黃師奶廚藝小百科

黃師奶烘培工作坊

想跟黃師奶整靚靚動物cupcake, 請即報名參加
黃師奶烘焙工作坊啦! 黃師奶烘焙工作坊

黃師奶專欄

日日煮星級「煮」廚


SalaD blog 星級blogger


點煮網推介用戶


myTaste.tw

Google+ Badge

紅酒炆牛肋條

20170331牛牛
<<紅酒炆牛肋條>>
今日天氣唔好~黃師奶同囡囡喺屋苑嘅室內遊樂場到玩~玩玩下就有個女仔貼咗退熱貼..戴埋口罩黎玩..一見到咁…個個BB家長就即走人喇..有時真係唔明..小朋友咁病就唔好去玩啦..休息多D咪惹人咪仲好…

呢個餸好好味架~不過呢~就花少少時間炆喇~炆到D牛肉好腍身~個汁又好好送飯喎~大家可以一試喔~!

材料: 牛肋條600g, 紅蘿蔔一條(去皮切大件) , 洋蔥一個(去衣切大件),薯仔兩個(去皮切大件)
材料:  紅酒250ML, 上湯500ML
調味料: 去皮蕃茄約4個, 黃糖約二茶匙, 鹽少許, 香草隨意

STEP 1
牛肋條先出水去減啲油

STEP 2
爆香洋蔥再拌入牛肋條略略煎香

STEP 3
拌入香草, 蕃茄, 薯仔及紅蘿蔔兜炒片刻後注入紅酒及上湯後用炆焗方法大火煮滾轉細~火炆煮約30分鐘後熄火焗30分鐘~!再重覆~~!

STEP 4
食前翻熱15分鐘再焗15分鐘即成~!

 

大家可以Click入 黃師奶廚藝小百科 facebook 粉絲專頁度交流吓吖~!!!

蒜蜜香草雞翼

2017-03-16-PHOTO-00000398

呵!廚房多咗件新玩具!就係Panasonic 高速攪拌機 MX-ZX1800喇!佢有6個自動模式:包括果汁、果昔、食物泥蓉、濃湯、堅果及雪葩模式!對於日日煮飯同要整囡囡食物嘅黃師奶黎講真係非常方便呢!

黃師奶最欣賞就係呢部高速攪拌機嘅主耐熱容器使用食用級物料,不含雙酚A (BPA Free),咁就可以安心用黎整嘢食俾囡囡呢!

黃師奶用咗佢整左smoothies 做早餐,仲整左果汁俾囡囡飲!而且部機真係好夠力呀!唔駛預先將食物切碎都可以做到好幼滑嘅口感!整濃湯同甜品都好方便呢!

今次黃師奶就用咗食物泥蓉模式整咗個醬汁雞翼!有咗呢部Panasonic 高速攪拌機 MX-ZX1800,醬汁份量整多咗,方便PACK起下次用!呵呵!

材料:雞翼10隻, 芝麻少許
醃料: 鹽2茶匙
醬汁材料: 蒜頭12小粒, 蜜糖6湯匙, 黃糖6湯匙, 香草隨意, 味琳及醬汁各約1杯

STEP 1
雞翼跟醃料拌匀備用

STEP 2
將雞翼煎至金黃至八成熟

STEP 3
將醬汁材料拌入Panasonic 高速攪拌機中, 再以食物泥蓉摸式打成醬汁

STEP 4
倒入醬汁,跟雞翼拌匀後灑上芝麻即成!

PANASONIC 4

呢部Panasonic MX-ZX1800 攪拌器亦設有1個手動模式,有10格速度控制,可持續約9分鐘! 6刀片切割系統,令食物切割效果更精細!而刀座亦都可以拆出黎洗架,方便清潔真係值得一讚呢!

IMG_8696
2017-03-16-PHOTO-00000400

大家可以Click入 黃師奶廚藝小百科 facebook 粉絲專頁度交流吓吖~!!!

紅酒肉醬意粉

20170323紅酒粉粉
<<紅酒肉醬意粉>>
尋日選完特首~同預期一樣~薯片叔叔輸咗~講真~呢個位邊個做都死架啦~所以選唔到又嬴咗民心咁都唔錯吖~退休生活不知幾爽~!

呢個肉醬意粉加咗紅酒煮~好香架~!黃師奶煮咗成個幾2個鐘~個醬汁好入味~送飯同送意粉都好夾呢~!

