黃師奶廚藝小百科

黃師奶烘培工作坊

想跟黃師奶整靚靚動物cupcake, 請即報名參加
黃師奶烘焙工作坊啦! 黃師奶烘焙工作坊

黃師奶專欄

日日煮星級「煮」廚


SalaD blog 星級blogger


點煮網推介用戶


myTaste.tw

Google+ Badge

蒜香黑椒豬肋條

20171129豬豬
<<蒜香黑椒豬肋條>>
呢2日天氣又暖咗好多呢~中午接放學又熱過~成28度呢…希望D天氣快D KEEP住涼啦~唔係著衫好麻煩咁~!

牛肋條就食得多喇~黃師奶買咗PACK豬肋條~老闆話用黎炒都得~今日一試~真係唔錯喎!~簡單得黎又JUICY QQ咁~下次可以再入貨呢~!

材料: 豬肋條約400G, 蒜茸2茶匙, 紹興酒小半碗
醃料1: 生抽1湯匙, 糖2茶匙, 油及生粉少許, 黑椒少許

STEP 1
豬肋條洗淨後與醃料醃約二十分鐘~~

STEP 2
燒紅鑊後將豬肋條煎至金黃

STEP 3
下蒜茸黑椒後灒酒煮透即成~!

大家可以Click入 黃師奶廚藝小百科 facebook 粉絲專頁度交流吓吖~!!!

大地魚蒸肉排

20171112大地魚
<<大地魚蒸肉排>>
今日同月月去咗菲臘牙科醫院~發現咗月月有多生齒問題…仲要係2隻倒轉嘅..一定要入院做手術..唔係仲會影響埋恆齒發育..好彩佢整崩咗隻牙..唔係真係唔會發覺…

見有大地魚粉~咁就蒸排骨時加D落去~提一提鮮~哈~黃師奶覺得味道唔錯~可以一試呢~!

材料: 腩排300g , 生粉一茶匙及麻油適量, 大地魚粉少許
腩排醃料: 生抽一湯匙, 老抽少許, 糖一茶匙, 胡椒粉少許

STEP 1
腩排洗淨後與醃料醃約二十分鐘 ; 煮前再將醃好嘅腩排與少許麻油及生粉拌勻~~

STEP 2
煲滾水後將所有材料放於碟上再大火隔水蒸約15分鐘即成

 

大家可以Click入 黃師奶廚藝小百科 facebook 粉絲專頁度交流吓吖~!!!

香煎豬鞍扒

20171112豬扒
<<香煎豬鞍扒>>
今日一早約咗7點9睇牙醫..早呢~~冇計啦~要湊住阿囡..唯有揀個超早時間..叫黃先生睇住阿女一陣~之後就要仆返學校呢~!

又到清雪櫃時間~見有D燒肉汁剩~順便煮豬扒時加埋入去做醬汁~哈~味道好食架~最緊要方便快靚正嘛~!

材料: 豬鞍扒3塊
汁料: 燒汁約2湯匙, 水小半碗
調味: 鹽及黑胡椒少許

STEP 1
將豬扒煎香後下鹽調味再煎至2面金黃

STEP 2
注入醬汁將豬鞍扒煮至熟透即成

 

大家可以Click入 黃師奶廚藝小百科 facebook 粉絲專頁度交流吓吖~!!!

媽媽生日快樂~~~


咁又一年..又老一歲喇~~

今日生日節目係…走咗去同月月睇牙醫呀…隻衰豬整崩咗隻門牙……..個醫生話要全麻醉做手術再整牙套…破財都唔緊要…最慘係要全麻醉…星期一去睇多個醫生聽多個意見…好煩呢…

做咗人阿媽~生日願望係囡囡快高長大~聽教聽話~全家身體健康呢~呵~!

大家可以Click入 黃師奶廚藝小百科 facebook 粉絲專頁度交流吓吖~!!!

臘味飯

20171112飯飯
<<臘味飯>>
尋日去咗沙田新城市一轉..嘩~!!多人到呢…真係好得人驚…堅唔明點解可以咁多人….當中又唔知幾多係自由行..總之一個字..迫~!

呢幾日秋風起~跌落20以下~香港黎講算係凍凍哋呢~~應下景~哈~買咗臘鴨脾~加孖腸~蒸時香噴噴~好好食呢~!

材料:  臘腸兩條, 臘鴨脾一隻 , 白米2杯 , 水約 1.75杯

STEP 1
將臘味用熱水沖一沖

STEP 2
將白米洗淨; 煮滾白米加水煮至收乾水份

STEP 3
拌入臘味後蓋上蓋用小火煮約7-8分鐘, 如果想要飯焦~呢個時候可以較至中火煮多2分鐘

STEP 4
熄火後不要開蓋再焗最少15分鐘~食時灑上煲仔飯豉油即可~

 

大家可以Click入 黃師奶廚藝小百科 facebook 粉絲專頁度交流吓吖~!!!

