黃師奶廚藝小百科

黃師奶烘培工作坊

想跟黃師奶整靚靚動物cupcake, 請即報名參加
黃師奶烘焙工作坊啦! 黃師奶烘焙工作坊

黃師奶專欄

日日煮星級「煮」廚


SalaD blog 星級blogger


點煮網推介用戶


myTaste.tw

Google+ Badge

舊日文章

幼兒園3歲生日會

IMG_2327

嘩哈哈哈~~~等咗差不多成年…到學期尾終於等到7-8月之星生日會喇~雖然今日唔係正日~不過作為媽媽嘅我真係好期待架~!一早預備好哂D嘢同佢返學慶生日呢~呵呵~

呢張相係學校早前幫佢影嘅~隻衰豬笑得好勉強咁…不過算啦~正如老師所講~月月喺學校好靜唔多出聲~所以佢咁嘅樣都係正常…..

月月係下星期五先係正日~不過今日係第一次學校搞生日會~點都要MARK 低~等佢大個咗~我老咗時睇返開心吓~!

大家可以Click入 黃師奶廚藝小百科 facebook 粉絲專頁度交流吓吖~!!!

蜜糖雞翼

20180601雞雞2
<<蜜糖雞翼>>
呢幾日天氣又好熱喇~仲要好濕咁~成日催眠自己~好快放暑假~好快暑假~好快暑假~重要事情要講3次~呵呵~!

天氣熱~最方便就係開焗爐呢~將雞翼醃好再搽上蜜糖及黑胡椒~焗一陣就食得~方便又好味~!

材料: 雞翼約1磅, 蜜糖及黑胡椒少許
醃料: 生抽約1湯匙 , 老抽半湯匙, 糖一茶匙 , 胡椒粉少許, 麻油及紹興酒少許

STEP 1
將雞件洗淨後跟醃料醃最少4小時

STEP2
預熱焗爐180度; 將雞翼搽上蜜糖及黑胡椒

STEP 3
將雞件焗約20-30分鐘即成(各人爐火唔同~要注意喔)

大家可以Click入 黃師奶廚藝小百科 facebook 粉絲專頁度交流吓吖~!!!

香菇鮑汁炆豬軟骨

20180625豬豬
<<香菇鮑汁炆豬軟骨>>
家下就黎5點~月月仲午睡中~佢夏天後個人特別累咁..日日午睡都唔願起~好在佢夜晚都肯9點幾瞓..唔係真係累C我~!

嗱~唔好似為黃師奶唔記得去冬菇蒂~!只係家中有人要求要食粒冬菇蒂~所以就冇剪到咋~今次用鮑汁炆~好香好送飯呢~!

材料: 豬軟骨500g, 香菇10隻,  薑2片, 酒半碗
醃料: 糖1茶匙, 生粉1茶匙及麻油適量, 生抽約2大匙, 胡椒粉少許
調味: 鮑汁2湯匙

STEP 1
豬軟骨洗淨後與醃料醃約二十分鐘~~

STEP 2
燒紅鑊後爆香薑片後下豬軟骨煎至金黃

STEP 4
拌入冬菇後下調味後兜炒片刻後灒酒炒香~再加少許小半碗水煮滾~細火炆煮約15分鐘後再焗10分鐘即成~

 

大家可以Click入 黃師奶廚藝小百科 facebook 粉絲專頁度交流吓吖~!!!

咖哩雞翼

20180615雞雞
<<咖哩雞翼>>
呢幾日天氣時晴時雨咁~接送放學時仲要黃雨!做阿媽嘅我非常呢HEA..不過囡囡就開心到爆…係咁踩水氹…頭都暈埋..

最近有人買咗幾款唔同牌子嘅咖哩醬~哈~所以多咗整~煮咗一大煲~個咖哩汁好送飯~唔錯呢~!

材料: 雞翼12隻, 薯仔2個 , 洋蔥 一個, 乾蔥茸一湯匙, 辣椒油隨意, 黃薑粉少許
醬汁: 油咖哩三大湯匙
雞翼醃料: 鹽少許

STEP 1
雞翼跟醃料拌勻醃約2小時備用

STEP 2
洋蔥去衣後切角備用~薯仔去皮洗淨切大件

STEP 3|
雞翼同薯仔略略煎香~再爆香洋蔥後盛起

STEP 4
慢火將油咖哩炒香~!拌入洋蔥~乾蔥茸~同黃薑粉炒香後拌入雞翼兜炒片刻

STEP 5
加水蓋過所有材料後用炆煮約半小時用生粉水埋芡即成~!

 

大家可以Click入 黃師奶廚藝小百科 facebook 粉絲專頁度交流吓吖~!!!

