黃師奶廚藝小百科

<<沙嗲豬肉扒豆腐>>
呢幾日夜晚都瞓得好差~半夜3-4點就會醒咗..眼光光…好想瞓..奈何瞓咗入豬欄…嘈到瞓唔到…如果唔係個女…一早出咗廰瞓~

超市D豆腐做特價~咁就買黎返家煮呢~!用少少沙嗲爆香D豬肉再撈埋D豆腐食~又香又惹味呢~!

材料: 豬絞肉(半肥瘦)約廿蚊, 豆腐一磚
豬絞肉醃料: 生抽半湯匙 , 糖一茶匙 , 胡椒粉少許, 水1.5湯匙 , 麻油及生粉少許 (呢2樣可以煮之前先落)
調味: 沙嗲醬2湯匙, 紹酒小半碗

STEP 1
煲滾水後將豆腐蒸至熟透

STEP 2
慢火爆沙嗲醬後拌入豬絞肉兜炒片刻, 灒酒後蓋上蓋煮至熟透 (可加生粉水埋芡)

STEP 3
將熟透嘅豬肉淋上豆腐上即成

<<XO醬蒸排骨>>
上星期病咗幾日冇煮飯~家下好返又繼續做煮飯婆~食住藥湊女眼瞓到暈….又唔可以瞓…真係有苦自己知….

屋企有D XO醬~見佢就快過期~一於用黎蒸排骨~哈~~辣又唔係好辣~不過幾香架~送飯都唔錯呢~!

材料: 腩排400G,生粉一茶匙及麻油適量, 蒜茸1大湯匙,  XO醬1大湯匙
醃料: 生抽一湯匙, 老抽少許, 糖一茶匙, 胡椒粉少許

STEP 1
腩排洗淨後與醃料醃約二十分鐘~~

STEP 2
將醃好嘅腩排與少許麻油~~~及生粉拌勻~~蒸前再拌入蒜茸及XO醬

STEP 3
煲滾水後大火隔水蒸約15-20分鐘至熟

<<胡椒湯浸蜆>>
撒嬌的女人完咗~黃師奶就轉煲十里桃花~唔知大家有冇睇呢~?!個景好靚呀~~又忍唔住上網狂追~家下越睇得多其他外地劇~就覺得TBB 嗰D好爛呢~!

喺街市買咗D蜆返家~唔想用豉椒炒~哈~就煲咗個上湯加D胡椒粒~又香又惹味~~唔錯呢~!

材料: 蜆1.5斤 (浸鹽水3粒鐘~洗得乾乾淨淨)
湯汁: 上湯2杯
調味: 胡椒粒2-3湯匙 (先用焗爐用100度火焗香或白鑊炒香)

STEP 1
煮滾水後下蜆煮至半開口盛起

STEP 2
煮滾上湯後下胡椒再調味

STEP 3
拌入蜆煮至熟透即成

<<肉醬意粉>>
今日終於冇咁大雨呢~!大家返工返學冇咁辛苦呢~!天氣仲冇咁熱~又冇咁焗~舒服好多呢~!

又黎個懶人餐~煮一大碟肉醬~烚多個意粉就食得~!月月個衰豬竟然鍾意食意粉….WELL..不過條友仔係唔要醬嘅…就咁一條條白烚意粉….佢鍾意食…激死.!

材料: 牛絞肉隨意, 蒜茸一湯匙, 蘑菇約十粒(用在抺乾淨後切片), 扁意粉約250G, 芝士碎隨意
調味料: 去皮蓄茄約4個, 黃糖約二茶匙, 鹽少許

STEP 1
煲滾水後下少許鹽同油~拌入意粉大火煮熟(包裝上有講煮幾耐架~再瀝乾水份)

STEP 2
爆香蘑菇片後拌入牛肉炒香, 下蒜茸兜勻

STEP 3
拌入蓄茄兜炒片刻後下少許糖同鹽再調味煮至杰身~

STEP 4
將醬汁淋上意粉上再灑上芝士碎即成~!~!

<<釀蘑菇>>
今朝月月喺樓下扭食糖爆喊…黃師奶就唔想就範…唯有等佢喊飽佢再同佢返屋企冇得去公園…隻衰豬真係一路大喊喊到返家繼續喊..最後緊係知衰啦~不過沿途好多花生友…厚多士…煩到呢~!

見到超市有超大蘑菇賣~哈~咁就即買返家試~煮時釀咗少少豬肉~再煎香~唔錯架~大家可以一試~!

材料: 大蘑菇2隻 (用布清潔乾淨), 豬柳梅約200G, 雞蛋一隻 (發勻)
汁料: 生抽約1湯匙, 糖1茶匙, 胡椒粉少許, 麻油及生粉各1茶匙, 水半碗
醃料: 生抽約1湯匙, 糖1茶匙, 胡椒粉少許, 麻油及生粉各1茶匙, 水3湯匙

STEP 1
豬絞肉與醃料(除水外)拌勻醃約20分鐘備用

STEP 2
將醃好嘅豬肉慢慢加入水~!之後向同一個方向攪至起膠! (可以放入個保鮮袋到撻)~記得d水要完全吸收哂喔

STEP 3
將蛋汁拌入豬肉中至完全吸收

STEP 4
蘑菇沾上生粉後再釀入豬肉

STEP 5
將釀好的蘑菇煎香2後再灑上汁料煮至熟透即成~!