黃師奶廚藝小百科

<<黑啤豬手>>
今日天氣又凍咗呢~~大家小心身體喔~!今日財政預算案~唔知道大家有冇留意呢?!黃師奶呢?!其實點都唔關我事咁~冇咩留意~都係嗰句~家下黎黎去去都係睇小朋友嘢~乜都冇理咁~哈~

今日來個一豬兩食~先將隻鹹豬手煲咗個湯~呵呵~咁再用焗返隻鹹豬手黎食~~哈~唔錯吖~其實呢款鹹豬手煲湯後都好好味~好腍~一D都唔鞋口架~大家可以一試喔~!

材料: 鹹豬手一隻
調味: 黑胡椒
醃料: 黑啤

STEP 1
鹹豬手用咗黎煲咗個蕃茄薯仔湯

STEP 2
將已煲淋嘅鹹豬手用黑啤浸最少4小時

STEP 3
預熱焗爐220度15分鐘

STEP 4
將鹹豬手灑上黑胡椒後焗至表面乾身即成

<<鮑片燴豆腐>>
又到星期五~係咪好開心呢~?!而黃師奶呢?!日日如是~星期一至日都係湊女湊女同湊女~連黃先生都話對我黎講日日都冇分別~!!即係想休息下都冇咩可能~!

話哂呢期過年~咁今日就豪一罐罐頭鮑魚啦~~將鮑魚切片~加埋豆腐用蠔油兜下就食得~用黎送飯咁幾好架~大家不妨試下呢~!

材料: 罐頭鮑魚一罐, 滑豆腐一磚 , 蒜茸少許
調味: 蠔油一大匙
汁料: 生抽半湯匙, 糖及生粉各1茶匙, 胡椒粉及麻油少許, 紹酒小半碗

STEP 1
豆腐切丁 ( 豆腐可於煮前灑少許鹽蒸約5分鐘再切丁, 咁D豆腐煮起上黎靚仔D~唔易爛); 鮑魚切片

STEP 2
爆香蒜茸拌入鮑片及豆腐丁後下蠔油兜炒片刻

STEP 3
下汁料後煮至收汁即成 (可加生粉水埋芡)

<<黑椒牛油雞>>
今日又凍咗好多~呢個天氣真係玩C人~尋日同今日可以差成10度呢~好誇張喔~!呢2日黃師奶就睇下TBB 套公公出宮~胡胡鬧鬧笑下咁~哈~有時餵奶嗰時好悶~追下劇咁易過D呢~!呵呵~!

今日買咗隻雞~又大隻又肥美~!黃師奶將雞醃好後~就放入焗爐到焗~好方便~~今次想隻雞香D~所以每焗10分鐘到就掃下牛油溶液~!咁隻雞就有牛油香味~~焗到個皮夠香就食得~好方便~!

材料: 雞一隻
醃料: 鹽及黑胡椒粉適量, 檸檬汁一大匙, 牛油溶液適量(搽勻隻雞的份量)

STEP 1
將雞洗淨後開邊, 跟醃料醃最少4小時

STEP 2
預熱焗爐220-230度, 焗雞件約40分鐘即成 (各人爐火唔同~要注意喔)

<<龍蝦意粉>>
今日大年初五~先祝大家新春大吉~!身體健康~!黃師奶一出去拜年即出事~可能太多節目~湊住囡囡又冇得休息~!搞到失守~仆咗去睇醫生~呢期好似多多人病咁~黃師奶冇嘢驚~最怕傳俾黃小B咋~!!瞓覺都戴埋口罩~~辛苦到呢…..

去街市買咗2隻龍蝦~~唔想煮中式~又想方便簡單D~就加埋個意粉啦~~好味又飽肚~!呢期人懶咗~多咗煮意粉~~因為方便過煮中菜好多~嘩哈哈~~

材料: 龍蝦一隻, 扁意粉約半包, 橄欖油1大匙, 洋蔥1個(去衣切絲), 乾蔥3個(切片), 白酒小半碗
調味: 蒜茸1湯匙, 黑胡椒及鹽隨意

STEP 1
將龍蝦洗淨放尿斬件

STEP 2
煲滾水後下少許鹽及油; 拌入意粉煮約6分鐘 (意粉包裝指示煮8-9分鐘) 盛起瀝乾水份後下橄欖油拌勻

STEP 3
燒熱少許油後爆香洋蔥及乾蔥, 拌入龍蝦後下調味兜灒酒煮至7-8成熟; 拌入意粉兜炒至熟透再跟自己口味略略調味即成~! (想乾身d可以將d煮意粉水加少少麵粉拌入倒入去再炒下)