材料: 牛絞肉400G, 煙肉一碗, 紅蘿蔔一條(去皮切丁) ,洋蔥一個(去衣切茸), 扁意粉約300G, 芝士碎隨意, 紅酒250ML, 上湯500ML
調味料: 去皮蓄茄約4個, 黃糖約二茶匙, 鹽少許

STEP 1
爆香洋蔥茸及煙肉, 再拌入牛絞肉兜勻片刻

STEP 2
拌入蓄茄及紅蘿蔔兜炒片刻後注入紅酒及上湯煮滾再慢火煮約1.5小時後下少許糖同鹽調味

STEP 3
煲滾水後下少許鹽同油~拌入意粉大火煮熟(包裝上有講煮幾耐架~再瀝乾水份)

STEP 4
將醬汁淋上意粉上再灑上芝士碎即成~!~!

 

大家可以Click入 黃師奶廚藝小百科 facebook 粉絲專頁度交流吓吖~!!!

咖哩雞

20170323咖哩雞
<<咖哩雞>>
呢2日囡囡有少少鼻水咁~唔知道係咪作病呢?!希望過2日好啲唔駛睇醫生啦~有時小朋友病真係好擔心~最煩就係餵藥…好似大作戰咁呢~!

今日煮咗咖哩雞~好好送飯呀!~可惜黃先生話午餐已經食咗咖哩…我鬼知你午餐食咗咩…煮飯真係難…

材料: 雞一隻(斬件), 薯仔2個 , 洋蔥 一個, 乾蔥茸一湯匙, 辣椒油隨意, 黃薑粉少許
醬汁: 油咖哩三大湯匙, 沙嗲醬2湯匙
雞醃料: 鹽少許

STEP 1
雞跟醃料拌勻醃約半小時備用

STEP 2
洋蔥去衣後切角備用~薯仔去皮洗淨切大件

STEP 3|
雞件同薯仔略略煎香~再爆香洋蔥後盛起

STEP 4
慢火將油咖哩~同沙嗲醬炒香~!拌入洋蔥~乾蔥茸~同黃薑粉炒香後拌入雞件兜炒片刻

STEP 5
加水蓋過所有材料後用炆煮約半小時用生粉水埋芡即成~!

 

 

 

大家可以Click入 黃師奶廚藝小百科 facebook 粉絲專頁度交流吓吖~!!!

鮮蝦豆腐蒸水蛋

20170317豆腐蛋蛋蝦
<<鮮蝦豆腐蒸水蛋>>
大家有冇追特首論壇呀?!黃師奶唔識政治~不過都覺得幾好睇架~好睇在睇下薯片叔叔有時串人都幾搞笑~睇LIVE仲見到好多LIKE LIKE 俾薯片叔叔~最後邊個做特首?仲有幾日就知LU~

呢個餸有豆腐~又有水蛋~哈~清清哋咁又好送飯~真係唔錯架~而且都幾啱小朋友食~媽媽們可以試下喔~!

材料: 蝦仁10-12隻, 豆腐一磗, 蛋3隻, 上湯250ml
蝦仁醃料: 鹽及胡椒粉少許

STEP 1
豆腐切丁 ( 豆腐可於煮前灑少許鹽蒸約5分鐘再切隔去水份) ; 蝦仁洗淨後抺乾再跟醃料拌勻

STEP 2
先將碟蒸熱至水滾; 將蝦仁及豆腐放入碟中; 蛋及上湯拌勻

STEP 3
將STEP 2 蛋汁倒入碟中後蓋錫箔紙, 大火蒸5分鐘後焗20分鐘即成~!

 

大家可以Click入 黃師奶廚藝小百科 facebook 粉絲專頁度交流吓吖~!!!

鮮茄肉醬扁意粉

20170317菇菇牛牛意粉
<<鮮茄肉醬扁意粉>>
HAPPY FRIDAY!~話咁快又一星期~三月都過咗一半喇~黃師奶好期待四月來臨架~因為四月頭我哋一家三口去日本賞櫻~呵呵呵~

又介紹一個懶人意粉餐~其實煮下意粉真係幾方便~有時會想個醬煮多少少~第日LUNCH煮多碗飯黎食~哈~冇計啦~湊女困身嘛~!

材料: 牛絞肉隨意, 蒜茸一湯匙, 蘑菇約十粒(用在抺乾淨後切片), 扁意粉約250G, 芝士碎隨意
調味料: 去皮蓄茄約4個, 黃糖約二茶匙, 鹽少許

STEP 1
煲滾水後下少許鹽同油~拌入意粉大火煮熟(包裝上有講煮幾耐架~再瀝乾水份)

STEP 2
爆香蘑菇片後拌入牛肉炒香, 下蒜茸兜勻

STEP 3
拌入蓄茄兜炒片刻後下少許糖同鹽再調味煮至杰身~

STEP 4
將醬汁淋上意粉上再灑上芝士碎即成~!~!