肉醬意粉

20180615粉粉
<<肉醬意粉>>
世界盃開咗鑼~唔知係咪好多人射波呢? 呢家夜晚食完飯~有人喺家睇波~變相黃師奶冇得睇深宮計~感覺時間好似多咗好多咁…

月月鍾意食通粉~哈~搞到我哋都多咗煮呀~不過佢鍾意食D粉架咋~唔要個醬汁~口味好怪架~

材料: 牛絞肉隨意, 蒜茸一湯匙, 蘑菇約十粒(用在抺乾淨後切片), 意粉約250G, 芝士碎隨意
調味料: 去皮蓄茄約4個, 黃糖約二茶匙, 鹽少許

STEP 1
煲滾水後下少許鹽同油~拌入意粉大火煮熟(包裝上有講煮幾耐架~再瀝乾水份)

STEP 2
爆香蘑菇片後拌入牛肉炒香, 下蒜茸兜勻

STEP 3
拌入蓄茄兜炒片刻後下少許糖同鹽再調味煮至杰身~

STEP 4
將醬汁淋上意粉上再灑上芝士碎即成~!~!

 

大家可以Click入 黃師奶廚藝小百科 facebook 粉絲專頁度交流吓吖~!!!

香煎銀鱈魚

20180615魚魚
<<香煎銀鱈魚>>
唔覺唔覺今日已經6月中喇~今日接放學嗰時~唸起仲有1個月就放暑假~心裡暗爽之餘~又有D唔捨得呢間學校~希望下年轉去另一間學校返K有個好開始呢~!

今日煎銀鱈魚~滑一滑好味道~不過價錢真係唔算平~如果日日食好快窮到燶呢~!

材料: 銀鱈魚2塊
醃料: 檸檬汁少許, 鹽及黑胡椒少許 , 橄欖油少許(總之搽勻條魚就得)  , 生粉一茶匙

STEP 1
將銀鱈魚與醃料拌勻( 橄欖油及生粉最後先加)

STEP 2
燒紅鑊後下銀鱈魚, 細火先煎香有皮一面~煎至魚肉變白色就反轉(唔好反黎反去呀~~好易出事)

STEP 3
反轉後細火煎冇皮的一面煎大約2分鐘即成

 

大家可以Click入 黃師奶廚藝小百科 facebook 粉絲專頁度交流吓吖~!!!

翠綠蝦仁

20180524蝦蝦
<<翠綠蝦仁>>
今早起身見黃雨~勁驚一陣返學勁呢HEA~好彩到放學都冇落過雨~不過家下打BLOG時又黃雨~呢個天好古怪呢~!

天氣又差又熱~少咗去街市~屋企有急凍蝦仁看門口~用黎炒翠肉瓜~簡簡單單又好味~~唔錯呢~!

材料: 蝦仁1碗, 翠肉瓜1條, 蒜茸少許
蝦仁醃料: 鹽及胡椒粉少許
調味: 鹽及辣椒碎少許

STEP 1
翠肉瓜洗淨後切小塊; 蝦仁洗淨後抺乾水份跟醃料拌勻備用

STEP 2
爆香蒜茸後將蝦仁煎香盛起

STEP 3
拌入翠肉瓜炒透後將蝦仁回鑊下調味即成

大家可以Click入 黃師奶廚藝小百科 facebook 粉絲專頁度交流吓吖~!!!

蜜味金沙骨

20180601豬豬骨
<<蜜味金沙骨>>
哈~上星期五冇啦啦3號風球~多咗一日假期~唔駛接出接入~真係好爽呀!~好彩係黃師奶家住商場樓上~天氣差都可以喺商場會所放下電呢~!

天氣熱就少開火~用焗爐焗個金沙骨~唔駛睇火~一陣就食得~好方便呢~!

材料: 金沙骨6-8件
醃料1: 生抽1湯匙, 糖2茶匙, 油及生粉少許
醃料2: 蜜糖及黑椒少許

STEP 1
排骨洗淨後與醃料1醃約半小時後再焗前拌入醃料2備用

STEP 2
預熱焗爐180度15分鐘再用焗約20分鐘即成(每人爐火唔同要注意喔)

 

大家可以Click入 黃師奶廚藝小百科 facebook 粉絲專頁度交流吓吖~!!!

35個月大喇~!


話咁快又1個月喇~嘩哈哈哈~今日月月已經係35個月大喇~即係我個TROUBLE 2 終於捱完…有人話3歲會更糟~亦有人話3歲會變好!下個月就知道LU~!

差不多3歲人仔~到咗每事問嘅年紀~有時覺得好煩~不過煩得黎又好可愛~家下感覺月月真係大個咗好多~有自己嘅意見~同堅持~雖則D堅持係好無謂…可以為咗冇蝦條食喊到世界沒日咁…唔知幾時先會正正常常呢~!?

大家可以Click入 黃師奶廚藝小百科 facebook 粉絲專頁度交流吓吖~!!!

西蘭花炒帶子

20180601菜菜
<<西蘭花炒帶子>>
呢幾日天氣涼返唔少呀~同早前嗰2星期真係差好遠~雖則天氣唔多好~不過真係舒服好多呢~!

今次煮D帶子係刺身食用架~雖則貴少少~不過又好味D喎~間唔中一次半次冇所謂啦~!

材料: 西蘭花1棵, 帶子8-10隻
帶子醃料: 胡椒少許
調味: 鹽及蒜茸少許

STEP 1
西蘭花用鹽水浸洗乾淨後汆水片刻盛起

STEP 2
將帶子煎香後西蘭花回鑊炒透下少許調味即成

 

大家可以Click入 黃師奶廚藝小百科 facebook 粉絲專頁度交流吓吖~!!!