黑椒羊肋條

20171112羊羊
<<黑椒羊肋條>>
今日阿女學校家長日呀!~一早返咗學校拎評估表~老師對月月評價都好正面~話阿女都好乖~冇蝦其他同學仔~只係個人長氣D~同會成日掛住媽媽…..哈哈~!

喺凍肉鋪見到有羊肋條賣~真係未試過~不過價錢唔平喎!~買返家就咁用黑椒炒~!黃先生大讚話好食~哈~羊肋條細細粒咁~就咁快炒好方便呢~!

材料: 羊肋條約2碗, 露筍5-6大條, 蒜茸1大匙
醃料: 鹽及黑胡椒少許
羊肋條醃料: 油及生粉少許, 糖1茶匙

STEP 1
露筍洗淨後去除根部切小塊汆水備用; 羊肋條跟醃料拌勻備用

STEP 2
爆香蒜茸後拌入羊肋條兜炒至半熟後拌入露筍煮透下調味即成~!

大家可以Click入 黃師奶廚藝小百科 facebook 粉絲專頁度交流吓吖~!!!

南乳雞翼

20171112南乳
<<南乳雞翼>>
大家有冇睇誇世代呀?唔知點解拍到陳豪同森美好似HEHE咁~哈~不過TBB D劇又冇理由會咁~總之感覺佢哋好怪怪呢~!

今日來一客雞翼~屋企有南乳醬~用黎醃個雞翼~~之後放入焗爐~火都唔駛睇~真係好方便呢~啱哂黃師奶呢d懶人~呵呵~!

材料: 雞翼十隻
醃料: 南乳一大磚 (半個掌心咁大到) , 糖2-3茶匙, 紹酒約2湯匙 (醃料要先拌勻)

STEP 1
將雞翼洗淨後, 跟醃料醃最少4小時

STEP 2
預熱焗爐180度, 焗雞翼約20-30分鐘即成 (各人爐火唔同~要注意喔)

 

大家可以Click入 黃師奶廚藝小百科 facebook 粉絲專頁度交流吓吖~!!!

肉片炒伊麵

20171112面面
<<肉片炒伊麵>>
呢2日天氣唔太好~落住雨接放學真係好麻煩…大人濕哂..又驚整濕囡囡~希望快D好天啦~~

阿女鍾意食麵~家下間唔時都會煮下麵俾隻衰豬仔~喺街市個麵7蚊雞大大個~好抵食~仲可以配搭唔同食材~唔錯架~!

材料: 伊麵1個, 迷你直菇1包, 梅頭心(切片)約1碗
醬汁: 蠔油1湯匙,糖少許, 水約半碗
調味: 蠔油1湯匙
豬肉醃料: 油約半湯匙, 糖及生粉少許, 生抽半湯匙, 胡椒粉少許

STEP 1
豬肉跟醃料伴勻備用

STEP 2
煲滾水後將伊麵煮至鬆開盛起

STEP 3
將豬肉及直菇用蠔油炒香至熟透

STEP 4
拌入伊麵後下醬汁兜勻至乾身即成

 

大家可以Click入 黃師奶廚藝小百科 facebook 粉絲專頁度交流吓吖~!!!

黑豚豬軟骨

20171031豬軟骨
<<黑豚豬軟骨>>
立冬都過咗喇~唸住天氣會KEEP 住涼返D~誰不之今日中午又好熱喎~呢D天氣一早一晚就咁涼~放學時間又咁熱~真係玩C人~!

呢碟豬軟骨黃師奶一早起身就炆喇~由朝焗到晚先食~又腍又入味~!個汁仲好好送飯呢~!

材料: 豬軟骨500g, 薑2片, 酒半碗
醃料: 糖1茶匙, 生粉1茶匙及麻油適量
調味: 蠔油2湯匙

STEP 1
豬軟骨洗淨後與醃料醃約二十分鐘~~

STEP 2
燒紅鑊後爆香薑片後下豬軟骨煎至金黃

STEP 4
下調味後兜炒片刻後灒酒炒香~再加少許小半碗水煮滾~細火炆煮約15分鐘後再焗10分鐘即成~

大家可以Click入 黃師奶廚藝小百科 facebook 粉絲專頁度交流吓吖~!!!

蘋果醬烤骨

20171025豬豬
<<蘋果醬烤骨>>
今日接放學時又俾人厚多士…又有阿嬸話點解咁細個就要返學….俾人話足成程車..個女係我嘅~我點教點湊關你差事…真係好煩~!

屋企清雪櫃~早前買咗D蘋果司打醬想清埋佢~用黎醃過排骨~再焗~!食得~!哈~真係好方便~而且仲好JUICY 呢~值得一試喔~!

材料: 排骨6-8件
醃料1: 生抽1湯匙, 糖2茶匙, 油及生粉少許
醃料2: 蘋果司打醬2大匙

STEP 1
排骨洗淨後與醃料1醃約半小時後再拌入醃料2醃約4小時備用

STEP 2
預熱焗爐180度15分鐘再用焗約20分鐘即成(每人爐火唔同要注意喔)

大家可以Click入 黃師奶廚藝小百科 facebook 粉絲專頁度交流吓吖~!!!