黃師奶廚藝小百科

<<龍蝦湯>>
聖誕節就完咗喇~呵~今日黃師奶又上返黎除下草先~!今年聖誕節黃師奶冇出去玩呀!~喺企過咋~~做咗宅女呢~唔知道大家又點過呢? 星期三就除夕喇~呵~咁快又完咗一年~打工仔捱多3日又放日假~真係爽~!

嗱~今年聖誕冇出去~喺家煲咗個龍蝦湯~喺企食都可以食得好味架~唔一定出街食先得~呢個湯唔難煲架~係多少少功夫~黃先生好鍾意飲架~所以過時過節D特別日子黃師奶都會煲下~呵~大家可以喺除夕試下煲呢~呵~~~

材料: 龍蝦2隻, 西芹兩大條, 紅蘿蔔一條, 薯仔兩個, 洋蔥兩個, 蕃茄三個, 茄膏兩湯匙~百里香少少(自己鍾意用乜就用乜啦~)~魚湯六杯+清水兩杯

STEP 1
龍蝦先放尿~斬件起肉~~~再用180度焗爐焗45分鐘至香香~~

STEP 2
洋蔥去皮切絲~薯仔/紅蘿蔔/西芹/蕃茄去皮後切丁~

STEP 3
煮溶少少牛油後爆香洋蔥~加入茄膏兜勻~再拌入薯仔/紅蘿蔔/西芹/蕃茄炒香~最後放入已焗好嘅龍蝦~炒香~加入香草~~

STEP 4
再注入魚湯+水 ~~大火煮滾後再小火煲最少3個小時 ~(煲好d變咗龍蝦上湯)

STEP 5
隔去龍蝦殼~將蔬菜類食材用攪拌器打爛~~再加入適量龍蝦上湯煮至合適濃度

STEP 6
燒紅鑊後爆香少少蒜茸~拌入龍蝦肉~炒透~加入湯中煮滾即食~!!

<<蒜香排骨飯>>
今日落雨濕濕~好似仲凍咗咁~喺條街到d風真係寒寒哋呢~一起身就開著個暖爐~暖呀~暖呀~完全冇動力去郁呀~~今晚黃師奶仲要出去食飯~到時真係要著多件衫~唔係凍親就大單了~呵呵呵~

呢期天氣凍凍哋~人又懶~所以又整煲仔飯~一煲過~食完暖笠笠~水份方面黃師奶唔會落得太多~一來因為黃先生鍾意食乾身嘅飯粒~二來d排骨醃好哂~好多肉汁~太多水就搞到d飯胡口~唔好味呢~!

材料: 腩排450g , 白米2杯 , 水約 1.5杯 , 蒜茸隨意 , 辣椒絲隨意 , 生粉一茶匙及麻油適量
腩排醃料: 生抽一湯匙, 老抽少許, 糖一茶匙, 胡椒粉少許

STEP 1
腩排洗淨後與醃料醃約二十分鐘 ; 煮前再將醃好嘅腩排與少許麻油及生粉拌勻~~

STEP 2
將白米洗淨; 煮滾白米加水煮至收乾水份

STEP 3
拌入腩排及蒜茸辣椒絲後蓋上蓋用小火煮約7-8分鐘, 如果想要飯焦~呢個時候可以較至中火煮多2分鐘

STEP 4
熄火後不要開蓋再焗最少15分鐘~食時灑上煲仔飯豉油即可~

<<蒜香肉醬扁意粉>>
尋晚個頒獎典禮~呵~唔知道大家有冇睇呢? 成晚最high就係阿蔣志光拎獎~呵~真係大家都鄧佢高興~個個都企哂起身拍爛手掌呢~呵呵~我仲以為佢會即唱返首"相逢何必"tim!~~~

好喇~今日黃師奶煮意粉~其實煮意粉幾好架~碗又洗少d~一菜又唔駛炒~真係好啱黃師奶呢d懶人~d意粉記得煮好要瀝乾水份~唔係太濕的話~黃師奶覺得會影響口感呢~呵呵~!

材料: 牛絞肉隨意, 蒜茸一湯匙, 扁意粉隨意
調味料: 煙肉意粉醬, 糖一茶匙, 水小半碗

STEP 1
煲滾水後下少許鹽同油~拌入意粉大火煮熟(包裝上有講煮幾耐架~再瀝乾水份)

STEP 2
爆香少少蒜茸, 拌入牛肉炒香

STEP 3
拌入意粉醬兜勻~下少許糖同水再調味煮至杰身~

STEP 4
將醬汁淋上意粉上即成~!~!

<<洋蔥薯仔炆雞翼>>
聽日就星期四喇~新聞都講咗明早九點會清場~金鐘同銅鑼灣斷估好快變返之前一樣~!唔知聽日會唔好好亂呢~希望唔好太多人受傷啦~~表達意見有好多方法嘅~唔好搞到咁激流血就好呢~!

滑滑雞翼就個個都愛食~呵~今次加埋薯仔同洋蔥一切煮~~黃師奶好鍾意食洋蔥架~生洋蔥都好鍾意食TIM!~呵呵~不過黃先生就鍾意食腍身嘅洋蔥~今次呢煲雞翼D洋蔥又腍又甜~好好味呢~呵~

材料: 雞翼12隻 , 薯仔2個 , 紫洋蔥1個, 薑2片, 紹酒半碗
雞肉醃料: 生抽約1湯匙 , 糖一茶匙 , 胡椒粉少許, 麻油及生粉少許, 紹酒一大匙
調味: 黑胡椒隨意

STEP 1
雞翼與醃料拌勻備用

STEP 2
洋蔥去衣後切角備用~薯仔去皮洗淨切大件

STEP 3
爆香薑~將雞同薯仔略略煎香盛起~再爆香洋蔥

STEP 4
雞同薯仔回鑊後兜炒片刻後下黑胡椒再灒酒

STEP 5
加水蓋過所有材料後煮滾轉細火炆煮約15分鐘至收汁 (可加生粉水埋芡) 即成~

<<脆皮雞扒>>
HAPPY FRIDAY!~睇黎今個星期有個凍冰冰嘅周末呢~尋晚黃師奶都覺得凍咗好多~喺企開咗個暖風機~瞓咗喺SOFA到睇電視~哈~吹下吹下咁~暖笠笠~爽到呢~!

呢個雞扒黃先生又激讚架~話個皮好好味喎!哈~其實黃師奶只係張個焗爐開咗個對流風就有呢個效果呢~!咁個皮焗得乾身咗~就自然脆呢~呵呵~~不過雞皮唔健康呀!~唔好一下子食咁多~!

材料: 雞脾扒3塊
醃料: 生抽一湯匙 , 糖一茶匙 , 胡椒粉少許, 麻油及生粉少許, 紹酒一大匙

STEP 1
將雞脾扒與醃料拌勻醃約2小時備用

STEP 2
預熱焗爐180度15分鐘

STEP 3
將雞脾扒放入焗爐(開對流風)焗至熟透(約20-25分鐘-因應雞肉厚度同各人爐火不同) 即成~!