黃師奶廚藝小百科

<<臘味蒸滑雞>>
過2日就踏入2月喇~呵呵~話咁快一年又完lu!~大家呢期係咪忙辦年貨呢?! 家下去親d商場都轉哂過年裝飾~仲有過年歌tim!~不過人大咗就越來越唔鍾意過年~因為怕應酬呢…

黃師奶買咗隻雞~原本唸住炆咗佢~做煲仔菜食完暖笠笠~點知黃先生話要蒸喎!~好啦好啦~又轉玩法~口痕想食孖臘腸~咁又放埋落去蒸~蒸嗰時已經香噴噴~食嗰時d臘味油正到呢~好魔鬼喔~!

材料: 雞一隻 (斬件) , 膶腸及臘腸各一條, 薑2片
雞肉醃料: 生抽約2湯匙 , 糖一茶匙 , 胡椒粉少許, 麻油及生粉少許, 紹酒一大匙

STEP 1
臘味用熱水沖洗片刻後切片 ; 雞肉跟醃料醃約4小時備用

STEP 2
將所有材料鋪平於碟上, 煲滾水後大火隔水蒸20分鐘即成

<<蕃茄濃湯炆豬肋骨>>
今日黃師奶同大家介紹返一個開胃餸菜先~就係&lt;&lt;蕃茄濃湯炆豬肋骨&gt;&gt;~黃師奶用咗金寶湯嘅蕃茄濃湯做醬汁黎炆~炆出黎嘅豬肋骨好入味喔~味道酸酸甜甜咁~非常開胃~真係飯都可以食多 2碗呢~呢個餸菜簡單又方便~真係啱哂黃師奶呢D懶人煮~呵呵呵~~

材料: 豬肋骨約 500G, 蕃茄一個(切小件), 洋蔥半個(切絲), 薯仔一個(切小件), 糖一茶匙, 水半碗
醃料: 鹽約 1.5茶匙醬汁: 金寶湯蕃茄濃湯

STEP 1先將豬肋骨煎至金黃

STEP 2爆香洋蔥後拌入薯仔煎香

STEP 3將豬肋骨回鑊後兜炒片刻再注入金寶湯蕃茄濃湯

STEP 4拌入蕃茄後再加水蓋過所有材料後炆煮約 45分鐘再下少許糖調味即成

<<香菇紅棗蒸腩排>>
唔覺唔覺~仲有唔夠一個月就過年喇~黃師奶係時間挑走條懶筋去整下糕點~本來唸住今年唔整~點知黃先生話黃師奶整嘅糕點係最好味\(^3^)/~嗱嗱嗱~黃先生咁講~黃師奶又點可以唔整吖~辛苦D都值啦~呵~

今日又來一個簡單小菜~醃好冬菇排骨~原本唸住炆架~不過人懶~就咁蒸就算~黃師奶慣咗醃下d冬菇先煮~因為咁覺得d冬菇會再香d~加少少麻油同糖就得~唔駛加其他嘢架~呵~

材料: 腩排300g , 生粉一茶匙及麻油適量, 冬菇六隻, 去核紅棗隨意
腩排醃料: 生抽一湯匙, 老抽少許, 糖一茶匙, 胡椒粉少許
冬菇醃料: 糖及及麻油少許

STEP 1
腩排洗淨後與醃料醃約二十分鐘 ; 煮前再將醃好嘅腩排與少許麻油及生粉拌勻~~

STEP 2
紅棗浸泡(剪開少少); 冬菇浸軟後切絲再與醃料拌勻備用

STEP 3
煲滾水後將所有材料放於碟上再大火隔水蒸約10-12分鐘即成

<<煎焗加拿大牛柳(厚切版)>>
之前黃師奶去買咗塊牛柳~好厚身架~大約1.5寸~黃師奶用中大火煎封2面大約2分鐘到啦~之後就放入個180度焗爐焗多5-6分鐘~想牛扒好食~就要rest一陣~焗好用錫紙包好~放喺熱碟到rest多最少5分鐘黃先生讚好好食~juicy!~呵呵~

嗱~唔係講笑~好多肉汁架~~牛扒我哋唔會煮全熟…5成咁上下就好好味~塊牛扒買得靚~調味都唔駛用~呵呵~黃師奶加咗少少蒜鹽黑椒都好好味呢~~

材料: 牛柳一件
調味: 蒜鹽黑椒隨意

STEP 1
預熱焗爐180度15分鐘

STEP 2
爆香少少牛扒肥膏(買嗰時有送架通常), 將牛柳每邊用中大火煎約2分鐘

STEP 3
將牛柳用180度火焗大約5-6分鐘 (如果再厚D, 可能要焗多2分鐘)

STEP 4
將焗好的牛柳用用錫紙包好~放喺熱碟到rest多最少5分鐘即成

<<南乳粗齋>>
HAPPY FRIDAY!~哈~大家唔知有冇再追J2播嘅星星呢~黃師奶有朋友仔家下先開始睇~從此就迷上喇~一早叫你哋睇架啦~又話唔睇~家下遲睇遲享受呀~~~

今日黃師奶炆粗齋~呵~~加咗南乳一齊炆~好香好香喔~見屋企有娃娃菜~加埋落去~呢碟餸好好送飯喔~~黃師奶用開d南乳係喺銅鑼灣有利買架~好嘢黎~大家有機會試下吖~

材料: 冬菇六隻, 炸支腐四両, 雲耳4朵(浸軟切小片), 豆卜六個, 娃娃菜2棵(切碎) , 粉絲一束, 薑兩片
冬菇醃料: 麻油及糖少許
調味料: 南乳一磚, 紹興酒兩湯匙

STEP 1
冬菇先浸軟去蒂同醃料醃約二十分鐘備用; 粉絲及雲耳浸軟; 其他材料洗淨

STEP 2
炸腐竹/豆卜用熱水沖洗刻; 豆卜再界十字(咁會吸味D)

STEP 3
燒紅鑊後下油~爆香薑片~拌入冬菇炒香~~再加上其餘材料(粉絲除外) 後下南乳兜勻~注入半碗水(我用浸菇水)炆煮約三十分鐘~最後拌入粉絲煮滾即成