黃師奶廚藝小百科

黃師奶烘培工作坊

想跟黃師奶整靚靚動物cupcake, 請即報名參加
黃師奶烘焙工作坊啦! 黃師奶烘焙工作坊

黃師奶專欄

日日煮星級「煮」廚


SalaD blog 星級blogger


點煮網推介用戶


myTaste.tw

近期迴響

Google+ Badge

金蠔

20170118蠔
<<金蠔>>
今日係大年初三~!黃師奶祝大家雞年大吉~!事事順利~!話哂過年~梗係要煮返D過年餸賀一賀~應下節啦~~今日黃師奶煮咗金蠔呀!~~祝大家好事齊來~!!

材料: 金蠔八隻
調味: 蜜糖少許

STEP 1
將金蠔沖洗乾淨, 再抺乾水份

STEP 2
將金蠔蒸約4-5分鐘後盛起, 再抺乾

STEP 3
燒紅鑊後將金蠔煎香~加少少蜜糖再兜勻即成~!

 

大家可以Click入 黃師奶廚藝小百科 facebook 粉絲專頁度交流吓吖~!!!

月月祝大家雞年大吉~!

16174831_1402399253135095_5830259349156550094_n

今日係年三十喇~大家準備好迎接新年未呀?!黃師奶已經準備好同月月一齊過年喇~呵呵呵~!

月月祝大家雞年大吉大利~新年快樂~日日都好似月月咁開心笑~幸福滿滿~!

 

大家可以Click入 黃師奶廚藝小百科 facebook 粉絲專頁度交流吓吖~!!!

雞年 – 蘿蔔糕

20170125蘿蔔糕
<<雞年 – 蘿蔔糕>>
今日已經係年廿八喇~大家執乾淨屋企未呀?!而黃師奶呢~就冇執屋LU~其實日日都已經執~間屋都好整齊~所以冇呢個習慣~呵~家下囡囡瞓咗覺~等佢醒咗再去行花市~~見識下~!

材料: 蘿蔔三斤
餡料: 半條臘肉, 一條臘腸, 一條膶腸, 6隻冬菇, 蝦米及瑤柱隨意
調味料: 一茶匙雞粉, 一茶匙糖, 一茶匙胡椒粉及五香粉少許
粉漿: 粘米粉80g, 鷹粟粉160g, 蘿蔔湯400g (完全拌勻)
煮蘿蔔水: 浸菇水150g杯

STEP 1
蘿蔔刨絲~其中約一碗蘿蔔切粗絲; 冬菇浸軟後去蒂切粒(浸菇水留用)

STEP 2
蝦米及瑤柱浸軟; 臘肉,臘腸同膶腸用熱水沖淨後切粒

STEP 3
燒紅鑊後將臘肉,臘腸同膶腸炒香~炒到好香出油後拌入蝦米, 冬菇粒及瑤柱爆香盛起

STEP 4
原鑊拌入蘿蔔連刨蘿蔔時的汁炒片刻~加150g浸菇水煮至蘿蔔剛軟身再下調味

STEP 5
將剛煮起的蘿蔔隔去上湯, 留起蘿蔔上湯約400g用黎開粉漿

STEP 6
唔駛開火~再拌入其他餡料兜勻

STEP 7
拌入粉漿~不斷兜勻~ 再開慢火兜勻至收水~收水後熄火再完全拌勻所有餡料

STEP 8
將器皿掃油後拌入餡料鋪平 , 大水隔水蒸約60分鐘後即成~

 

大家可以Click入 黃師奶廚藝小百科 facebook 粉絲專頁度交流吓吖~!!!

雞年 – 年糕

20140119糕
<<雞年 – 年糕>>
今日已經係年廿六喇~~辦好年貨未呀?!花市已經開咗喇~不過黃師奶仲未得閒去呀!~搵日下午要同月月去一轉~等佢見識下先~同埋要感受下過年氣氛嘛~呵呵呵~~~

材料: 棷漿 420 ml , 糯米粉 240g , 澄麵粉 60g , 糖190g , 橄欖油 3茶匙 , 色素(紅色2滴 及黃色2滴)

STEP 1
將粉類篩2次

STEP 2
慢火溫熱棷漿, 拌入糖煮至溶化

STEP 3
將有糖棷漿與粉類拌勻至無粉粒, 注入橄欖油拌勻. 再將粉漿篩3次 (咁會更滑)

STEP 4
盛起少部份粉漿(黃色約三湯匙 / 紅色約半碗), 加入食用色素拌勻

STEP 5
模具掃油, 先將有色的粉漿倒入大火蒸約3分鐘

STEP 6
倒入其餘粉漿, 大火隔水蒸約30分鐘, 待涼脫模即成~!

大家可以Click入 黃師奶廚藝小百科 facebook 粉絲專頁度交流吓吖~!!!

雞年 – 芋蝦

20170118芋蝦

<<雞年 – 芋蝦>>
HAPPY FRIDAY!~今日下午黃先生放假~哈~咁黃師奶就有時間出去剪個頭髮~話哂下星期過年~點都要見下人..執下個樣…廢事嚇親人~!

又來個應節小食~芋蝦呢~刨下刨下~之後就係炸喇~~今年唔炸得多呀!~因為黃師奶仲咳到死死下~都係整咗少少俾黃先生食下應下節呢~!