 

大家可以Click入 黃師奶廚藝小百科 facebook 粉絲專頁度交流吓吖~!!!

和風醬汁豬扒

20170315豬豬
<<和風醬汁豬扒>>
今日又凍返唔少~同時間終於冇咁濕喇~可以唔駛喺個仙境到~哈~不過應該過2日又濕過….討厭!

黃先生鍾意食豬扒~好多時我哋都買厚切豬扒食架~今次煎好後加個醬汁~簡單~不過好好味呢~!

材料: 厚切豬扒2塊
汁料: 醬油1/3杯, 蜜糖2湯匙, 黃糖及芝麻隨意(拌勻)

STEP 1
將豬扒煎香後至2面金黃

STEP 2
注入醬汁將豬扒煮至熟透即成

大家可以Click入 黃師奶廚藝小百科 facebook 粉絲專頁度交流吓吖~!!!

醬油拼盤

20160708豉油蛋
<<醬油拼盤>>
好潮濕呀!~~一早起床~就好似入咗仙境一樣~濕到呢….望唔到過對面架…衫又未乾….仲要狂抽濕抽乾佢….呢D天氣真係唔知要捱幾耐呢~!

今日呢~就整咗呢個醬汁拼盤~浸咗成個下午~好入味喔~整呢D拼盤小食幾好架~唔駛睇火~浸住就入味~啱哂黃師奶呢個日日忙湊女嘅媽媽~呵呵~

材料: 炸豆腐6磗, 熟透全蛋3隻
汁料: 萬字醬油2/3杯, 開水約1杯 , 紹酒1大匙,冰糖一粒, 陳皮一小塊

STEP 1
將汁料煮至大滾後拌入炸豆腐/雞蛋大火煮約3-5分鐘後熄火浸約4小時即成~

 

大家可以Click入 黃師奶廚藝小百科 facebook 粉絲專頁度交流吓吖~!!!

日式照燒雞翼

20170310雞雞
<<日式照燒雞翼>>
HAPPY FRIDAY!~今日同囡囡去公園玩時~終於見識咗小霸王真面目….一個老人家湊嘅肥仔…技安咁~自己想玩滑梯唔排隊…仲要打人…最爆係個老人家唔話佢…話小朋友係咁…暈….

今日呢款雞翼加咗少少泡打粉醃~再用焗爐焗~個效果唔錯喎~做出黎口感好似炸咗咁~不過就冇落油~焗完加個汁就食得~簡單又好味呢~!

材料: 雞翼10隻
醃料: 鹽及檸檬汁少許, 泡打粉2茶匙
汁料: 醬油1/3杯, 蜜糖2湯匙, 黃糖及芝麻隨意

STEP 1
雞翼跟醃料拌勻醃約1小時

STEP 2
預熱焗爐200度焗雞翼最少30分鐘至香脆盛起

STEP 3
將醬汁材料拌勻煮滾, 拌入雞翼兜勻即成

大家可以Click入 黃師奶廚藝小百科 facebook 粉絲專頁度交流吓吖~!!!

大蝦意粉

20170308粉粉
<<大蝦意粉>>
今日天氣雨粉粉~感覺又凍咗唔少呢~!所以冇同囡囡去公園呀~咁啱今日屋企又冇水…2條友仔無聊到暈~喺樓下商場行下HEA下咁~再去CLUBHOUSE 打個轉~又一日~呵~

來一客意粉~買咗D老虎蝦~本來唸住用XO醬煎~之後都係煮意粉算~一煲過~煮得簡單D~味道都唔錯架~!

材料: 老虎蝦約10隻, 意粉半包, 蒜頭3-4粒 (去衣切片)
上湯:~龍蝦湯約1杯
調味: 黑胡椒及鹽

STEP 1
蝦去眼及腳, 去腸再開背後洗淨再抺乾水份

STEP 2
煲滾水後加少許油同鹽~放入意粉( 我買嗰包係話煮9分鐘~我煮完會再炒~所以我煮足6分鐘)~盛起

STEP 3
爆香蒜片後拌入大蝦煎香, 注入龍蝦湯後煮透將蝦盛起

STEP 4
拌入意粉煮透, 將大蝦回鑊兜勻再下調味即成~!

 

大家可以Click入 黃師奶廚藝小百科 facebook 粉絲專頁度交流吓吖~!!!