黃師奶廚藝小百科

黃師奶烘培工作坊

想跟黃師奶整靚靚動物cupcake, 請即報名參加
黃師奶烘焙工作坊啦! 黃師奶烘焙工作坊

黃師奶專欄

日日煮星級「煮」廚


SalaD blog 星級blogger


點煮網推介用戶


myTaste.tw

近期迴響

Google+ Badge

南瓜奶糊



囡囡一直都好抗拒食固體,而呢個問題亦一直令到黃師奶好煩!不過作為媽媽,為咗囡囡,點會咁易放棄吖!為咗令到啲糊仔易啲令囡囡接受,黃師奶就喺啲蔬果茸到加咗Illuma stage 2 奶奶呢!其實做法真係好簡單架咋!只要揀一款小朋友喜歡嘅蔬果,咁今次我哋就揀咗南瓜呢!首先將南瓜蒸熟再打茸,跟住就將Illuma奶奶慢慢倒入啲南瓜茸到拌勻就得呢!稀杰程度就要跟返小朋友口味喇!落奶奶時要慢慢加呀!一次過加太多就會好稀呢! 加咗Illuma奶奶後,囡囡明顯易接受咗!梗係啦!因為有囡囡最鍾意嘅奶奶嘛!小朋友愛食糊仔就自然會食多咗啦!而蔬果奶糊又有營養豐富嘅Illuma,小朋友實會快高長大呢! 剛學食固體嘅小朋友真係好啱呢個方法架!蔬果糊有奶味一定容易接受啲!到小朋友再大少少,蔬果奶糊就可以轉為小食!

大家可以Click入 黃師奶廚藝小百科 facebook 粉絲專頁度交流吓吖~!!!

蝦皮豬肉扒豆腐

20160531蝦皮豬豬
<<蝦皮豬肉扒豆腐>>
今個星期天氣睇黎唔多好~不過落下雨又冇咁焗~黃師奶反而覺得有少少雨出街仲舒服~雖然要擔住把遮~揹住個女~但係總好過大太陽嗰陣變咗水人咁~哈哈~~

又來一客好送飯~豆腐健康又好味~今次再加咗少少蝦皮~香香哋咁~黃師奶覺得唔錯~大家可以一試呢~!

材料: 豬絞肉(半肥瘦)約廿蚊, 豆腐一磚, 蝦皮隨意
豬絞肉醃料: 生抽半湯匙 , 糖一茶匙 , 胡椒粉少許, 水1.5湯匙 , 麻油及生粉少許 (呢2樣可以煮之前先落)
調味: 蠔油一湯匙, 紹酒小半碗

STEP 1
煲滾水後將豆腐蒸至熟透; 蝦皮白鑊炒香

STEP 2
將豬絞肉兜炒片刻後下蠔油調味, 灒酒後蓋上蓋煮至熟透; 再拌入蝦皮兜勻 (可加生粉水埋芡)

STEP 3
將熟透嘅豬肉淋上豆腐上即成

 

大家可以Click入 黃師奶廚藝小百科 facebook 粉絲專頁度交流吓吖~!!!

Mushrooms Risotto

20160621飯飯
<<Mushrooms Risotto>>
呢期好多人都講緊大台套嬴在起跑線~見到D家長真係覺得好誇張呀~黃師奶希望自己唔好變得咁怪獸~因為真係唔想迫DIN個女~望佢大個咗開開心心做個好人就夠呢~

今日搞搞新煮意~整咗個Risotto~!哈~黃先生話好食喎~其實好耐之前都冇煮架~不過家下湊住囡囡~煮D餸都係簡單為主~因為囡囡實在太太太痴身喇~~

材料: 意大利米約200G, 上湯約600G, 白蘑菇(切片)約1碗, 洋蔥1個(去衣切絲)
其他: 芝士牛油隨意

STEP 1
先爆香洋蔥, 再拌入白蘑菇兜炒片刻後下少許牛油炒香

STEP 2
拌入意大利米後再慢慢注入上湯(慢慢加~D米吸哂D湯又再加D咁), 其間要不斷兜炒(都要15-20分鐘)

STEP 3
最後隨意加入自己喜歡嘅芝士同牛油即成~!

