黃師奶廚藝小百科

黃師奶烘培工作坊

想跟黃師奶整靚靚動物cupcake, 請即報名參加
黃師奶烘焙工作坊啦! 黃師奶烘焙工作坊

黃師奶專欄

日日煮星級「煮」廚


SalaD blog 星級blogger


點煮網推介用戶


myTaste.tw

近期迴響

Google+ Badge

酥炸雞件

20150622雞雞
<<酥炸雞件>>
尋日睇新聞~真係覺得千奇百趣~政總嗰邊清場~竟然有個雙程証男人唔肯走~仲大大聲話自己要喺香港行乞~之後仲要打人~最爆係佢逾期居留TIM~真係冇唸到清清吓清咗個咁嘅人出黎…

今次真係好熱氣~哈~炸雞喎~其實黃師奶好少可炸嘢架~因為用得油多嘛~呵呵~其實呢個雞件好易做~雞肉醃好後上蛋白同埋蕃薯粉~之後就炸至金黃就得呢~!想炸物香口酥脆D的話~記得炸2次呀!~咁口感真係好大分別呢~

材料: 雞脾扒2塊 (切小件)
醃料: 生抽一湯匙 , 糖一茶匙 , 胡椒粉少許, 麻油及生粉少許, 紹酒一大匙
炸漿: 蛋白及蕃薯粉適量

STEP 1
雞肉與醃料醃約4小時備用

STEP 2
將雞件上炸漿

STEP 3
燒熱2杯油後下雞件炸至金黃盛起; 隔2分鐘後將雞件回鑊再炸至少少香口即成 (食時可以曬上椒鹽)

大家可以Click入 黃師奶廚藝小百科 facebook 粉絲專頁度交流吓吖~!!!

冬瓜露

20150622冬瓜露
<<冬瓜露>>
冇啦啦一號風球~仲要吹到冇雷公咁遠~不過落咗幾日雨~即時涼返好多呢~!舒服唔少喔~!不過放假先黎落雨~相信唔少打工仔都幾沒趣~不過黃師奶呢就鍾意落雨天~因為咁熱好辛苦呀!~~~~~

呢2個星期實在太熱喇~見黃先生有時返到家都話熱~咁黃師奶就煲咗冬瓜露放雪櫃~咁有時喺家飲吓~消下暑唔錯架~~呢個冬瓜露做法好簡單~天時暑熱~大家不妨試下呢~!

材料: 冬瓜2斤, 開水6杯, 片糖隨意

STEP 1
將冬瓜去皮切件

STEP 2
煲滾水後拌入冬瓜細火煮約2小時, 之後將冬瓜盛起再打成茸

STEP 3
將冬瓜茸再拌入STEP 2煮好嘅冬瓜水中, 拌勻後下糖調味再雪凍即成

大家可以Click入 黃師奶廚藝小百科 facebook 粉絲專頁度交流吓吖~!!!

芝士蛋糕

20150519芝士餅
<<芝士蛋糕>>
嘩~熱到溶呀真係~~喺屋企唔郁都覺得熱呀!~~呢個天氣真係出一出街變水人~大家真係要小心身體~提防中暑呀~~黃師奶都真係頂唔順呢個天氣喇~不過又冇理由冷氣長開~好驚爆炸呀!~所以好多時都去咗樓下商場CLUB HOUSE到過日晨~~WELL…好阿婆咁…

今日出返個甜品先~黃先生愛食厚實實嘅芝士蛋糕~呵~今日黃師奶就整咗俾佢喇~焗嗰時就坐住水黎焗~咁個蛋糕面就唔會爆開~焗得都好靚仔架~自己整糖份可以調節吓~!冇咁HEAVY~呵呵呵~~

材料: CREAM CHEESE 250G , 砂糖70G , 雞蛋2隻, 粟粉15G , 檸檬汁少許, 牛奶80G , LUM酒一茶匙 (全部材料要室溫)
餅底: 消化餅碎100G , 牛油溶液50G

