黃師奶廚藝小百科

<<鹹魚土魷蒸肉餅>>
尋晚睇到單90後棄嬰案新聞~真係鄧個B女慘~都唔明D人未定性就唔好生小朋友啦~生咗出黎又唔要…可憐個B女有對咁嘅父母~條路都難行過人~!希望嗰對SHORT SHORT 哋父母會生性啦~唔係個B女就慘呢~!

之前買咗舊鹹魚~哈~黃師奶將佢分咗幾餐食~今次就蒸肉餅嗰時放埋落去~黃先生就食到好滿足~話好好送飯~黃師奶呢?鹹魚呢家嘢麻麻哋~~不過睇見黃先生食得開心滿足就最幸福呢~!

材料: 豬柳梅約300G (叫豬肉佬揀夠肥D~一係叫佢答夠肥膏俾你啦), 鹹魚一小舊, 土魷一小塊
醃料: 生抽約1大湯匙, 糖1茶匙, 胡椒粉少許, 麻油及生粉各1茶匙, 水3湯匙

STEP 1
土魷浸軟後切粒; 豬絞肉與醃料(除水外)及土魷粒拌勻醃約20分鐘備用

STEP 2
將醃好嘅豬肉慢慢加入水~!之後向同一個方向攪至起膠! (可以放入個保鮮袋到撻)~記得d水要完全吸收哂喔

STEP 3
煲滾水後將豬肉鋪上碟~拌入鹹魚~大火隔水蒸約12-15 分鐘即成~!

大家可以Click入 黃師奶廚藝小百科 facebook 粉絲專頁度交流吓吖~!!!

<<泰式青咖哩豬頸肉>>
尋晚又眼光光~之前產檢問咗醫生~話黃師奶腎上腺分泌過高..所以瞓唔到喎…唉~~醫生話瞓唔到都眠下喺床到休息..唔係的話..胎盤D血行得唔好..黃小B就會唔夠營養~~真係眼光光~瞓喺床到等天光~

黃先生話黃師奶呢期轉咗玩泰菜喎!~哈~今日又煮咗個泰式青咖哩豬頸肉~!呢個餸黃先生係咁話好好味~食完飯仲覺唔夠食埋屋企D麵包送個青咖哩TIM!~呢D泰式咖哩香料包喺泰國小店有得賣架~想方便就去城市超級買~有一PACK PACK好方便~

材料: 豬頸肉約1.5磅, 上湯250-300ML, 乾蔥4粒
豬頸肉醃料: 生抽一湯匙 , 糖一茶匙 , 胡椒粉少許, 麻油及生粉少許, 紹酒一大匙
調味: 泰式青咖哩3-4湯匙
泰式咖哩香料包: 白茄子3個, 秋葵3-4條, 紅尖椒4隻(切碎), 泰國小茄子1串, 車厘茄4-5個, 羅勒及檸檬葉隨意

STEP 1
將豬頸肉與醃料拌勻醃約4小時備用; 乾蔥去衣切碎; 白茄子及車厘茄開邊; 秋葵切小塊

STEP 2
爆香乾蔥再慢火爆香青咖哩後拌入泰式咖哩香料包(羅勒及檸檬葉除外)注入上湯煮滾再調味(可因喜好下鹽)

STEP 3
拌入豬頸肉炆煮約12-15分鐘後煮至汁稠再下羅勒及檸檬葉~熄火再焗約5-8分鐘即成~!

大家可以Click入 黃師奶廚藝小百科 facebook 粉絲專頁度交流吓吖~!!!

<<蜜糖黑醋雞>>
今日仲見到太陽伯伯~聽日又應該落雨LU!~哈~星期一至五就咁好天~放假先黎落雨~真係有點兒沒趣呢~!不過家下落唔落雨都冇乜影響黃師奶架喇~因為都係喺家HEA 多~或者去附近行下~!呵呵~

近日迷上煲鬼佬煮餸~哈~今日黃師奶就整咗呢款雞件~~有少少驚鬼佬口味唔啱食~自己又改下佢~呵~可能家下成日口淡淡~呢個餸黃師奶出奇哋喜歡喎!~因為實在太開胃呢~大家不妨試下~!

材料: 雞翼及雞膇15隻, 檸檬汁半個, 檸檬皮隨意
醃料: 意大利黑醋半杯, 黃糖半杯, 蜜糖兩湯匙, 蒜茸一湯匙, 蒜鹽及黑胡椒適量, 橄欖油一湯匙

STEP 1
雞件與醃料醃最少4小時備用

STEP 2
預熱焗爐180度15分鐘

STEP 3
將雞件略略煎香後再灑上少許檸檬汁

STEP 4
將雞件用180度火焗約10-15分鐘至熟透 (睇爐火)

STEP 5
將多餘醃料煮至汁稠再淋於雞件上, 灑上檸檬皮即成~!

大家可以Click入 黃師奶廚藝小百科 facebook 粉絲專頁度交流吓吖~!!!

<<蒜焗雞翼>>
今日呢個天氣真係好爽呀!~~潮濕咗咁多日~嘩~太陽伯伯終於出黎喇~仲要加埋個咁乾爽嘅天氣~真係好舒服呢~!精明嘅黃師奶就係咁洗衫啦~!哈~遲下等到5月~就會開始幫黃小B洗衫~洗呀洗呀~執呀執呀~真係有排忙呢~!

又開焗爐焗~哈~冇計啦~個肚越來越大喇~真係食簡單D就算~!~用D醃好咗嘅雞翼加少少蒜茸同黑椒一齊焗~香呢~雞皮焗到好香口~不過黃師奶好節制架~塊皮盡量都唔食呢~呵呵~!

材料: 雞翼10隻, 蒜茸隨意, 黑椒少許
醃料: 生抽一湯匙 , 糖一茶匙 , 胡椒粉少許, 麻油及生粉少許, 紹酒一大匙

STEP 1
將雞翼與醃料拌勻醃約2小時備用

STEP 2
預熱焗爐180度15分鐘

STEP 3
將雞翼灑上蒜茸及黑椒再放入焗爐(開對流風)焗至熟透(約15-20分鐘) 即成~!

大家可以Click入 黃師奶廚藝小百科 facebook 粉絲專頁度交流吓吖~!!!

<<香辣豬頸肉>>
一連5日嘅EASTER HOLIDAY又完咗LU~呢5日天氣真係好好~不過就熱咗少少喇~但係今日一覺醒來~又涼返唔少喎!~呢個天氣真係變得好快~大家出門要拎件外套~免得著涼呢~!

今日來個豬頸肉~簡單又好味~想惹味少少~黃師奶將醃好嘅豬頸肉再加多少少黑胡椒同埋辣椒~呵呵~~黃先生話好好味喎!~仲話出街食嗰D豬頸肉得少少~自己整就可以大大塊~爽D呀食得~!

材料: 豬頸肉3塊, 椒絲隨意, 黑椒少許
醃料: 生抽一湯匙 , 糖一茶匙 , 胡椒粉少許, 麻油及生粉少許, 紹酒一大匙

STEP 1
將豬頸肉與醃料拌勻醃約4小時備用

STEP 2
預熱焗爐180度15分鐘

STEP 3
將豬頸肉灑上黑椒及椒絲再放入焗爐(開對流風)焗至熟透(約15-20分鐘-因應豬頸肉厚度同各人爐火不同) 即成~!

大家可以Click入 黃師奶廚藝小百科 facebook 粉絲專頁度交流吓吖~!!!