黃師奶廚藝小百科

<<栗子雞煲>>
落咗幾日雨~天氣好似涼咗好多喇~20度以下真係好舒服~如果可以乾爽D咁就正喇~!

秋風起~係時候食栗子呢~~呢個雞煲味道幾好~不過黃先生話我冇加冬菇……可惜可惜~!

材料: 雞1隻 , 去皮栗子20粒 薑2片, 紹酒小半碗
雞肉醃料: 生抽約1湯匙 , 糖及薑茸一茶匙 , 胡椒粉少許, 麻油及生粉少許
調味: 蠔油約2湯匙

STEP 1
雞與醃料拌勻醃4小時

STEP 2
爆香薑~拌入雞煎香至金黃

STEP 3
再拌入栗子炒香後灒酒

STEP 4
加入調味後拌勻1加水蓋過所有材料後煮滾轉細火炆煮約20分鐘至收汁 (可加生粉水埋芡) 即成~

<<沙嗲雞翼>>
今晚就台慶喇~唔知又會做咩嘢節目呢?以前細個就會鍾意睇下~因為多明星~家下就好多大茄咁~唔太吸收呢~!

呢次煮雞翼加咗沙嗲醬~哈~因為黃先生搵到間鋪頭賣呢D醬料好方便~加咗沙嗲醬~雞翼好惹味~唔錯呢~!

材料: 雞翼約15隻, 洋蔥1隻(去衣切角)
雞翼醃料: 生抽一湯匙, 糖一茶匙, 胡椒粉少許, 生粉一茶匙及麻油適量, 紹興酒一湯匙
調味: 沙嗲醬2湯匙

STEP 1
雞翼洗淨後與醃料醃約三十分鐘

STEP 2
爆香洋蔥後將雞翼煎至金黃盛起

STEP 3
爆香調味後將雞翼洋蔥回鑊後灒酒炒透至收汁即成

<<肉醬意粉>>
聽日學校假期~呵呵~好開心~唔駛接出接入~仲買咗飛入迪迪尼玩~希望聽日唔好落雨啦~

呢個意粉月月好BUY~佢一路食一路話好好味~哈~聽到佢話好味~就好開心架呢~!

材料: 牛絞肉及豬絞肉隨意, 蒜茸一湯匙, 蘑菇約十粒(用在抺乾淨後切片), 意粉約250G, 芝士碎隨意, 紅蘿蔔及薯仔粒隨意
調味料: 去皮蓄茄約4個, 黃糖約二茶匙, 鹽少許

STEP 1
煲滾水後下少許鹽同油~拌入意粉大火煮熟(包裝上有講煮幾耐架~再瀝乾水份)

STEP 2
爆香蘑菇片後拌入肉碎炒香, 下蒜茸兜勻

STEP 3
拌入蓄茄及紅蘿蔔及薯仔粒兜炒片刻後下少許糖同鹽再調味煮至杰身~

STEP 4
將醬汁淋上意粉上再灑上芝士碎即成~!~!

<<黑松茸炒肉丁>>
呢排見到商場已經準備緊聖誕裝飾喇~唸起上年月月仲喺一舊飯咁~今年佢呢?一見到就不停問我幾時聖誕呀!~哈~~一年真係過得好快~好快又老1歲喇~!

街市阿姐介買黑松茸~口感幾好同味道唔錯~黃先生話可以再買~睇黎又多個選擇~!

材料: 豬肋條約400G, 紹酒小半碗, 黑松茸1碗
醃料1: 生抽1湯匙, 糖2茶匙, 油及生粉少許, 胡椒粉少許
調味: 黑胡椒少許

STEP 1
豬肋條洗淨後與醃料醃約二十分鐘; 黑松茸用濕布清楚乾淨

STEP 2
燒紅鑊後將豬肋條煎至金黃盛起

STEP 3
炒香黑松茸將豬肉回鑊後下調味後灒酒煮透即成~!

<<鹹魚土魷蒸肉餅>>
家下鹹魚土魷好貴咁…嗱..黃師奶買咗舊馬友就24蚊~買條土魷就23蚊~舊半肥瘦呢~就20蚊啫~舊鹹魚就叫做分到2餐~算係咁~!

以前好怕整肉餅~家下呢~煮得多~唔會變鉄餅~滑滑肉餅好送飯~手剁就仲好味呢~!

材料: 半肥瘦20蚊 (叫豬肉佬揀夠肥D~一係叫佢答夠肥膏俾你啦), 土魷1隻, 鹹魚1小件
醃料: 生抽約1湯匙, 糖1茶匙, 胡椒粉少許, 麻油及生粉各1茶匙, 水3湯匙, 麥皮1大匙

STEP 1
豬絞肉(手剁後)與醃料(除水外)拌勻醃約20分鐘備用

STEP 2
土魷用水浸軟後去衣切小塊

STEP 3
將醃好嘅豬肉慢慢加入水及麥皮~!之後向同一個方向攪至起膠! (可以放入個保鮮袋到撻)~記得d水要完全吸收哂喔

STEP4
煲滾水後將豬肉跟土魷拌勻再鋪上鹹魚上碟碟~大火蒸約12-15 分鐘即成~!