黃師奶廚藝小百科

<<蒜茸黑椒焗春雞>>
家下呢個天氣好舒服呀~又唔曬~又有少少風~一早同囡囡出咗去公園行下~可惜佢又唔太ENJOY…細膽到呢….唔太肯玩公園D嘢~激C我~~

今日焗春雞~哈~春雞雖然價錢貴少少~不過肉質又真係滑好多喎~今日黃師奶買左一隻返家~用少少鹽及黑胡椒粉調味已經好好味呢~大家不妨一試喔~!

材料: 雞一隻
醃料: 鹽及黑胡椒粉適量, 蒜茸少許, 檸檬汁一大匙, 牛油溶液適量(搽勻隻雞的份量)

STEP 1
將雞洗淨, 跟醃料醃最少4小時

STEP 2
預熱焗爐180度, 焗雞件約30分鐘即成 (各人爐火唔同~要注意喔)

<<蒜茸白酒煮青口>>
屋企樓下會所有迷你倉租借服務~黃師奶一知道有咗囡囡就開始排~呢2日終於等到個倉~叫做可以清減少少什物放入樓下會所~吖~多咗囡囡後真係多咗好多嘢…周屋都係玩具~見到就暈~!

黃先生鍾意食法國藍青口~~哈~今日黃師奶同囡囡行一田~見到有D澳洲青口賣~又買返家試下~黃先生話好好味喎~又夠大隻~~價錢又平過法國嗰款好多~值得一試呢~!

材料: 青口1KG
調味: 蒜茸隨意, 白酒半杯

STEP 1
將青口清洗乾淨

STEP 2
爆香蒜茸後拌入青口兜炒片刻

STEP 3
灒白酒煮透兜勻即成

<<雞蛋煎肉餅>>
過咗中秋後天氣好似冇咁熱喇~家下落街叫做有少少風~舒服咗好多~可惜囡囡仲未識行~如果唔係喺公園行下拍下拖咁應該幾開心呢~哈~好期侍囡囡識行嘅呢一日呀~!

今日呢個肉餅加咗D蛋汁落去煎香~哈~黃先生話好好味喎~梗係啦~咁香口~就好食過就咁蒸~不過煎就冇咁健康~唔可以成日咁食呢~!

材料: 豬柳梅約300G (叫豬肉佬揀夠肥D~一係叫佢答夠肥膏俾你啦), 辣醬一湯匙, 雞蛋一隻 (發勻)
醃料: 生抽約1湯匙, 糖1茶匙, 胡椒粉少許, 麻油及生粉各1茶匙, 水3湯匙

STEP 1
豬絞肉與醃料(除水外)拌勻醃約20分鐘備用

STEP 2
將醃好嘅豬肉慢慢加入水~!之後向同一個方向攪至起膠! (可以放入個保鮮袋到撻)~記得d水要完全吸收哂喔

STEP 3
將蛋汁拌入豬肉中至完全吸收

STEP 4
爆香辣醬將肉餅一面煎至金黃後反轉再煎另一面至全熟即成~!

<<豬骨滑雞粥>>
又到星期六~!大家有冇節目呀? 今日難得黃先生放假~我哋可以一家三口出下街喇~之前黃先生實在太忙~星期六日好多時都要返工~家下終於搞掂哂D嘢~可以陪下我哋呢~!

黃師奶好間唔時都會煲下粥架~!不過家下湊住囡囡又廢事睇火~所以少煲咗好多LU~今次呢個粥黃師奶用咗豬骨去煲~D豬骨好好味呀!~煲咗一大煲好快食哂~大滿足~!!

材料: 豬骨(約50蚊), 雞肉隨意, 一量杯米, 十三量杯水

STEP 1
豬骨及雞肉用鹽醃過夜

STEP 2
將米洗淨、隔水，加入鹽及油醃一會; 豬骨汆水片刻備用

STEP 3
預備大煲滾水, 加入米~豬骨大火煲至綿身後拌入雞件煮透再下鹽調味即成.