黃師奶廚藝小百科

黃師奶烘培工作坊

想跟黃師奶整靚靚動物cupcake, 請即報名參加
黃師奶烘焙工作坊啦! 黃師奶烘焙工作坊

黃師奶專欄

日日煮星級「煮」廚


SalaD blog 星級blogger


點煮網推介用戶


myTaste.tw

近期迴響

Google+ Badge

猴年 – 芋頭糕

20160118芋芋糕
<<猴年 – 芋頭糕>>
天氣真係怪~早嗰幾日天氣凍到2-3度~搞到要開暖爐~呢幾日呢?!嘩~好似大地回春咁….濕到爆…即變咗長開抽濕機…怪到暈…仲有十日到就過年..唔知道到時咩天氣呢?!

今日來個芋頭糕先~!芋頭糕D功夫就簡單好多~切芋頭點都好過刨蘿蔔吖~!呵呵~~煎香咗做早餐~加少少辣醬好好味呢~!大家都整返D黎應下節啦~!

材料: 芋頭一斤
餡料: 半條臘肉, 一條臘腸, 一條膶腸, 6隻冬菇, 蝦米及瑤柱隨意
調味料: 一茶匙雞粉, 一茶匙五香粉, 一茶匙胡椒粉
粉漿: 粘米粉170g, 澄麵粉10g, 浸菇水2杯 (完全拌勻)
煮芋頭水: 浸菇水2杯

STEP 1
芋頭 去皮切粒; 冬菇浸軟後去蒂切粒(浸菇水留用)

STEP 2
蝦米及瑤柱浸軟; 臘肉,臘腸同膶腸用熱水沖淨後切粒

STEP 3
燒紅鑊後將臘肉,臘腸同膶腸炒香~炒到好香出油後拌入蝦米, 冬菇粒及瑤柱爆香盛起

STEP 4
原鑊拌入芋頭炒香~之後盛起一碗芋頭粒留用

STEP 5
注入2杯浸菇水後將芋頭煮至滾起 後下調味料試味~再拌入其他餡料及芋頭粒兜勻

STEP 6
拌入粉漿~不斷兜勻至收水~收水後熄水再完全拌勻所有餡料

STEP 7
將器皿掃油後拌入餡料鋪平, 大水隔水蒸約30分鐘後即成~

大家可以Click入 黃師奶廚藝小百科 facebook 粉絲專頁度交流吓吖~!!!

猴年 – 芋蝦

20160118芋芋
<<猴年 – 芋蝦>>
今日暖返少少~不過黃師奶呢幾日都冇煮飯呢~天氣太凍喇~隻手一濕水~嘩~凍到爆~~二來又廢事咁凍同囡囡出去買餸~因為驚大風整病佢~倆母女咪埋喺屋企~等黃先生放工返黎買外賣~咁就過咗呢幾日~!

話哂過年~雖則功夫多~黃師奶都會應下節~整芋蝦俾黃先生食~!黃師奶用打邊爐嘅"喱"黎裝住D芋絲炸~個個圓碌碌~幾靚仔架~今次灑咗少少芝麻~WELL…不過黃先生話下轉唔好加芝麻~!!多多要求~!

材料:芋頭550G, 沾米粉約1.5個湯匙 , 糯米粉約1.5個湯匙 , 鹽及五香粉少少 , 紹酒一茶匙, 芝麻適量

STEP 1
芋頭洗刨去皮刨絲~

STEP 2
芋頭絲加埋其他材料拌勻;

STEP 3
燒熱油後轉細火~炸至金黃盛起隔去油份即成~!

 

大家可以Click入 黃師奶廚藝小百科 facebook 粉絲專頁度交流吓吖~!!!

猴年 – 千層紅棗糕

20160125紅棗糕 20160125紅棗糕2
<<猴年 – 千層紅棗糕>>
呢2日真係堅凍~!成世女都未試過咁凍咁~一落到街~D風大到呢…..家住49樓嘅黃師奶呢…成晚好似打風咁….D風聲勁到呢…而黃師奶又成晚驚囡囡凍…搞到呢2晚冇乜點瞓~!做咗人媽媽~好似鐵人咁~!

今日已經係年十六喇~仲有2個星期就過年~黃師奶亦都開始糕糕ING喇~今年第一炮來個紅棗糕先~!今次玩逐層蒸~!如果懶的話~一次過蒸係冇問題嘅~!!黃師奶想D紅棗味再出D~所以用咗香棗片糖~!大家試下啦~!