大家可以Click入 黃師奶廚藝小百科 facebook 粉絲專頁度交流吓吖~!!!

蒜香牛油焗中蝦

20160621蝦蝦
<<蒜香牛油焗中蝦>>
太陽伯伯真係勁~家下出一出街~嘩~火爐咁呀~~曬到呢~~夏天家下先啱啱開始~真係唔知幾時完~~香港夏天又濕又熱~真係好惡頂呢~!

今日行過街市~見到D蝦又靚又生猛~忍唔住買咗返家~本來想來個白烚~最後呢~又唔想懶成咁~驚俾老細炸型~咁就加少少蒜茸牛油焗~哈~好香呀~海鮮只要夠新鮮~真係點煮都咁好味呢~!

材料: 中蝦約1斤
調味: 海鹽少許, 蒜茸及牛油隨意

STEP 1
將鮮蝦洗淨後去腳及腸, 再抺乾水份

STEP 2
預熱焗爐180度15分鐘

STEP 3
將鮮蝦跟調味拌勻再放入焗爐焗約10-15分鐘即成 (人人爐火唔同, 要留意喔)

大家可以Click入 黃師奶廚藝小百科 facebook 粉絲專頁度交流吓吖~!!!

我的第一個爸爸節~


吖~~今日係爸爸節~祝所有爸爸父親節快樂呢~~~呢個小情人家下識得叫爸爸~~試過一次知道爸爸喺門口敲門~就大叫巴爸~TUM得佢個巴爸幾開心吖~第一個爸爸節~今年媽媽同小情人整咗張卡仔送俾巴爸~希望巴爸鍾意啦~~呵呵呵~~~

爸爸節快樂呀~~~~

大家可以Click入 黃師奶廚藝小百科 facebook 粉絲專頁度交流吓吖~!!!

韓式醬汁厚切豬扒

20160531豬豬
<<韓式醬汁厚切豬扒>>
今日屋企冇水~!唔駛煮飯~呵呵~咁一早就同囡囡出街八一八~去咗太古行咗轉~見到有靚靚梅子賣~!之前黃先生講過想試下自己浸梅酒~咁就買咗返家試浸~遲下再同大家分享~!

黃師奶喺超市買咗支韓式豬肉汁~!支汁紅噹噹~用黎醃咗陣豬扒~嘩~煮出黎成塊都係紅色~好誇張呢~不過味道唔錯架~家下超市好多韓式醬汁賣~大家不妨一試~!

材料: 厚切豬扒2塊
醃料: 韓式豬肉醃肉汁約200ML

STEP 1
將豬扒跟醃料拌勻醃約2小時

STEP 2
將豬扒煎香後蓋上蓋煮至熟透即成

大家可以Click入 黃師奶廚藝小百科 facebook 粉絲專頁度交流吓吖~!!!

梅菜豬肉扒豆腐

20160523梅菜豬豬豆腐
<<梅菜豬肉扒豆腐>>
今日天氣都係唔好~好似都好多日未見過太陽伯伯喇~!不過亦因為咁~天氣反而冇咁熱~但係就濕濕焗焗咁~見呢期唔少人仲SHARE D 相話好多飛蟻喎~希望快D好天啦~~

豆腐真係點煮都咁好味~又好送飯喎~今日先煮咗個梅菜肉末~!本身已經夠香又好送飯~見屋企有豆腐~就加埋落去~哈~~真係好好味架~大家不妨試下呢~!

