黃師奶廚藝小百科

黃師奶嘅孕程行到一半喇~!感恩~~!! 黃小B一切健康~同黃師奶母嬰平安~! 家下反胃情況已經好咗唔少~雖然間中仲係胃頂頂咁~不過都舒服咗好多喇~!

願黃小B繼續快高長大~黃師奶就繼續食食食~~黃小B要努力喔~!DADDY MUMMY 期待與你見面呀!~LOVE YOU!~~~

<<薑蔥龍蝦>>
今日係大年初五~黃師奶喺到祝大家羊年大吉大利~個個身體健康~心想事成~~小朋友就讀書叻叻~大人就搵多d~賺多d~呵呵呵~話明過年~咁呢幾日緊係食好d~哈~其實呢2隻龍蝦唔貴架~反而年三十晚就貴到飛起~尋日買就抵食好多~黃師奶用咗啲薑蔥蒜黎煮~又香又鮮味呢~呵呵呵~過年食龍蝦~大家都開心笑哈哈~~~

材料: 龍蝦一隻, 蒜茸隨意, 薑六-八片, 蔥段隨意, 紹酒半碗

STEP 1
龍蝦放尿斬件洗淨

STEP 2
爆香薑片, 蒜茸及少許蔥白後拌入龍蝦炒香

STEP 3
灒酒後兜勻蓋上蓋焗約3-5分鐘

STEP 4
再下蔥段兜勻即成~!

<<羊年 – 芋蝦>>
今日已經係年廿八~大家執好咗間屋未呢?!黃師奶間屋呢~well!~~~不嬲都咁乾淨~執唔執都咁上下架喇~呵呵呵~~今日出返個芋蝦先~阿黃先生食咗頭一日~話喉嚨痛喎…真係激鬼死~~

~嗱~其實整芋蝦一D都唔難~不過係煩囉~~~將D芋頭刨咗絲~加少少鹽~糯米粉同埋沾米粉拌勻就得架喇~!~黃師奶為咗加少少香味~~仲落咗五香粉同埋少少紹酒TIM!~炸嗰時用打邊爐嗰喱裝住~咁就個個芋蝦都好靚仔囉~!

材料:芋頭550G, 沾米粉約1.5個湯匙 , 糯米粉約1.5個湯匙 , 鹽及五香粉少少 , 紹酒一茶匙

STEP 1
芋頭洗刨去皮刨絲~

STEP 2
芋頭絲加埋其他材料拌勻

STEP 3
燒熱油後轉細火~炸至金黃盛起隔去油份即成~!

<<羊年 – 年糕>>
好喇~又到年糕時間~黃師奶呢底係椰汁年糕~~香濃椰汁味~~口感好滑好煙un架~呵呵呵~嗱嗱嗱~三款款點已經出哂blog 喇~唔知道大家動手整未呢?! 今日係年廿五~黃師奶喺到同大家拜過早年~祝大家羊年豐衣足食~日日富足喔~!

材料: 棷漿 420 ml , 糯米粉 240g , 澄麵粉 60g , 糖190g , 橄欖油 3茶匙 , 色素(紅色2滴 及黃色2滴)

STEP 1
將粉類篩2次

STEP 2
慢火溫熱棷漿, 拌入糖煮至溶化

STEP 3
將有糖棷漿與粉類拌勻至無粉粒, 注入橄欖油拌勻. 再將粉漿篩3次 (咁會更滑)

STEP 4
盛起少部份粉漿(黃色約三湯匙 / 紅色約半碗), 加入食用色素拌勻

STEP 5
模具掃油, 先將有色的粉漿倒入大火蒸約3分鐘

STEP 6
倒入其餘粉漿, 大火隔水蒸約30分鐘, 待涼脫模即成~!

<<羊年 – 芋頭糕>>
之前睇新聞~見到屯門又有"鳩烏"事件~其實黃師奶都鄧住喺新界北啲朋友仔慘~下下出街都咁多水貨客…黃師奶家下都怕咗去購物區~更何況住喺北區D人日對夜對~唉~~不過黃師奶覺得呢D情況冇得解決….

呵呵呵~下個星期就過年LU~黃師奶亦都開始蒸糕ING!!~~~今年頭炮出爐就係芋頭糕喇~本來黃師奶唸住今年唔整糕架~不過黃先生講過黃師奶整嘅糕點係最好食~所以又點可以唔整呢~呵呵~想知點整?!快D睇下啦~!

材料: 芋頭一斤
餡料: 半條臘肉, 一條臘腸, 一條膶腸, 6隻冬菇, 蝦米及瑤柱隨意
調味料: 一茶匙雞粉, 一茶匙五香粉, 一茶匙胡椒粉
粉漿: 粘米粉170g, 澄麵粉10g, 浸菇水2杯 (完全拌勻)
煮芋頭水: 浸菇水2杯

STEP 1
芋頭 去皮切粒; 冬菇浸軟後去蒂切粒(浸菇水留用)

STEP 2
蝦米及瑤柱浸軟; 臘肉,臘腸同膶腸用熱水沖淨後切粒

STEP 3
燒紅鑊後將臘肉,臘腸同膶腸炒香~炒到好香出油後拌入蝦米, 冬菇粒及瑤柱爆香盛起

STEP 4
原鑊拌入芋頭炒香~之後盛起一碗芋頭粒留用

STEP 5
注入2杯浸菇水後將芋頭煮至滾起 後下調味料試味~再拌入其他餡料及芋頭粒兜勻

STEP 6
拌入粉漿~不斷兜勻至收水~收水後熄水再完全拌勻所有餡料

STEP 7
將器皿掃油後拌入餡料鋪平, 大水隔水蒸約30分鐘後即成~