|
|
<<什菜肉醬意粉>>
剛剛過去幾日..天氣真係好焗呀~今日終於好返少少~不過呢~仲未落得出雨呢…快D落場大雨啦~咁就冇咁辛苦呢~!
又來個懶人餐~整一大兜肉醬~可以用黎食意粉~食剩咗呢?第日午餐煮過飯~又伴黎食~好慳家架~!
材料: 牛絞肉400G, 煙肉一碗, 紅蘿蔔一條(去皮切丁) ,洋蔥一個(去衣切茸), 扁意粉約300G, 什菜湯1L
調味料: 去皮蓄茄約4個, 黃糖約二茶匙, 鹽少許
STEP 1
爆香洋蔥茸及煙肉, 再拌入牛絞肉兜勻片刻
STEP 2
拌入蓄茄及紅蘿蔔兜炒片刻後注入什菜湯煮滾再慢火煮約1.5小時後下少許糖同鹽調味
STEP 3
煲滾水後下少許鹽同油~拌入意粉大火煮熟(包裝上有講煮幾耐架~再瀝乾水份)
STEP 4
將醬汁淋上意粉上即成~!~!
大家可以Click入 黃師奶廚藝小百科 facebook 粉絲專頁度交流吓吖~!!!
<<南乳雞翼>>
HAPPY FRIDAY~!尋晚黃師奶瞓得好差呢~今日好似作作哋病咁~真係要休息多D~飲多啖水呀~如果打敗仗分分鐘惹俾個女~好煩呢~!
今日來一客雞翼~屋企有南乳醬~用黎醃個雞翼~~之後放入焗爐~火都唔駛睇~真係好方便呢~啱哂黃師奶呢d懶人~呵呵~!
材料: 雞翼十隻
醃料: 南乳一大磚 (半個掌心咁大到) , 糖2-3茶匙, 紹酒約2湯匙 (醃料要先拌勻)
STEP 1
將雞翼洗淨後, 跟醃料醃最少4小時
STEP 2
預熱焗爐180度, 焗雞翼約20-30分鐘即成 (各人爐火唔同~要注意喔)
大家可以Click入 黃師奶廚藝小百科 facebook 粉絲專頁度交流吓吖~!!!
<<香菇蒸肉排>>
有冇追阿爺廚房呀?哈~黃師奶呢就日日翻睇喇~除咗覺得阿爺煮得好之外~仲覺得阿爺好似好人咗好多~個樣冇咁惡~哈哈哈~~
黃師奶成日煮排骨~冇計~黃先生鍾意食嘛~今次加咗冬菇蒸~又香又好味呢~!
材料: 腩排300g , 生粉一茶匙及麻油適量, 冬菇六隻
腩排醃料: 生抽一湯匙, 老抽少許, 糖一茶匙, 胡椒粉少許
冬菇醃料: 糖及及麻油少許
STEP 1
腩排洗淨後與醃料醃約二十分鐘 ; 煮前再將醃好嘅腩排與少許麻油及生粉拌勻~~
STEP 2
冬菇浸軟後切絲再與醃料拌勻備用
STEP 3
煲滾水後將所有材料放於碟上再大火隔水蒸約15分鐘即成
大家可以Click入 黃師奶廚藝小百科 facebook 粉絲專頁度交流吓吖~!!!
<<黑椒牛仔骨>>
真係唸都冇唸過尋日會打得成風呢~!!可能真係星期日關係啦…天文台唔駛唸咁多嘢..話掛就掛~不過呢~!呢個風就好弱…冇咩風冇咩雨..只係覺得冇咗日假期呢~!
好耐冇食過牛仔骨喇~黃師奶就麻麻哋~因為懶得"燶"骨呀~!不過黃先生話好味~大家可以試下~!
材料: 牛仔骨3大塊
醃料: 生抽約一湯匙 , 糖一茶匙, 黑胡椒隨意 , 油及生粉一茶匙, 水一大匙
STEP 1
用叉將牛仔骨吉下 (咁D牛仔骨會入味D同鬆D), 再同醃料拌勻醃約半小時備用
STEP 2
煎香牛仔骨煎至七成熟(約4分鐘, 上碟前可以再灑少少黑胡椒)即成
大家可以Click入 黃師奶廚藝小百科 facebook 粉絲專頁度交流吓吖~!!!
<<燒汁雞脾扒>>
呢2日天氣好返唔少呢~又可以同囡囡去公園玩~玩一陣又變咗水人…囡囡天生攣毛….一濕個頭就更攣…係咁俾笑…唉..驚佢大咗會唔開心呢~!
天氣熱唔想開火最啱焗嘢~買咗雞脾扒~醃一醃~加少少燒汁焗~唔錯架~雞脾扒滑一滑~特別好食呢~!