材料: 豬絞肉(半肥瘦)約廿蚊, 豆腐一磚, 梅菜隨意
豬絞肉醃料: 生抽半湯匙 , 糖一茶匙 , 胡椒粉少許, 水1.5湯匙 , 麻油及生粉少許 (呢2樣可以煮之前先落)
調味: 蠔油一湯匙, 紹酒小半碗

STEP 1
煲滾水後將豆腐蒸至熟透; 梅菜浸洗乾淨切碎

STEP 2
白鑊將梅菜兜炒片刻後拌入豬絞肉兜炒片刻後下蠔油調味, 灒酒後蓋上蓋煮至熟透 (可加生粉水埋芡)

STEP 3
將熟透嘅豬肉淋上豆腐上即成

 

大家可以Click入 黃師奶廚藝小百科 facebook 粉絲專頁度交流吓吖~!!!

豉油雞脾扒

20160531雞雞
<<豉油雞脾扒>>
端午節假日又完咗~返埋今日~又放假~呵呵~~等呀等呀~要到到七一先有LONG WEEKEND~!雖則黃師奶放唔放假都係湊女~不過好期侍黃先生放假架~可以陪下我哋嘛~!

屋企冰箱有千年豉油汁~得閒煮下雞翼雞扒咁~好方便架~今日就將個汁煮滾~再將雞扒浸熟~雞肉滑一滑~驚唔入味?黃師奶通常中午煮好~再夜晚就翻熱~~簡單又好味呢~!

材料: 雞脾扒6塊
汁料: 生抽1/2杯, 老抽1/4杯, 開水約1杯 , 紹酒1大匙,冰糖一粒, 陳皮一小塊

STEP 1
將汁料煮至大滾後拌入雞脾扒大火煮約3-4分鐘後熄火焗10分鐘至浸熟即成~

大家可以Click入 黃師奶廚藝小百科 facebook 粉絲專頁度交流吓吖~!!!

牛肝菌蒸水蛋

20160606蛋蛋
<<牛肝菌蒸水蛋>>
聽日就端午節喇~大家有冇食糭呢?黃師奶就湊住個囡實在冇手再包喇~至於食呢?!都係麻麻哋~~嘩哈哈哈~~最緊要係有日假期~同囡囡去玩就夠呢~呵呵~~

早前一田特價~黃師奶就入咗牛肝菌~黃師奶有時煮飯時加咗少少牛肝菌~咁D飯就好香好好味~今次呢~就蒸蛋時加咗少少~味道都唔錯喎~大家可以一試喔~!

材料: 牛肝菌隨意, 蛋3隻, 上湯250ml

STEP 1
牛肝菌浸軟後壓乾水份

STEP 2
先將碟蒸熱至水滾; 將牛肝菌入碟中; 蛋及上湯拌勻

STEP 3
將STEP 2 蛋汁倒入碟中後蓋錫箔紙, 大火蒸3分鐘後焗20分鐘即成~!

 

大家可以Click入 黃師奶廚藝小百科 facebook 粉絲專頁度交流吓吖~!!!

11個月大喇~!

哈~~~又1個月喇~!!!日子真係好快過咁~~話咁快又11個月大喇~!身邊嘅人見親我哋2母女都話囡囡大得好快喎~拔~對於黃師奶黎講呢~又唔覺喎~!!可能日日湊~又累啦~有時好想囡囡快D大~有時又好唔捨得咁~~!!

家下隻豬仔已經識得爬同扶住黎企喇~~唔知幾時先識行呢?!?! 黃師奶成日覺得囡囡係聽得明我講嘢架~只係仲未識得表達~家下都成日叫媽媽~~媽媽咁~真係好鬼冧~~呢隻衰豬識爬後~真係煩咗好多….好多時我走開一陣~佢就喊住咁爬過黎喇~痴身到爆~~不過又咁唸~大咗仲點會咁愛我吖~~所以家下辛苦D~都值得架~~

媽媽真係好期待你下個月一歲生日呀~~~豬仔要繼續快高長大~身體健康~!!媽媽愛你~~~!!

大家可以Click入 黃師奶廚藝小百科 facebook 粉絲專頁度交流吓吖~!!!