黃師奶廚藝小百科

<<無水豉汁蒸蟶子>>
近排黃師奶都有D沒趣~有時都唔明D長老們唸乜!家下黃師奶係湊女唔係養豬呀~係咁用人哋D孫黎同囡囡比..話囡囡唔夠肥點點點..我細時都已經俾你比較得多喇~家下我下一代都要咁受你~好乞人憎~!

家下好似好興食無水蒸海鮮咁呢~今日黃師奶都玩返次無水蒸先~買咗一斤蟶子~加少少豉汁同椒絲~來一客無水蒸~食出鮮味呢~!黃先生都話無水蒸海鮮好食~睇黎以後會多D整呢~!

材料: 蟶子一斤, 蒜茸豆豉茸約2匙, 椒絲隨意

STEP 1
將蟶子清洗乾淨後抺乾水份; 鋪上蒜茸豆豉茸(可以灑上少許椒絲)

STEP 2
蓋上蓋開火蒸約4-5分鐘後灒上熟油即成

<<芝士煙肉釀大蘑菇>>
今日又凍咗好多~!真係冇唸過EASTER 都會係呢種天氣呀~!斷估凍埋呢轉~都應該唔會凍得去邊喇嘛~!!原本黃師奶仲唸住呢幾日PACK起D冬天衫去洗~點知呢個大計又要推遲LU~!

今日喺超市見到D大蘑菇賣呀~!黃先生鍾意食菇菌~咁黃師奶見到就即買啦~呢款菇價錢都唔平呀!~逐隻PACK好哂~一隻隻咁好企理~!肉身好厚~同埋好多汁~味道好好~間中食下唔錯架~!

材料: 大蘑菇3隻 , 水牛芝士及煙肉粒隨意
調味: 鹽少許

STEP 1
大蘑菇用布清潔乾淨後去蒂 ; 預熱焗爐180度15分鐘

STEP 2
將煙肉粒及芝士釀入大蘑菇中, 下少少鹽~!以180度火焗約10-15分鐘即成~!

<<Chicken Vindaloo>>
成朝都落雨~今個星期睇黎都唔太好天~~睇黎都冇得冇囡囡去公園喇~唯有落樓下商場八下算~哈~有時唸~住喺商場樓上就有呢個好處~唔駛拎遮都可以周圍八下~!

黃先生鍾意食咖哩~咁黃師奶見到有Vindaloo醬汁賣~即買返家試下~不過呢款汁唔夠辣~但係味道都唔錯~黃師奶將D醃好嘅雞扒放入焗爐就算~方便又好味呢~!

材料: 雞脾扒4塊
醃料: 鹽少許, 檸檬汁少許, Vindaloo醬汁約1.5杯

STEP 1
雞脾扒跟檸檬汁及鹽醃約1小時後再跟Vindaloo醬汁醃約2小時備用

STEP 2
預熱焗爐180度15分鐘

STEP 3
將雞脾扒焗約20-30分鐘即成 (人人爐火唔同~注意喔)

<<香煎肉眼扒>>
生女原來真係會破產~今日朋友仔話ELSA 裙仔~要成$500一條~其實只係一條有ELSA公仔的裙~質料嗰D又唔係特別好~更加唔係有機棉~都賣到咁貴~~哈~~希望囡囡大D~唔好話要扮公主啦~~

黃師奶幾時都覺得煎牛扒係懶人餐~嘩哈哈哈~~加少少調味煎一煎就食得~碗又唔駛洗~飯又唔駛煮~啱哂黃師奶呢個懶人~!

材料: 安格斯肉眼一塊 (約1KG)
調味: 海鹽

STEP 1
燒紅煎PAN, 每邊煎約3分鐘

STEP 2
將牛扒用錫箔紙包好再放喺熱碟上REST 5分鐘再灑上調味即成~!

<<蒜香牛立方意粉>>
呢家UPDATE個BLOG 嘅時間好似夜咗咁~日頭湊住囡囡真係好忙~有時佢瞓咗黃師奶行開下~佢就好似聞到我走開咗咁..即醒…搞到好多時黃師奶都要喺佢身邊咁…乜都做唔到呢~!

今日又來一個懶人意粉~哈~家下湊住囡囡真係忙咗好多~煮飯時間想短D~有時就整碟意粉算~碗又洗少D~又方便~呢個意粉用咗牛肉粒做材料~唔錯架~加少少蒜茸黑椒已經好好味呢~!

材料: 牛柳粒400G, 扁意粉約半包, 橄欖油1大匙
牛柳粒醃料: 生抽一湯匙, 蒜茸半湯匙, 糖及生粉各1茶匙, 胡椒粉及麻油少許, 水一湯匙
調味: 蒜茸1湯匙, 黑胡椒及鹽隨意

STEP 1
牛柳粒跟醃料拌勻醃20分鐘

STEP 2
煲滾水後下少許鹽及油; 拌入意粉煮約6分鐘 (意粉包裝指示煮8-9分鐘) 盛起瀝乾水份後下橄欖油拌勻

STEP 3
燒熱少許油後將牛柳粒炒香~下調味兜炒至5成熟; 拌入意粉兜炒片刻再跟自己口味略略調味即成~!