STEP 1
將消化餅碎跟牛油溶液拌勻, 鋪在蛋糕模底部再放入雪櫃備用

STEP 2
預熱焗爐160度15分鐘

STEP 3
將CREAM CHEESE跟砂糖用電動打蛋器攪拌至混合滑身; 再慢慢加入雞蛋液再完全拌勻

STEP 4
再分次加入檸檬汁, 粟粉, 牛奶及LUM酒~每次加入後都需要將蛋糕漿拌勻

STEP 5
將STEP 4蛋糕漿倒入模中, 再坐熱水放入焗爐焗一小時即可 (如果想個面燶D, 就最後10分鐘較到個焗爐180度啦)

大家可以Click入 黃師奶廚藝小百科 facebook 粉絲專頁度交流吓吖~!!!

黃小B超聲波相~

IMG_0568
尋日又返咗去做檢查喇~呵呵~又見到可愛嘅黃小B~家下黃小B有5磅多~~見到黃小B喺黃師奶個肚腩到都好迫吓~醫生話頭仔已經轉咗落去~不過唔係FACE IN~都係嗰句~冇所謂啦~~

呢張相都應該係水尾相喇~因為醫生都話差不多時候~隨時生得喇~走佬袋執好咗~衫仔洗好哂~只係床仔未安咋~!

黃小B~DADDY MUMMY 好快見到你真人~好期待~~而黃師奶亦都好快唔駛望住D超聲波相傻笑~因為有你呢個小公主真人睇~呵呵~

大家可以Click入 黃師奶廚藝小百科 facebook 粉絲專頁度交流吓吖~!!!

蝦乾豬肉扒豆腐

20150608豆腐蝦米
<<蝦乾豬肉扒豆腐>>
MERS呢單嘢真係搞到家下人心惶惶~!亦因為呢單嘢~搞到黃師奶對D韓國人嘅印象差咗好多呀!~~又話上堂用MASK就係冇禮貌…嗰個惠洲韓國人仲好似唔覺自己有問題咁周圍去~~經過今次呢件事~真係睇幾多韓劇都改變唔到對韓國人嘅壞印象~!

今日又來個好送飯菜式~加咗少少蝦乾同埋豬肉一齊煮~黃師奶就將D蝦乾切碎咗黎炒~哈~因為想食粒粒餸~D 材料碎哂咁方便送飯嘛~D豬肉煮好哂收汁就淋上豆腐食得~好方便~啱哂黃師奶呢D懶人~!

材料: 蝦乾十隻(切碎), 豬絞肉(半肥瘦)十蚊, 豆腐一磚
豬絞肉醃料: 生抽半湯匙 , 糖一茶匙 , 胡椒粉少許, 水1.5湯匙 , 麻油及生粉少許 (呢2樣可以煮之前先落)
調味: 蠔油一湯匙, 紹酒小半碗

STEP 1
煲滾水後將豆腐蒸至熟透

STEP 2
爆香蝦乾後拌入豬絞肉兜炒片刻後下蠔油調味, 灒酒後蓋上蓋煮至熟透

STEP 3
將熟透嘅豬肉淋上豆腐上即成

大家可以Click入 黃師奶廚藝小百科 facebook 粉絲專頁度交流吓吖~!!!

黃師奶孕照

Mrs Wong 60182810-070-編輯
呵呵呵~嗱~又來張終極性感相俾大家睇下~黃師奶好鍾意呢張相呀!~其實呢執相都影咗唔少張架~不過我個黃先生怕醜~無謂要佢出鏡啦~呵呵呵~黃小B~~媽咪好期侍我哋張一家三口相呢~~! LOVE YOU~~~

大家可以Click入 黃師奶廚藝小百科 facebook 粉絲專頁度交流吓吖~!!!

