黃師奶廚藝小百科

<<焗薯茸>>
呢2日都雨粉粉~下星期又要再濕過~真討厭~!唔知道大家有冇追套天眼呢~今晚就大結局喇~尋晚睇嗰時已經感覺會爛尾~下星期新嗰2套一d都唔期侍…希望亞視執快d~等港視上場有多d嘢睇啦~

哈~黃先生有讚過黃師奶整嘅薯茸美味架~呵呵~其實薯茸係好食架~整咗個薯茸~真係飽到飯都唔駛煮呀!~要個薯茸夠香就加牛油~想再滑d就加鮮奶~焗到金黃就食得~簡單又方便呢~!

材料: 焗薯2個, 牛奶約4湯匙(室溫) , 鹽隨意 , 有鹽牛油40g(室溫)

STEP 1
焗薯~去皮~煲滾水後煮至腍身~盛起瀝乾水份~~再匙壓成蓉

STEP 2
將薯蓉拌入牛油至完全拌勻~再慢慢注入牛奶再調味攪拌至無粉粒~

STEP 3
焗爐預熱230度15分鐘~~焗約10分鐘至薯蓉金黃即成~!

<<蒜辣雞扒>>
好耐~一年一度嘅電影節又開始咗~黃師奶又步入怨婦日日食自己嘅日子~呵~~今年唔同往年喇~家下有咗黃小B~總唔能夠食得太頹~黃師奶會繼續晚晚煮一條友飯~WELL…我唔食..個B要食嘛~哈哈哈~~~

今日又黎個懶人雞扒餐~哈~黃先生除咗鍾意食厚切豬扒~雞扒佢都好like 食架~呢期黃師奶想方便煮就梗係焗啦~焗前再加多少少蒜茸同辣椒~好惹味呀!~焗到個皮金黃香口就食得~好方便呢~呵呵呵~!

材料: 雞脾扒3塊, 蒜茸及椒絲隨意, 黑椒少許
醃料: 生抽一湯匙 , 糖一茶匙 , 胡椒粉少許, 麻油及生粉少許, 紹酒一大匙

STEP 1
將雞脾扒與醃料拌勻醃約2小時備用

STEP 2
預熱焗爐180度15分鐘

STEP 3
將雞脾扒灑上蒜茸, 黑椒及椒絲再放入焗爐(開對流風)焗至熟透(約20-25分鐘-因應雞肉厚度同各人爐火不同) 即成~!

<<蒜茸蒸腩排>>
天氣實在好和暖~今日黃師奶就咁著咗件中袖算~哈~爽呀!~~尋日著咗件長袖~可能件衫有d厚身~搞到成日熱到cc下~不過好似星期日又涼返少少~呢個天氣真係玩c人~好易病~大家要小心喔~

家下人懶~煮飯真係求奇咗~蒸餸就最方便~買咗排骨返黎~~雖則黃先生愛豉汁蒸~不過有時要轉下架嘛~今次加咗蒜茸椒絲~辣辣哋咁幾惹味架~如果大家唔怕口氣大~加多d蒜茸仲正~哈~

材料: 腩排/飛排三十蚊,生粉一茶匙及麻油適量, 辣椒隨意 , 蒜茸1大湯匙
醃料: 生抽一湯匙, 老抽少許, 糖一茶匙, 胡椒粉少許

STEP 1
腩排/飛排洗淨後與醃料醃約二十分鐘~~

STEP 2
將醃好嘅腩排/飛排與少許麻油~~~及生粉拌勻~~蒸前再拌入蒜茸同辣椒絲

STEP 3
煲滾水後大火隔水蒸約12分鐘至熟

已經踏入23 weeks!!! 黃師奶已經重咗7磅喇~~~家下黃小B嘅胎動明顯咗好多!!每一下胎動都令黃師奶覺得好幸福呢~~~反胃情況已經改善咗好多好多lu!~~黃師奶家下均衡飲食~~冇係咁狂食架~~總係覺得食得太誇唔係咁好咁~

個肚喺呢2個星期突然間大咗好多~~條腰開始痛…瞓覺嗰時有抽筋…拔…黃師奶唔係好好意思叫阿黃先生按下腳..因為佢仲要有精神返工架嘛~有時太痛嗌咗出黎整醒佢又好似好衰女咁~~

希望黃小B繼續快高長大~~健健康康啦~~

<<沙嗲牛肉燴豆腐>>
今日朝早終於見返少少太陽~不過好似明天又落雨同涼返d~呢個天氣真係玩死人~但係黃師奶冇理咁多~開始清減d冬天衫去洗喇~冇計~個肚越來越大~又要買嘢同執定D位俾黃小B~家下唔執定~黃師奶驚個肚再大D冇力執呢~

今日來個好送飯嘅小菜~黃師奶覺得豆腐同好多食材都好夾架~今次就跟埋牛肉一齊煮~想惹味少少~加多少少沙嗲醬~爆香咗好惹味呢~好多人話豆腐涼~不過豆腐好高營養~得閒食下好健康架呢~!

材料: 牛柳200g, 滑豆腐一磚 , 紹酒小半碗
牛柳醃料: 生抽半湯匙, 蒜茸半湯匙, 糖及生粉各1茶匙, 胡椒粉及麻油少許, 水一湯匙
調味: 沙嗲醬1湯匙

STEP 1
豆腐切丁 ( 豆腐可於煮前灑少許鹽蒸約5分鐘再切丁, 咁D豆腐煮起上黎靚仔D~唔易爛)

STEP 2
牛柳跟醃料伴勻備用

STEP 3
爆香沙嗲醬後拌入牛肉略略兜炒片刻下豆腐後兜勻

STEP 4
灒酒後煮至收汁即成 (可加生粉水埋芡)