢起身食完就返工~唔錯唔錯~呢個蛋糕快靚正~有機會記得試吓呀~

材料:多用途粉100g, 蛋汁約60g , 黃糖70g, 牛油溶液60g , 牛奶140g , 朱古力粉3湯匙 , 泡打粉1茶匙 , 梳打粉1/4茶匙

STEP 1
將粉類材料過篩3次; 預熱焗爐180度約15分鐘

STEP 2
將蛋液, 牛油溶液, 糖及牛奶用膠刮拌勻; 再將粉類材料拌入(輕力用膠刮拌入即可)

STEP 3
將麵糊倒入焗模中, 以180度焗約20分鐘即成~!

 

大家可以Click入 黃師奶廚藝小百科 facebook 粉絲專頁度交流吓吖~!!!

辣酒煮花螺

20141001螺螺
<<辣酒煮花螺>>
尋晚黃師奶就冇關心過學聯個對話喇?!點解~傾咗都唔會有咩進展架喇~所以碟埋心水睇老表~哈~黃師奶覺得張繼聰拎d花生油黎搽身真係超搞笑~仲要話咩軟飯王大show 肌肉~~哈~套劇白白痴痴咁~好搞笑~

黃師奶見到街市d螺好抵~又買咗d返家lu!~呵~d螺記得汆水呀~黃師奶會汆2次水~咁就可以去乾淨d螺入面d 潺同埋硬甲架喇~食起上黎就方便d~亦都唔怕會肚仔痛呢~呵呵呵~

材料: 花螺 /東風螺一斤, 紅尖椒三隻, 蒜茸一湯匙, 乾蔥茸半湯匙, 薑兩片
醬料: 桂林辣椒醬一湯匙, 豆瓣醬一湯匙
酒: 香糟露

STEP 1
螺浸於鹽水中三小時~之後汆水2次去潺同硬甲

STEP 2
爆香料頭同醬料~拌入螺兜炒片刻~注入酒至蓋過所以材料~慢火煮約半小時至入味即成~

大家可以Click入 黃師奶廚藝小百科 facebook 粉絲專頁度交流吓吖~!!!

瑤柱豬骨粥

20141015豬骨粥
<<瑤柱豬骨粥>>
尋日唔知道大家有冇睇飛老虎呢?! 阿馬生跳貨櫃嗰幕~真係睇到黃師奶嘩嘩聲呀!~嗰下仲勁過阿關禮傑跳樓跳過對面喎!~阿黃先生話唔好睇咁多喎~睇得多個人變得再蠢d喎….

黃師奶煲粥呢~就冇用冰米嗰d方法架~只係煲前將d米用油鹽醃一陣~再大火煲~火夠大~咁d粥就喺個煲到轉轉下咁就唔會痴底啦~個粥仲會好綿tim!~今次落足d豬骨~醃到過夜~好入味好正呀!~

材料: 豬骨(約50蚊), 瑤柱隨意, 一量杯米, 十三量杯水

STEP 1
豬骨用鹽醃過夜; 瑤柱浸軟(瑤柱水留用)

STEP 2
將米洗淨、隔水,加入鹽及油醃一會; 豬骨汆水片刻備用

STEP 3
預備大煲滾水(瑤柱水), 加入米~豬骨/瑤柱大火煲至綿身後下鹽調味即成.

大家可以Click入 黃師奶廚藝小百科 facebook 粉絲專頁度交流吓吖~!!!

洋蔥牛柳炒河

20141015洋洋牛河
<<洋蔥牛柳炒河>>
HAPPY FRIDAY!~唔知道大家聽日有咩節目呢?!呵呵~呢期天氣涼返D~又乾燥D~出去戶外行下都唔錯架~不過等黃先生忙完得閒陪我先啦~佢呢期公私兩忙~~黃師奶就黎連佢個樣係點都唔認得喇~!

今日好鬼懶~炒河粉食呀!~哈~D河粉記得一條條分開咗先~唔係痴埋一齊就好難炒得好呢~炒嗰時記得火要大~鑊要熱~咁先會炒得好食架~!至於個洋蔥呢~黃師奶就鍾意食爽口d~如果鍾意食淋身~又要炒耐d~總之自己執生啦~呵呵~

材料: 牛柳250g , 洋蔥一個(切絲) , 炒河粉3碗, 老抽適量(調色)
牛柳醃料: 生抽半湯匙, 蒜茸半湯匙, 糖及生粉各1茶匙, 胡椒粉及麻油少許, 水一湯匙

STEP 1
牛柳跟醃料伴勻備用; 炒河粉先分開一條條;

STEP 2
燒紅鑊爆香洋蔥炒至軟身後拌入牛柳快炒至轉色

STEP 3
拌入炒河粉後加入老抽兜勻炒至乾身即成 (唔好炒咁耐呀!~牛肉老咗好難食)

 

 

大家可以Click入 黃師奶廚藝小百科 facebook 粉絲專頁度交流吓吖~!!!

雪梨雪耳雞蛋茶

20141006梨梨
<<雪梨雪耳雞蛋茶>>
呢幾日警察係咁拆路障?!一路拆~一路起~呢單佔中真係沒完沒了~唔知會搞幾耐呢~?!唔少鋪頭都話捱唔住會結業~黃師奶乜都唔識~不過都感受到佔中帶黎嘅影響喇~地鉄多人咗~!啲路塞咗~~咁搞真係頭都暈~!

呢排天氣真係變得好乾燥呀~~點都要潤返下~今日黃師奶就煲咗個雪梨雪耳雞蛋茶喇~黃先生話好好味呀!~哈~聽到佢咁講~黃師奶唔駛飲都潤哂喇~~呵呵呵~~~

材料: 雪梨2個 , 雪耳2朵 , 雞蛋2隻 , 去核紅棗4-5粒 , 香棗片糖隨意 ,  水4杯

STEP 1
將雞蛋烚熟 ; 雪梨去皮去芯切件; 雪耳浸軟洗淨後剪成小塊

STEP 2
煲滾水後下雪梨 , 雪耳及紅棗再煮約30分鐘

STEP 3
下糖調味, 再下雞蛋熄火焗最少半小時即成

大家可以Click入 黃師奶廚藝小百科 facebook 粉絲專頁度交流吓吖~!!!

提子牛油蛋糕

20141007糕糕2
<<提子牛油蛋糕>>
一單佔中~搞到阿許Sir爆紅~哈~唔知道大家有冇留意?不過佢講嘢又幾搞笑~幾日間佢個粉絲專頁都50,000個like!哈~見唔少網民都學佢講嘢~真係好有趣~~!

哈~好似好耐冇整過蛋糕仔喇~有時早餐或者tea time 黃師奶都會整下蛋糕仔~得閒轉下款咁~好過食黎食去都係嗰d 嘢嘛~個cake焗嗰時已經好香好香油味~加埋少少提子~甜甜哋咁~好好味呢~!

材料: 低筋粉120g, 牛油120g, 蛋2個, 砂糖100g, 粘米粉30g, 牛奶40g,  泡打粉5g, 提子隨意

STEP 1
將低筋粉, 泡打粉及粘米粉過篩3次

STEP 2
焗爐預熱180度10分鐘

STEP 3
先將牛油打發再拌入糖打至均勻; 再拌入其他材料至中速打至變成稠身麵糊 (約4分鐘)

STEP 4
將麵糊倒入容器內再拌入提子以180度焗約30分鐘至熟透即可

大家可以Click入 黃師奶廚藝小百科 facebook 粉絲專頁度交流吓吖~!!!