材料: 雞脾扒3-4片
醃料: 鹽少許, 檸檬汁約1茶匙, 燒汁約2-3大匙
STEP 1
將雞脾扒洗淨後跟醃料醃最少4小時
STEP2
預熱焗爐180度
STEP 3
將雞脾扒焗約20-30分鐘即成(各人爐火唔同~要注意喔)
大家可以Click入 黃師奶廚藝小百科 facebook 粉絲專頁度交流吓吖~!!!
<<OK雞翼>>
屋企部洗衣機壞咗..新嘅又未送黎…呢幾日黃師奶就拎咗D衫去洗衣鋪洗…嘩~~唔駛曬..唔駛熨…有人送上門仲要熨好哂!真係好無痛~唔怪得間嘢咁好生意啦~!
呢期日日落雨~求奇去超市買餸算~有支OK 汁~咁就用黎醃雞翼啦~!早上醃咗~晚上先焗~好入味~唔錯架~!
材料: 雞全翼4隻
醃料: 鹽少許, 檸檬汁約1茶匙, OK汁約2-3大匙
STEP 1
將雞全翼洗淨後跟醃料醃最少4小時
STEP2
預熱焗爐180度
STEP 3
將雞雞全翼焗約20-30分鐘即成(各人爐火唔同~要注意喔)
大家可以Click入 黃師奶廚藝小百科 facebook 粉絲專頁度交流吓吖~!!!
<<鹹魚蒸肉片>>
今日落足成日雨呢~家下仲係黃雨~不過天氣明顯冇咁焗~舒服咗唔少呢~!好似未來幾日都唔多好天~睇黎又要同囡囡喺室內HEA~!
買咗少少豬肉~屋企又有片鹹魚~咁就黎個鹹魚蒸肉片~好送飯呢~不過家下鹹魚好貴呀~~再唔係窮人恩物呢~!
材料: 豬梅肉250G,生粉一茶匙及麻油適量, 鹹魚一片
醃料: 生抽一湯匙, 老抽少許, 糖一茶匙, 胡椒粉少許
STEP 1
豬梅肉洗淨後與醃料醃約二十分鐘~~
STEP 2
將醃好嘅豬梅肉與少許麻油~~~及生粉拌勻~~蒸前再放上鹹魚一片
STEP 3
煲滾水後大火隔水蒸約15分鐘至熟
大家可以Click入 黃師奶廚藝小百科 facebook 粉絲專頁度交流吓吖~!!!
<<紅酒炆羊膝>>
一早天氣唔太曬~同囡囡去咗轉公園~見佢玩得好開心~一陣間就變咗水人….冇錯…係水人….D汗多到嚇死人….
今日見吉吉島有羊膝賣~就買返家炆黎試下~平時通常都焗架~今次炆出黎好JUICY~個汁仲可以送飯同意粉~唔錯呢~!
材料: 羊膝2隻, 紅蘿蔔一條(去皮切大件) , 洋蔥一個(去衣切大件)
汁料: 紅酒250ML, 上湯500ML
調味料: 去皮蕃茄約4個, 黃糖約二茶匙, 鹽少許, 香草隨意
STEP 1
羊膝先出水去減啲油
STEP 2
爆香洋蔥再拌入羊膝略略煎香
STEP 3
拌入香草, 蕃茄及紅蘿蔔兜炒片刻後注入紅酒及上湯後用炆焗方法大火煮滾轉細~火炆煮約30分鐘後熄火焗30分鐘~!再重覆~~!
STEP 4
食前翻熱15分鐘再焗15分鐘即成~!
大家可以Click入 黃師奶廚藝小百科 facebook 粉絲專頁度交流吓吖~!!!
<<燒汁骨>>
話咁快又星期一喇~!呢個星期暑假開始LU~公園同遊戲室都超多人~!!要搵地方HEA真係唔係一件易事呢~不過8月就開學~1個月都好快過~!
上次用低火焗排骨味道好唔錯~今次再來一次~汁料換咗做燒汁~好JUICY喔~最方便係唔駛睇火~爽~!
材料: 腩排6大件
醃料: 燒汁三湯匙, 糖一茶匙, 胡椒粉少許
STEP 1
腩排洗淨後與醃料醃約二十分鐘
STEP 2
將醃好嘅腩排與少許麻油及生粉拌勻
STEP 3
預熱焗爐140度15分鐘再用低溫焗約2小時即成
大家可以Click入 黃師奶廚藝小百科 facebook 粉絲專頁度交流吓吖~!!!
今日2歲喇~!!嘩哈哈哈~~睇返D相~月月真係大得好快呀!~~~媽媽仲記得2年前第一次聽到你喊嗰時~~開心到呢~~!
家下月月識講好多嘢~大家一齊互動好玩好多~不過呢~又煩咗好多~成日搞搞震~冇時停~少D心血都俾佢激死呢~~
吖~~又戀女發作中….媽媽祝你生日快樂~快高長大~~最緊要係健健康康~!!開開心心咁成長呢~!
大家可以Click入 黃師奶廚藝小百科 facebook 粉絲專頁度交流吓吖~!!!
|
近期迴響