黃師奶廚藝小百科

黃師奶烘培工作坊

想跟黃師奶整靚靚動物cupcake, 請即報名參加
黃師奶烘焙工作坊啦! 黃師奶烘焙工作坊

黃師奶專欄

日日煮星級「煮」廚


SalaD blog 星級blogger


點煮網推介用戶


myTaste.tw

Google+ Badge

香菇肉餅煲仔飯

20141124飯飯
<<香菇肉餅煲仔飯>>
又到星期五喇~呵~係咪好開心呢~~呢幾日天氣暖返唔少~不過到下周又會凍過~到15度~wow~~好期待呀!~~黃師奶d靚靚厚衫終於可以出場~快d凍啦~快d凍啦~

呢期黃師奶懶虫上身~整多咗煲仔飯~哈~一煲過~再烚條菜就得~呵呵~方便到呢~~d肉餅記得要加水醃呀!~等d豬肉吸唒d水~咁就唔會變鉄餅呢~黃師奶個煲鎖水~所以水份量加少咗~大家記得執生喔~~

材料: 豬柳梅約200G (叫豬肉佬揀夠肥D~一係叫佢答夠肥膏俾你啦), 冬菇10隻 , 白米2杯 , 水約 1.5杯
豬內醃料: 生抽約1大湯匙, 糖1茶匙, 胡椒粉少許, 麻油及生粉各1茶匙, 水3湯匙
冬菇醃料: 糖及麻油少許

STEP 1
豬絞肉與醃料(除水外)拌勻醃約20分鐘備用; 冬菇浸軟後去蒂切絲再跟醃料拌勻

STEP 2
將醃好嘅豬肉慢慢加入水~!之後向同一個方向攪至起膠! (可以放入個保鮮袋到撻)~記得d水要完全吸收哂喔

STEP 3
將白米洗淨; 煮滾1.5杯水後, 拌入白米蓋上蓋中火煮約2-3分鐘後開蓋轉小火煮多約4分鐘後收乾水份

STEP 4
將豬肉鋪上白飯後蓋上蓋用小火煮約7-8分鐘, 如果想要飯焦~呢個時候可以較至中火煮多2分鐘

STEP 5
熄火後不要開蓋再焗最少15分鐘~食時淋上煲仔飯豉油即可~

 

 

大家可以Click入 黃師奶廚藝小百科 facebook 粉絲專頁度交流吓吖~!!!

《歐盟豬肉.品味共享》博客分享會

 

Picture23 080
黃師奶感謝Chilli Marketing Limited嘅邀請~早前參加咗由歐盟贊助Danish Crown品牌,名為《歐盟豬肉.品味共享》博客分享會~今次舉辦地點係Donna Dolce Kitchen Studio~!

Picture23 078
今次黃師奶真係好期待呢次活動~!點解?之唔係有黃師奶最喜歡嘅RICKY CHEUNG囉~RICKY今次同大家分享咗3個主菜~而且仲整咗唔少頭盤俾大家享用TIM~~

 

Picture23 082
今次呢款歐盟贊助Danish Crown品牌嘅豬肉真係有驚喜~黃師奶平時都唔覺超市有呢款品牌嘅豬肉賣~!吖~原來係FROZEN FOOD~!但係肉味真係好濃~一D都唔鞋口~今次黃師奶真係學識咗唔少嘢呢~呵~

Picture23 081
黃師奶感謝Donna Dolce Kitchen Studio主理人 Esther同埋RICKY整咗咁多好味嘅嘢食喔~~~

 

Picture23 079
今次RICKY同我哋分享嘅主菜係鎮江排骨~同埋烤豬梅頭扒伴蘋果芥末籽汁~~能夠跟RICKY學嘢~黃師奶真係好興奮呢~呵~黃師奶覺得鎮江排骨好香濃~~而肉質好腍滑~炆完都唔會搞到D豬肉碎哂~而且好入味TIM!~

至於個豬扒~RICKY教大家先煎香豬扒~再放入焗爐到烤焗~再拌入汁料~呢個方法真係食得到Danish Crown的豬肉味道~口感腍滑~很香很香喔~!

Picture23
到最後~當然唔少得要同偶像來個合照啦~哈哈哈~~~今次活動真係好開心呢~唔止學到煮食技巧~仲認識咗Danish Crown呢個品牌~以後選擇食材又多一個選擇呢~呵呵~!

Danish Crown歐盟豬肉產品於百佳及惠康門市均有發售.
100% 於歐盟國家飼養, 屠宰及包裝
國際認可的HACCP管理體系及全球紅肉標準(GRMS)進行屠宰加工

 

 

 

 

大家可以Click入 黃師奶廚藝小百科 facebook 粉絲專頁度交流吓吖~!!!

