黃師奶廚藝小百科

黃師奶烘培工作坊

想跟黃師奶整靚靚動物cupcake, 請即報名參加
黃師奶烘焙工作坊啦! 黃師奶烘焙工作坊

黃師奶專欄

日日煮星級「煮」廚


SalaD blog 星級blogger


點煮網推介用戶


myTaste.tw

Google+ Badge

舊日文章

蒜香蝦

20190731蝦蝦
<<蒜香蝦>>
冇啦啦今日大家多咗半天假~一早起床天文台仲話未打得成風嘅~落去食個早餐~玩玩下又話中午掛~唸住去買條菜啦~嘩~多人到呢~~差D以為打仗呢~!

買咗斤蝦~唔想咁懶白烚~咁就用蒜茸椒絲炒~煎香D蝦~味道唔錯呢~!

材料: 鮮蝦約1斤, 蔥段少許
調味: 蒜茸及椒絲適量, 鹽少許, 紹酒小半碗

STEP 1
鮮蝦去腳開邊後洗淨抺乾水份後跟少許2生粉拌勻

STEP 2
燒紅鑊後將蝦煎香至金黃盛起

STEP 3
爆香蒜茸及椒絲後將蝦回鑊後灒酒下鹽調味炒透下蔥段兜勻即成

大家可以Click入 黃師奶廚藝小百科 facebook 粉絲專頁度交流吓吖~!!!

氣炸鍋 – XO雞球

20190721雞氣XO
<<氣炸鍋 – XO雞球>>
一到星期一~新聞就不斷播返D示威畫面~最爆係月月家下睇得多…自己玩嗰陣..拎住D玩具講"示威呀~示威呀"~~曾經解釋過俾佢聽發生咩事~不過佢梗係一知半解啦~家下社會變到咁~都唔知佢大D會變成點…

又來氣炸~整雞肉係最方便~因為D雞皮夠油~整出黎好JUICY!~今次加咗XO醬~辣辣哋好惹味架~!

材料: 雞脾肉2塊(切小件)
雞肉醃料: 生抽約1湯匙 , 糖及薑茸一茶匙 , 胡椒粉少許, 麻油及生粉少許
調味: XO醬隨意

STEP 1
雞與醃料拌勻醃1小時

STEP 2
雞肉跟調味拌勻

STEP 3
放入氣炸鍋用200度火煮約20分鐘即成~!

 

大家可以Click入 黃師奶廚藝小百科 facebook 粉絲專頁度交流吓吖~!!!

蝦醬蒸肉餅

20190721肉餅
<<蝦醬蒸肉餅>>
呢2日天氣好熱呀!~出一出去都成身汗~日日同月月咪埋喺室內遊戲室玩~真係唔想做水人呢~!

豬肉真係好貴呀!~以前蒸一大碟都係20蚊到…今日就50蚊先得~真係唔知幾時先平返呢~!

材料: 半肥瘦20蚊 (叫豬肉佬揀夠肥D~一係叫佢答夠肥膏俾你啦), 土魷1隻, 冬菇粒少許
醃料: 生抽及蝦醬約1湯匙, 糖1茶匙, 胡椒粉少許, 麻油及生粉各1茶匙, 水3湯匙, 麥皮1大匙

STEP 1
豬絞肉(手剁後)與醃料(除水外)拌勻醃約20分鐘備用

STEP 2
土魷用水浸軟後去衣切小塊; 冬菇浸軟切粒

STEP 3
將醃好嘅豬肉慢慢加入水及麥皮~!之後向同一個方向攪至起膠! (可以放入個保鮮袋到撻)~記得d水要完全吸收哂喔

STEP4
煲滾水後將豬肉跟土魷同冬菇拌勻再鋪上碟~大火蒸約12-15 分鐘即成~!

 

 

大家可以Click入 黃師奶廚藝小百科 facebook 粉絲專頁度交流吓吖~!!!

彩椒牛舌

20190721牛舌
<<彩椒牛舌>>
呢幾日睇到D新聞~好似睇戲咁…成班人可以見人就打…警察唔理….第日又話再黎過..搞到D鋪頭都閂門…今個星期六又話去光復~希望唔好太多人受傷啦~!

牛肉貴~豬肉貴~唯有轉食下其他~今日喺一田買咗PACK牛舌~都唔錯呢~!可以一試~!