蒜香手撕雞

20150608手撕雞雞
<<蒜香手撕雞>>
又到星期一~今日黃師奶又忙咗成個下午~因為又要走去覆診LU!~~搞到成六點先返到屋企~真係累C我~~尋晚黃師奶又冇覺好瞓~所以今朝又冇出去買餸~加上剛剛先返到屋企~今晚都係等黃先生返黎落街食算~懶到爆~!

今日來個手撕雞~哈~不過黃師奶呢款手撕雞唔係凍食架~因為大住肚廢事食冷盤啦~而黃先生亦都成日話怕肥~所以我哋冇食要D雞皮架~D雞都冇專登浸冰水~不過呢個手撕雞幾好味~唔怕口臭的話~可以加多D蒜茸~呵呵呵~!

材料: 雞脾扒2塊
醃料: 鹽隨意
醬汁: 蒜茸2湯匙, 甜豉油約2湯匙, 熟油一湯匙, 辣椒絲隨意 (拌勻)

STEP 1
雞脾扒與鹽醃約4小時備用

STEP 2
煲滾水後拌入雞脾扒大火煮約3分鐘再浸約20-25分鐘至熟; 放涼拆絲

STEP 3
將醬汁跟雞肉拌勻即成

 

大家可以Click入 黃師奶廚藝小百科 facebook 粉絲專頁度交流吓吖~!!!

銀魚仔蒸排骨

20150601排骨
<<銀魚仔蒸排骨>>
啱啱聽收音機話嗰個"12歲"懷仔要求返大陸喎!~好似成場戲咁~~黃師奶對呢單嘢感覺好陰謀論咁~衰D唸~可能今日返去~聽日就批返張單程証落黎~~如果批咗俾佢~實大把人冇啦啦出黎話咪埋咗幾年…

早前買咗D銀魚仔~用黎送飯咁幾好架~今日就蒸排骨~順便又加少少落去蒸啦~!味道唔錯又好送飯喎!~煮肉餅嗰時放D落去蒸都好好味架~大家有機會試下啦~!

材料: 腩排/飛排三十蚊,生粉一茶匙及麻油適量, 銀魚仔隨意
醃料: 生抽一湯匙, 老抽少許, 糖一茶匙, 胡椒粉少許

STEP 1
銀魚仔浸水約20分鐘; 腩排/飛排洗淨後與銀魚仔跟醃料醃約二十分鐘

STEP 2
將醃好嘅腩排/飛排與少許麻油~~~及生粉拌勻

STEP 3
煲滾水後大火隔水蒸約12分鐘至熟

大家可以Click入 黃師奶廚藝小百科 facebook 粉絲專頁度交流吓吖~!!!

南乳素菜

20150601素素
<<南乳素菜>>
日日都又濕又焗~天氣真係好惡頂呢~~打埋呢篇BLOG~黃師奶又差不多時候要出門口喇~呵呵~因為今日要去做檢查喇~孕期已經到尾聲~檢查會密好多~心情又開始緊張~呵呵~~

呢期天氣差~D菜好貴呀!~所以今日冇炒菜~炆個上素算~用咗南乳炆~好香好香~加多個粉絲~吸哂D汁咁好正呢~!黃師奶覺得呢個餸好好送飯~大家不妨一試呢~!

材料: 冬菇六隻, 炸支腐四両, 豆卜六個, 草菇7-8隻 , 粉絲一束, 薑兩片
冬菇醃料: 麻油及糖少許
調味料: 南乳一磚, 紹興酒兩湯匙, 糖2茶匙

STEP 1
冬菇先浸軟去蒂同醃料醃約二十分鐘備用; 草菇汆水備用

STEP 2
炸腐竹/豆卜用熱水沖洗刻; 豆卜再界十字(咁會吸味D)

STEP 3
燒紅鑊後下油~爆香薑片~拌入冬菇炒香~~再加上其餘材料(粉絲除外) 後下調味料兜勻~注入半碗水(我用浸菇水)炆煮約三十分鐘~最後拌入粉絲煮滾即成

大家可以Click入 黃師奶廚藝小百科 facebook 粉絲專頁度交流吓吖~!!!