香菇瑤柱扒豆苗

20141124菇菇
<<香菇瑤柱扒豆苗>>
黃師奶尋日一氣過追咗警界線頭3集lu~講真~黃師奶都覺得HKTV D 劇節奏快D喎!~阿黃先生仲爆喎!~話HKTV 一集講嘅嘢等如TVB 4集喎!~哈~不過點都好啦~家下有多個選擇~對大家都係一件好事呢~!

好啦~今日呢個餸~好似過年餸咁~哈~家下有豆苗賣LU!~黃師奶又好鍾意食豆苗~驚就咁炒唔夠餸~哈~就炆D冬菇瑤柱啦~再淋上豆苗~簡簡單單又好送飯~唔錯呢~!

材料: 冬菇十隻 , 薑2片, 瑤柱5-6 , 豆苗隨意
調味: 蠔油一大匙
汁料: 生抽半湯匙, 麻油及胡椒粉少許, 冰糖一小粒, 生粉一茶匙, 浸菇水大半碗 (全部拌勻)

STEP 1
將冬菇洗淨後浸軟去蒂, 浸菇水留用 (用黎調個汁料) ; 瑤柱浸軟; 豆苗洗淨後瀝乾水份

STEP 2
爆香薑片後拌入冬菇略略煎香~ 下瑤柱~再拌入蠔油後兜炒片刻; 注入汁料(浸過冬菇面)煮滾後慢火炆煮約30分鐘至收汁

STEP 3
燒熱油後拌入豆苗快手兜炒至熟再淋上冬菇瑤柱即成~

大家可以Click入 黃師奶廚藝小百科 facebook 粉絲專頁度交流吓吖~!!!

香煎鱸魚

20141026爐魚
<<香煎鱸魚>>
尋晚有冇睇台慶?!嗱嗱嗱~黃師奶真係睇都冇睇過呀!~因為..累得滯..喺梳化瞓著咗~呵~HKTV尋日又SEVER DOWN 咗喎!~黃師奶都係今朝睇新聞先知咋~希望HKTV快D整返好個SYSTEM 啦~等大家多個選擇都好呢~!

行CITY SUPER見到D鱸魚做特價~知道黃先生鍾意食~就買咗LU~~又係好簡單咁加少少調味~煎香咗就得~黃先生鍾意食~而黃師奶呢?! WELL..麻麻哋食魚~~呵呵呵~!

材料: 鱸魚半條 (我買嗰時已經係切好成魚柳)
醃料: 檸檬汁少許, 鹽及黑胡椒少許 , 橄欖油少許(總之搽勻條魚就得)  , 生粉一茶匙

STEP 1
將鱸魚與醃料拌勻( 橄欖油及生粉最後先加)

STEP 2
燒紅鑊後下鱸魚, 細火先煎香有皮一面~煎至魚肉變白色就反轉(唔好反黎反去呀~~好易出事)

STEP 3
反轉後細火煎冇皮的一面煎大約2分鐘即成

大家可以Click入 黃師奶廚藝小百科 facebook 粉絲專頁度交流吓吖~!!!

紫色頸巾

20141114巾
<<紫色頸巾>>
今朝五點又起咗身lu~點解?可能因為夜晚早咗瞓啦~套名門冇追過…十點左右就上床~~一覺瞓到五點~~本來唸住賴床賴到七點~點知真係賤骨頭~眼光光~咁就出去洗衫睇電視~呵呵~~

呢2日又涼咗~呵呵~又到黃師奶show下d手作仔~出街襯衫嘅好時候~今次呢個款係魚尾紋~點樣織出黎真係好難形容~如果真係想知就再pm問啦~

大家可以Click入 黃師奶廚藝小百科 facebook 粉絲專頁度交流吓吖~!!!

北海道牛奶雞蛋布丁


<<北海道牛奶雞蛋布丁>>
家下天氣涼咗~實在好掛住之前同班FRIEND打邊邊嘅日子~一路烚~一路吹~打完邊邊打8圈~半夜叫多個麥噹噹外賣~嘩~唔怕肥嗰下死~~呢D日子~真係好正~

黃師奶好似好耐冇整甜品咁~今日出返個布丁先~呵~呢個布丁真係滑一滑~功夫又唔多~一路食一路追劇好爽架~呵呵呵~如果唔怕貴~買北海道牛奶整啦~黃師奶覺得好味d~香好多呢~

材料: 北海道牛奶500ml, 蛋2隻, 糖50g , 魚膠片約8g, 雲呢拿香油一茶匙

STEP 1
先將150ml 的牛奶溫熱, 加入糖攪拌至溶化 (放涼 – 唔放返涼我驚d 奶滾熟咗d蛋….)

STEP 2
將魚膠片用凍浸水浸軟(軟身後隔去水份), 再坐熱水做成魚膠溶液

STEP 3
將STEP 1的牛奶加入其餘350ml 的牛奶拌勻, 再拌入雞蛋, 雲呢拿香油及魚膠溶液拌勻

STEP 4
將STEP 3 牛奶混合物隔幾次至滑身, 倒入模中雪3小時即成~

大家可以Click入 黃師奶廚藝小百科 facebook 粉絲專頁度交流吓吖~!!!