材料:芋頭550G, 沾米粉約1.5個湯匙 , 糯米粉約1.5個湯匙 , 鹽及五香粉少少 , 紹酒一茶匙, 芝麻適量

STEP 1
芋頭洗刨去皮刨絲~

STEP 2
芋頭絲加埋其他材料拌勻;

STEP 3
燒熱油後轉細火~炸至金黃盛起隔去油份即成~!

大家可以Click入 黃師奶廚藝小百科 facebook 粉絲專頁度交流吓吖~!!!

雞年 – 芋片

20170118芋片
<<雞年 – 芋片>>
好耐冇UPDATE喇…黃師奶病咗…又年底到家下係咁咳…食咗藥又累..又要湊女..唔夠休息搞極都唔好呢~!所以就搞到個BLOG生哂草呢~!

嘩~下星期就過年喇~黃師奶又整下D賀年糕點賀下先~先來一客芋片~香口又好味~食得多好熱氣呀!~~不過一年一次~冇所謂啦~!

材料:芋頭550G, 沾米粉約1.5個湯匙 , 糯米粉約1.5個湯匙 , 鹽及五香粉少少 , 紹酒一茶匙

STEP 1
芋頭洗淨刨去皮刨片~~

STEP 2
芋頭片加埋其他材料拌勻

STEP 3
燒熱油後轉細火~炸至金黃盛起隔去油份即成~!

大家可以Click入 黃師奶廚藝小百科 facebook 粉絲專頁度交流吓吖~!!!

牛油薯波

20160109薯薯
<<牛油薯波>>
自從多咗個女後~落街好多人同我哋搭傘…"依?仲玩緊未返屋企呀?"…"嘩~乜你大個咗咁多?"…最爆係..全部人黃師奶都係唔識唔認得嘅…拔…佢哋認得我哋2母女~!

好肥呀~~呢個小食好肥呀!~加咗勁勁多牛油焗呀!~~不過焗出黎真係好香好好味~間中食一次半次冇所謂呢~呵呵~!

材料: 薯仔6個 , 牛油隨意
調味: 鹽少許

STEP 1
薯仔去皮後洗淨

STEP 2
將薯仔調味後加入牛油

STEP 3
預熱焗爐220度10分鐘, 將薯仔焗約50分鐘至金黃即成 (我用咗好大火~因為想個皮乾身香口D)

大家可以Click入 黃師奶廚藝小百科 facebook 粉絲專頁度交流吓吖~!!!

蒜香象拔蚌

20160109象象
<<蒜香象拔蚌>>
今日涼返少少~星期尾又跌返去13度~家下天氣怪怪咁~黃師奶好鍾意凍~不過又唔想凍親囡囡~所以變咗….反而覺得20度呢D天氣最啱~嘩哈哈~

哈~今日見到D象拔蚌好肥美~忍唔住又買咗幾隻返家~夠哂新鮮~劏好咗用咗少少蒜茸辣椒黎蒸~簡簡單單~不過好好味呢~!

材料: 象拔蚌5隻
調味: 蒜茸辣椒隨意

STEP 1
象拔蚌劏開洗淨

STEP 2
將蒜茸辣椒放喺象拔蚌上

STEP 3
煲滾水後大火隔水蒸約4-5分鐘灒熟油即成

大家可以Click入 黃師奶廚藝小百科 facebook 粉絲專頁度交流吓吖~!!!

18個月大喇~!

YEAH!~~~今日月月歲半喇~真係好快好快呀過得~好唔捨得月月大得咁快呢~!

今朝返咗去健康院檢查~呵呵~一切正常~姑娘仲讚月月醒目~啲考核都識得做~雖然月月都係偏細粒~不過呢~健康就夠喇~!

家下同歲半大嘅月月互動多咗好多~佢識得同你玩~又識得簡單表達自己想要嘅嘢~識行唔識走~最鍾意行樓梯~而最煩係成日覺得自己好叻唔駛人扶實佢行…吹脹….

睇返D相月月真係大個咗好多~~媽媽真係好珍惜呢段日子~~好ENJOY你日日痴實我架~嘩哈哈~~~~

大家可以Click入 黃師奶廚藝小百科 facebook 粉絲專頁度交流吓吖~!!!

煎銀鱈魚扒

20161228魚魚
<<煎銀鱈魚扒>>
聖誕新年假期又完咗LU~不過3個星期後又過年喇~大家開始忙未呀?!黃師奶同囡囡日日都係咁過~哈~其實過節最大分別就係黃先生得閒陪下我哋2個囉~!

月月好鍾意食銀鱈魚架~所以黃師奶時不時都會去買俾佢食~咁人仔細細食唔到咁多~就順手煎埋俾黃先生~煎到金黃又香又滑~好吸引架~!

材料: 銀鱈魚2塊
醃料: 檸檬汁少許, 鹽及黑胡椒少許 , 橄欖油少許(總之搽勻條魚就得)  , 生粉一茶匙

STEP 1
將銀鱈魚與醃料拌勻( 橄欖油及生粉最後先加)

STEP 2
燒紅鑊後下銀鱈魚, 細火先煎香有皮一面~煎至魚肉變白色就反轉(唔好反黎反去呀~~好易出事)

STEP 3
反轉後細火煎冇皮的一面煎大約2分鐘即成

 

大家可以Click入 黃師奶廚藝小百科 facebook 粉絲專頁度交流吓吖~!!!