黃師奶廚藝小百科

黃師奶烘培工作坊

想跟黃師奶整靚靚動物cupcake, 請即報名參加
黃師奶烘焙工作坊啦! 黃師奶烘焙工作坊

黃師奶專欄

日日煮星級「煮」廚


SalaD blog 星級blogger


點煮網推介用戶


myTaste.tw

近期迴響

Google+ Badge

乾炒牛河

20170426牛牛河
<<乾炒牛河>>
今日一早同月月去咗做健康評估~哈~因為五月要做入學註冊喇~入學前要做評估..點知隻衰豬一見到醫生就狂喊…大喊…黃師奶覺得月月俾以前D打針經驗嚇親…所以咁驚醫生…

又來一個懶人餐~炒一碟牛河~炒足一大碟~食剩咗仲可以留返黎第日午餐食~哈~真係唔錯架~!自己炒又可以少D油~健康過出街食好多呢~!

材料: 牛柳250g , 洋蔥一個(切絲) , 炒河粉3碗, 老抽適量(調色), 蔥段芝麻少許
牛柳醃料: 生抽半湯匙, 蒜茸半湯匙, 糖及生粉各1茶匙, 胡椒粉及麻油少許, 水一湯匙

STEP 1
牛柳跟醃料伴勻備用; 炒河粉先分開一條條;

STEP 2
燒紅鑊爆香洋蔥炒至軟身後拌入牛柳快炒至轉色

STEP 3
拌入炒河粉後加入老抽兜勻炒至乾身拌入蔥段芝麻即成 (唔好炒咁耐呀!~牛肉老咗好難食)

 

 

大家可以Click入 黃師奶廚藝小百科 facebook 粉絲專頁度交流吓吖~!!!

星洲炒米

20170422米米
<<星洲炒米>>
個BLOG又生草咗一排…冇計啦~黃先生因為要睇電影節所以呢2星期都冇返黎食飯…黃師奶要湊住囡囡~都食食得簡單為主呢~!

好耐冇食星洲炒米~其實黃師奶好愛食呢類小炒架~可惜家中老細怕肥…所以呢…好少煮….

材料: 米粉250G , 叉燒半斤(切絲), 青椒紅椒隨意(切絲), 蛋2隻, 蝦仁(去腸)隨意, 洋蔥1個(切絲)
調味: 咖哩粉隨意( 睇下自己食得幾辣啦), 黃薑粉1-2茶匙. 鹽少許

STEP 1
煲滾水後將米粉煮1分鐘後盛起瀝乾水份 (根據返包裝上煮法啦); 蝦仁用少許胡椒調味

STEP 2
拌勻蛋汁後煎蛋皮再整碎盛起; 蝦仁炒至七成熟盛起

STEP 3
爆香洋蔥絲後下米粉再下調味兜勻(如果覺得太乾, 可以加小半碗水再不斷兜炒)

STEP 4
拌入青椒, 紅椒. 蛋皮, 叉燒及蝦仁兜勻至乾身, 下少許鹽調味即成~!

 

大家可以Click入 黃師奶廚藝小百科 facebook 粉絲專頁度交流吓吖~!!!

蠔皇豬手煲

20170331豬手
<<蠔皇豬手煲>>
今日就係假期最後一日喇~打工仔實好唔願返工呢~!呵呵~天氣好熱呀!~差不多30度~!睇黎夏天又黎LU~!咁鬼熱嘅天氣~真係唔知道同囡囡去邊玩好呢~!

呢個豬手煲~黃師奶就好鍾意食喇~食豬手好鍾意食塊皮架~炆到腍哂好入味呀!~豬手好上奶喎!~真係食多D都唔怕呢~!

材料: 豬手一隻, 炸支竹隨意, 薑3-4片, 蔥段及乾蔥隨意, 冰糖1小塊, 黃酒小半碗, 上湯2杯
調味: 蠔油2-3湯匙

STEP 1
豬手放入薑蔥水中汆水後沖洗乾淨備用; 炸支竹用熱手沖洗乾淨

STEP 2
爆香薑片及乾蔥後拌入豬手略略煎香

STEP 3
下調味後兜炒片刻後灒酒; 注入上湯至蓋過豬手煮滾

STEP 4
下冰糖, 先慢火炆煮約30分鐘後熄火焗30分鐘; 重複炆焗一次

STEP 5
拌入炸支竹後炆煮15分鐘再焗約15分鐘至收汁即成

大家可以Click入 黃師奶廚藝小百科 facebook 粉絲專頁度交流吓吖~!!!

2017日本關西之旅

IMG_0211 IMG_0212

黃師奶已經返咗 黎香港喇…今日先得閒返黎除草…冇計啦…去完個TRIP見到堆衫都頭痛…執下嘢…又要湊住囡囡…仲邊得閒寫BLOG吖~!!

今次出走一個多星期~哈~湊住囡囡其實都幾大挑戰架~又驚佢喺飛機到喊…又驚坐長途車曳..最擔心佢會水土不服病….幸好月月今次都好合作..喺機到做咗豬精….WELL…條友仔雖則平時練仙唔食嘢…不過佢又好瞓得嘅…咁當然都有扭下架啦~但係都尚算合作…1歲多人仔算係咁呢~!

今次我哋睇花之行都好開心呢~!雖則有2日都落住毛毛雨~不過都可接受吖!~黃師奶成世女都未見過咁多靚花架~!相就影咗好多~不過好難一下子放上黎喇~!而黃師奶呢…哈~見到月月去玩得開心~緊係覺得都開心啦~!

期待下次一家三口之旅~!

大家可以Click入 黃師奶廚藝小百科 facebook 粉絲專頁度交流吓吖~!!!

21個月大喇~!

哈~月月21個月大嘅時候我哋一家三口去咗日本關西睇櫻花~!所以呢篇BLOG係返到黎香港之後寫嘅~!

咁快就21個月大喇~好快就2歲LU~!最近發覺月月開始識得表達不滿…其實平時都會扭下計架喇….不過好明顯家下係扭得多咗…呢隻豬仔都幾硬頸..感覺到佢係受軟唔受硬…最煩家下月月又唔係完全明白我哋嘅道理…有時同佢講…佢好似明D唔明D…

真係唔想寵個小霸王出黎…睇黎要睇多少少育兒書….唔係真係唔識得教呢~!

大家可以Click入 黃師奶廚藝小百科 facebook 粉絲專頁度交流吓吖~!!!

月月要飛喇~~~

IMG_9233
哈~期待已久嘅大阪之旅到喇~今日我月月就同爸爸媽媽飛去日本睇花花喇~~今次係月月第二次搭飛機喇~媽媽話希望我好似上次去BKK 咁喺機到係咁瞓覺豬~唔好喊喎!!哈~~唔知到時會唔會扭計仔呢?!

我哋要差不多十日後先返香港呀~~記得要掛住月月呀!~~呵呵呵~返黎我又會大個D架喇~~~

大家可以Click入 黃師奶廚藝小百科 facebook 粉絲專頁度交流吓吖~!!!