材料: 去核紅棗300G , 水 1升 , 木薯粉250 . 澄麵25G , 香棗片糖2-3片

STEP 1
紅棗洗淨後注入水後煮30分鐘, 加入香棗片糖後煮溶熄火焗約2小時 ; 將粉類拌勻

STEP 2
將紅棗輕輕按壓後隔出紅棗水約800ML ( 過篩2-3次)

STEP 3
將紅棗水跟粉類伴勻至無粉粒再過篩

STEP 4
煲滾水後先蒸第一層(每層5-6分鐘); 注入最後一層後再蒸約15-20分鐘即成~!

 

大家可以Click入 黃師奶廚藝小百科 facebook 粉絲專頁度交流吓吖~!!!

黃小B之啜手大過天~

IMG_8095
呢個豬仔~真係好鍾意啜手指呀!~~吖~~除咗玩同瞓之外~黃小B一冇嘢做就啜啜啜~如果你唔俾佢啜呢~就即喊~~大家睇下佢個樣~ENJOY 到呢~~~

囡囡家下都6個半月大LU~~磅數有大約15磅~身高就….細細粒…仲係第5條生長線~不過最緊要係健康啦~翻身呢?! well…未見過~~隻豬仔應該同佢阿媽我一樣~唔願郁~嘩哈哈~~~

 

大家可以Click入 黃師奶廚藝小百科 facebook 粉絲專頁度交流吓吖~!!!

香蒜蜆肉意粉

20160103意意
<<香蒜蜆肉意粉>>
今朝又落雨~!天氣又不太好呢~!感覺又凍咗~呢幾日唔少人都討論星期日個冷峰~~究竟香港會唔會落雪?!斷估落都係大帽山嗰到有結霜JER!~~點會落雪咁爆呀!~~

話說有日黃師奶同埋黃小B出咗街八下~見到有鑽石貝賣~$68一PACK~呵~又買咗返家LU!~屋企有意粉~咁又來個西化煮意啦~!呢款蜆雖然唔係喺街市買~不過味道都幾好~澳洲嘢~唔失禮~大家可以一試喔~!

材料: 鑽石貝500g, 扁意粉約半包, 橄欖油1大匙
調味: 蒜茸1湯匙, 黑胡椒及鹽隨意

STEP 1
鑽石貝沖洗乾淨

STEP 2
煲滾水後下少許鹽及油; 拌入意粉煮約6分鐘 (意粉包裝指示煮8-9分鐘) 盛起瀝乾水份後下橄欖油拌勻

STEP 3
燒熱少許油後將鑽石貝兜炒片刻~下調味兜炒至7-8成熟; 拌入意粉兜炒至熟透再跟自己口味略略調味即成~! (想乾身d可以將d煮意粉水加少少麵粉拌入倒入去再炒下)

 

大家可以Click入 黃師奶廚藝小百科 facebook 粉絲專頁度交流吓吖~!!!

金沙骨

20160118金沙骨
<<金沙骨>>
嘩~又一個寒冷嘅朝早喇~~今朝6點餵奶嗰陣~woo~~9度咋~~凍冰冰仲要餵媽媽奶~~d風吹入個身到嗰下~真係爽到震呀~~~~今個星期天氣仲會再凍d~~真係日日攬住黃小B取暖呀要~~~!

又來一個焗餸~!買咗金沙骨~!醃好後放入焗爐就得~!家下湊住黃小B~好多時都係焗餸就算~冇計啦~!囡囡十萬個痴身~好困身呢~!焗金沙骨前再加少少麻油生粉~又香又滑喔~!

材料: 金沙骨6條,生粉一茶匙及麻油適量
醃料: 叉燒醬2大匙, 生抽約1湯匙, 紹酒少許, 糖一茶匙, 胡椒粉少許

STEP 1
金沙骨洗淨後與醃料醃約二十分鐘 ; 預熱焗爐180度15分鐘

STEP 2
將醃好嘅金沙骨與少許麻油~~~及生粉拌勻~焗前可灑上少少黑胡椒

STEP 3
焗金沙骨約20-30分鐘即成 (各人爐火唔同~要注意喔)

 

大家可以Click入 黃師奶廚藝小百科 facebook 粉絲專頁度交流吓吖~!!!

Little Freddie Organic Baby Food

IMG_7538
話咁快~黃小B就6個月大喇~!而黃師奶亦開始俾固體囡囡食LU~!為咗黃小B嘅健康~!黃師奶就揀咗100%純天然嬰幼兒食品"Little Freddie Organic Baby Food “俾囡囡食喇~!!Little Freddie嘅蔬果泥論合4個月以上嘅嬰幼兒食用~!而且每包都係獨立包裝~仲可以坐喺暖水到翻熱~真係好方便呢~!

