黃師奶廚藝小百科

黃師奶烘培工作坊

想跟黃師奶整靚靚動物cupcake, 請即報名參加
黃師奶烘焙工作坊啦! 黃師奶烘焙工作坊

黃師奶專欄

日日煮星級「煮」廚


SalaD blog 星級blogger


點煮網推介用戶


myTaste.tw

Google+ Badge

舊日文章

星洲炒米

20151008米米
<<星洲炒米>>
周末快樂喔!~~天文台話一陣會返涼~明天得返21度咋~!!實在太令人興奮喇~希望可以KEEP 住涼落去啦~!!因為呢個夏天好似好長好熱咁~得返20度呢D天氣係最舒服架~乾爽D~又冇咁濕~正好多呢~!

今日好懶呀~就咁炒粉麵算~!一碟過~碗都洗少隻~!方便好多呢~!!黄師奶今次隻咖哩粉估唔到都幾辣喎!~下次煮嗰時真係唔好加太多~~哈~你知啦~食得太辣~咁我個黃小B咪要食辣辣媽媽奶囉~~~!

材料: 米粉250G , 叉燒半斤(切絲), 青椒紅椒隨意(切絲), 蛋2隻, 蝦仁(去腸)隨意, 洋蔥1個(切絲)
調味: 咖哩粉隨意( 睇下自己食得幾辣啦), 黃薑粉1-2茶匙. 鹽少許

STEP 1
煲滾水後將米粉煮1分鐘後盛起瀝乾水份 (根據返包裝上煮法啦); 蝦仁用少許胡椒調味

STEP 2
拌勻蛋汁後煎蛋皮再整碎盛起; 蝦仁炒至七成熟盛起

STEP 3
爆香洋蔥絲後下米粉再下調味兜勻(如果覺得太乾, 可以加小半碗水再不斷兜炒)

STEP 4
拌入青椒, 紅椒. 蛋皮, 叉燒及蝦仁兜勻至乾身, 下少許鹽調味即成~!

大家可以Click入 黃師奶廚藝小百科 facebook 粉絲專頁度交流吓吖~!!!

蒜香花甲粉絲煲

20151008蜆蜆
<<蒜香花甲粉絲煲>>
今早天氣好好呢~而黃師奶亦都精神超正~點解?之唔係黃小B由尋晚9點食完媽媽奶後又乖乖一覺瞓到今朝5點半呢~呵呵~嗱~唔好似為5點半好早呀~因為黃小B係6點食第一轉奶架~黃師奶家下份奶媽工作係朝六晚九架~嘩哈哈哈~~~

嗱~今日呢個煲仔菜~真係簡單到爆~因為蜆肉已經有好多鮮味嘅蜆汁~加埋D粉絲~~吸哂D汁~真係好好味喔~!!想再香D又加咗蒜茸~哈~鍾意食辣嘅朋友仔可以加少少辣椒TIM 呢~!

材料: 花甲一斤, 粉絲一束, 蒜茸隨意

STEP 1
花甲用鹽水浸泡最少3小時; 粉絲浸軟

STEP 2
將粉絲墊於煲底後再放上花甲及蒜茸後蓋上蓋開火煮至蜆肉開口再拌勻即成

大家可以Click入 黃師奶廚藝小百科 facebook 粉絲專頁度交流吓吖~!!!

3個月大喇~!

12118986_977267135648311_2908448760565441414_n 12074710_977267088981649_4172321541552674962_n
哈~今日黃小B終於3個月大喇~!!黃師奶就覺得黃小B真係大個左好多~!比起初初好玩咗~家下喺黃小B面前扮下鬼臉~呢隻傻豬就會好開心咁笑呢~!見黃小B有時想伸手去摸下D鈴鈴咁~不過當然就未夠力啦~哈~~至於轉身呢~都仲未識~見佢都係成舊飯咁~!!

而黃師奶呢~都好佩服自己架~冇工人~冇長老幫手咁湊咗黃小B 3個月~~家務照做~!飯照煮~!每日真係好累架….因為黃小B好多時半夜仲會醒下~長期唔夠瞓真係好辛苦~不過為咗個囡~幾辛苦都冇所謂~!呵呵呵~~

大家可以Click入 黃師奶廚藝小百科 facebook 粉絲專頁度交流吓吖~!!!

XO醬炒牛柳

20150906XO牜
<<XO醬炒牛柳>>
今朝天又好似冇咁熱喎!~不過黃小B好似係個大汗B咁~一唔開冷氣個身就濕笠笠….家下D小朋友真係識嘆~!黃師奶以前細個邊有得嘆冷氣吖~!!不過唔開俾黃小B~佢瞓覺嗰時又好唔林咁….又驚佢生熱痱~!真係煩~

又到清下雪櫃醬料嘅時間呢~呵~買咗少少牛肉~又想食得惹味D~咁就用個XO醬啦~~爆香咗XO醬先~~加入牛肉快炒~黃師奶又唔想D蒜茸太燶~到最後先落蒜茸兜勻就上碟~呢個小菜真係快靚正喔~!

材料: 牛柳300g, 蜜豆半斤
牛柳醃料: 生抽半湯匙, 蒜茸半湯匙, 糖及生粉各1茶匙, 胡椒粉及麻油少許, 水一湯匙
調味: XO醬1大匙

STEP 1
蜜豆去筋洗淨後汆水片刻再瀝乾水份; 牛柳跟醃料伴勻備用

STEP 2
爆香XO醬後下牛肉略略兜炒片刻後盛起~!拌入蜜豆炒透後將牛肉回鑊; 加入蒜茸後兜炒至熟透即成

 

大家可以Click入 黃師奶廚藝小百科 facebook 粉絲專頁度交流吓吖~!!!