BABY RIBS

20140822豬RIB
<< BABY RIBS >>
大家有冇試睇香港電視呀?下星期就正式啟播喇~到時叫做多D選擇~總唔駛成日睇TBB呢~家下套名門黃師奶追都冇追…剩係見到阿視帝嗰韓星頭就想熄機….

哈~黃師奶成日覺得食RIBS 好似冇咩肉食咁~~唔知大家覺唔覺呢?! 黃先生呢~就鍾意食RIBS~所以黃師奶間唔時都會煮吓~呢條RIBS 喺露比餐廳賣好貴架~自己整就抵食好多呢~呵呵~

材料: BABY RIBS 一大條 , 檸檬汁 , 香草(隨意-自己鍾意加咩就咩啦)
調味: BBQ 味醬

STEP 1
BABY RIBS與醃料醃一晚備用

STEP 2
預熱焗爐180度15分鐘~~焗BABY RIBS約20分鐘即成~!~!!

大家可以Click入 黃師奶廚藝小百科 facebook 粉絲專頁度交流吓吖~!!!

五色頸巾

20141026巾巾
<<五色頸巾>>
上次同大家分享咗條女裝版頸巾~呵~今次呢個款係織俾黃先生嘅~嗱嗱嗱~個人認為呢款色幾好~襯衫唔錯~又唔會著得老餅~最難得係黃先生竟然話靚~~冇奶油~~~~~~

元寶針~
織法係針數要用3倍數=>掛一針 => 加針=>2針拼一針

大家可以Click入 黃師奶廚藝小百科 facebook 粉絲專頁度交流吓吖~!!!

蠔皇香菇炆滑雞

20141015蠔蠔雞
<<蠔皇香菇炆滑雞>>
尋日阿高音真係好勁呀!~"相逢何必曾燒衣"~~真係勁搞笑~仲要搵埋阿韋綺珊出黎~成套嘢嗰下好爆呢~唔知呢套嘢仲請咗咩人拍呢? 暫時黃師奶最鍾意睇林雪高音同埋馬里奧~呵呵呵~~

今日又出返個煲仔菜先~天時開始涼~係時候食多d煲仔菜呢~黃師奶慣咗前一晚浸定d冬菇先~咁早上炆~等到夜晚就好入味~黃先生好喜歡食~成煲清哂~呵呵~

材料: 雞1隻 , 冬菇10隻 , 薑2片, 紹酒小半碗
雞肉醃料: 鹽適量
冬菇醃料: 糖及麻油少許
汁料: 生抽約1湯匙 , 老抽半湯匙, 糖一茶匙 , 胡椒粉少許, 麻油少許, 水大半碗

STEP 1
雞與醃料拌勻醃4小時; 冬菇用醃料醃約30分鐘

STEP 2
爆香薑~拌入雞件煎香至金黃

STEP 3
再拌入冬菇炒香後灒酒

STEP 4
加汁料蓋過所有材料後煮滾轉細火炆煮約25-30分鐘至收汁 (可加生粉水埋芡) 即成~

大家可以Click入 黃師奶廚藝小百科 facebook 粉絲專頁度交流吓吖~!!!

黑糖提子麥包(米飯麵糊)

20141026黑糖提子包
<<黑糖提子麥包(米飯麵糊)>>
嘩~今日天氣真係好涼爽~~風大咗好多~~不過黃師奶想再凍d~再凍d~哈~始終冬天d衫多款過夏天衫嘛~~著衫又多配搭d~幾時都係冬天好過夏天~呵呵呵~~

好喇~個包就唔係焗燶咗~只係黃師奶加咗提子同黑糖同全麥麵粉搓咋~!有日黃師奶懶咗冇整包~喺街到買咗個包俾黃先生食~黃先生即話同黃師奶D手搓包冇得比~哈~憑佢呢句~幾累都搓包包啦~

米飯麵糊做法
材料: 1杯米 , 2杯水
做法: 用家用電飯煲按"煮飯"功能, 煮成比較稀爛嘅米飯; 放涼備用

主麵糰做法
材料: 米飯麵糊150g, 高筋粉200g, 全麥麵粉40g, 酵母6g, 黑糖40g, 牛油30g, 雞蛋一個, 牛奶50g, 提子亁隨意

STEP 1
除提子亁外, 將所有材料拌勻並搓揉至起筋; 發酵約1小時至倍大

STEP 2
排氣後再滾圓; 鬆弛15分鐘

STEP 3
搓入提子亁, 整形後再發酵約45分鐘

STEP 4
預熱焗爐180度15分鐘, 掃上蛋水焗包包約12-15分鐘即成

大家可以Click入 黃師奶廚藝小百科 facebook 粉絲專頁度交流吓吖~!!!