今次黃小B試咗Little Freddie嘅香甜軟滑嘅香蕉果泥,富含抗氧化物、類黃酮,天然纖維,為寶寶提供充足嘅能量。

從原材料到產品,Little Freddie選用的所有原材料都經過多個階段的嚴格檢測,確保安全及衛生。
不含基因改造成分
不含防腐劑或添加劑
不含添加糖或鹽
不含人工色素
不含人工香料
是100%純天然嬰幼兒食品

IMG_7790
Little Freddie美味的蔬果泥在最佳溫度下混合之後就製作成為一袋袋真空包裝的產品。
每一袋都經過密封包裝,確保不受細菌污染。
Little Freddie特別的三層包裝能有效杜絕氧氣,令產品保持新鮮和美味

Little Freddie Organic Baby Food HK

 

大家可以Click入 黃師奶廚藝小百科 facebook 粉絲專頁度交流吓吖~!!!

沖繩豬扒

20151227豬豬
<<沖繩豬扒>>
尋日同咗黃小B返健康院打半歲針~尋晚打完冇乜嘢咁~不過今朝就有少少燒LU~見佢大脾仔個針口位又紅又腫~真係心痛死~~次次同佢打完針仲有幾日好嗲咁~~~睇黎黃師奶呢幾日又有排忙…

早前黃師奶出城去咗買食材~見到有沖繩豬扒賣~又買返家試下~細細塊咁味道都唔錯~黃師奶只係用少少鹽調味再煎香2邊~~拌埋個沙律菜食~簡簡單單又一餐呢~!

材料: 豬扒2塊
調味: 海鹽

STEP 1
燒紅PANPAN~~~加少少牛油~下調味後將豬扒煎香~

STEP 2
預熱焗爐180度15分鐘~~用錫紙包好豬扒焗豬扒大約5-8分鐘即成~!~!!

大家可以Click入 黃師奶廚藝小百科 facebook 粉絲專頁度交流吓吖~!!!

黃金貝

20160103黃金貝
<<黃金貝>>
一早起身~天氣好差呢~落咗好耐雨呀!~睇黎今日都冇得黃小B出去曬下太陽~唯有喺商場兜一咁啦~!一落雨感覺好似又凍咗~聽日仲要同囡囡返健康院~最怕落雨天返去…好呢HEA 呀!~~~

喺街市見到有黃金貝賣~大鄉里嘅黃師奶未食過~阿賣魚勝叫我試下~又好啦~隻黃金貝好大隻~手掌咁大呀!!蒸嗰時要開邊~滾水落鑊3-4分鐘就食得~!味道幾鮮甜~!不過價錢唔平~試下無妨~多食就唔會呢~!

材料: 黃金貝2大隻, 蒜茸椒絲隨意

STEP 1
將黃金貝清洗乾淨後抺乾水份; 鋪上蒜茸椒絲

STEP 2
煲滾水後下黃金貝大火蒸約3-4分鐘後灒上熟油即成

大家可以Click入 黃師奶廚藝小百科 facebook 粉絲專頁度交流吓吖~!!!

蒜香大蝦意粉

20160108意意
<<蒜香大蝦意粉>>
HAPPY FRIDAY~~!今日黃師奶落去樓下嗰時~已經見到屋苑整好哂過年佈置喇~嘩~真係好鬼快~!足足提前咗一個月呀!~去到吉吉島~已經係過年D歌係咁播~!好有氣氛呢~!順便早D賺大家錢嘛~嘩哈哈~~~

今日煮意粉~~買咗D鮮蝦~見屋企又有意粉~就來個西化煮意~!黃師奶D意粉烚完後會再煮~所以烚嗰時就減咗2分鐘時間~!將D鮮蝦煎香~!加埋個意粉再炒多陣就食得~!哈~~碗都洗少2隻~爽~!!

材料: 鮮蝦半斤, 扁意粉約半包, 橄欖油1大匙
調味: 蒜茸1湯匙, 黑胡椒及鹽隨意

STEP 1
鮮蝦剪去蝦腳後去腸, 背部輕輕界開

STEP 2
煲滾水後下少許鹽及油; 拌入意粉煮約6分鐘 (意粉包裝指示煮8-9分鐘) 盛起瀝乾水份後下橄欖油拌勻

STEP 3
燒熱少許油後將鮮蝦煎香~下調味兜炒至7-8成熟; 拌入意粉兜炒至熟透再跟自己口味略略調味即成~!

大家可以Click入 黃師奶廚藝小百科 facebook 粉絲專頁度交流吓吖~!!!