材料: 急凍牛舌1pack, 三色椒及洋蔥絲隨意
醃料: 油及糖少許, 生粉1茶匙, 生抽約2湯匙, 胡椒粉少許
調味: 蒜茸約2茶匙, 黑胡椒少許

STEP 1
牛舌跟醃料拌勻備用; 三色椒切小件

STEP 2
燒紅鑊後爆香洋蔥將牛舌炒至轉色盛起

STEP 3
下三色椒兜炒片刻後將牛舌回鑊; 下調味再煮至熟透即成

 

大家可以Click入 黃師奶廚藝小百科 facebook 粉絲專頁度交流吓吖~!!!

焗鮮魷

20190721xo
<<焗鮮魷>>
呢幾日終於落出雨喇~天氣冇咁翳焗~唔駛日日乾蒸咁~雖則7月已經過咗一大半~不過夏天仲未離我而去..真係好辛苦~!

買咗條魷魚~唔駛食豉椒炒魷~咁就放入焗爐算數~慳水慳力~仲唔駛咁熱呢~!

材料: 魷魚1條
汁料: 蒜茸約2茶匙, 生抽約1湯匙, 水小半碗, 紹興酒約2湯匙, 辣椒絲隨意, 麻油及魚露少許, 胡椒粉少許

STEP 1
魷魚洗淨去內臟後切細件, 跟汁料拌備用

STEP 2
預熱焗爐180度15分鐘

STEP 3
將魷魚焗約15分鐘即成

大家可以Click入 黃師奶廚藝小百科 facebook 粉絲專頁度交流吓吖~!!!

豉油雞翼/雞蛋

20190715雞雞
<<豉油雞翼/雞蛋>>
呢幾日天氣好翳焗呀!~天文台話有個風~不過應該唔會打得成~但係呢…又濕又熱好辛苦~好在家下唔駛返學~唔係接出接入好快變水人~!

屋企點都有袋雞翼看下門口~今次整雞時加多幾隻蛋~月月好鍾意食架~一個人仔食到2隻蛋~!好擦得架~

材料: 雞翼15隻, 烚熟雞蛋2隻
雞翼醃料: 鹽及檸檬汁少許
汁料: 生抽1/2杯, 老抽1/4杯, 開水約1杯 , 紹酒1大匙,冰糖一粒, 陳皮一小塊, 香葉少許, 花椒少許, 八角一粒

STEP 1
將雞翼同醃料拌勻醃約2小時備用

STEP 2
將汁料煮至大滾後拌入雞翼大火煮約3-4分鐘後熄火焗10分鐘至浸熟再拌入雞蛋浸至入味即可~

 

大家可以Click入 黃師奶廚藝小百科 facebook 粉絲專頁度交流吓吖~!!!

牛腱

20190715牛牛
<<牛腱>>
今日又返上黎除草喇~!唉…之前同月月賀生日時可能玩到太激~隻衰豬病鬼咗~好在過咗生日會先黎病咋~唔係呢~!就沒趣爆燈~!!

豬肉貴~牛肉都唔平~買咗條花腱黎炆~一D都唔平~唔知幾時先平返呢D鮮肉?!

材料: 牛腱1條 , 上湯 3升, 八角一粒 , 花椒半茶匙, 桂皮香葉少許, 冰糖少許
汁料: 煮牛腱湯半碗, 蒜茸椒絲少許, 麻油少許

STEP 1
煲滾水後下少許薑及蔥段, 將牛腱汆水

STEP 2
將牛腱略略煎香 ; 拌入花椒八角等香料後注入上湯煮滾

STEP 3
細火炆煮約30分鐘後熄火焗30分鐘; 重複

STEP 4
再細火炆煮約30分鐘後熄火焗30分鐘放涼切片配上汁料即成

大家可以Click入 黃師奶廚藝小百科 facebook 粉絲專頁度交流吓吖~!!!

K1生涯

IMG_1661

今日係K1學期家長日~!而因為月月個爸爸唔得閒~我又要湊住月月返學校啦~!!一如以往…隻衰豬又要喊….讀咗成年…一有少少唔同就適應唔到要喊…真係搞到我頭都大埋….

成個學期結束~老師嘅評語都好正面~月月好多嘢都係識嘅~不過性格就好內斂同唔喜歡表現自己…所以呢..只要佢一舉手主動答問題或者做一啲嘢..老師都會讚美佢..希望佢有所改善~!

其實我知道月月佢好靜…老師都話佢從來唔爭玩具~!守秩序~!係個好寶寶..所以學校頒咗個操行獎俾佢.~!哈~~其實媽媽想你多嘢講D~爭下嘢唔好俾人蝦架…點知乖到咁…不過呢~!有獎拎點都高興嘅~!

大家可以Click入 黃師奶廚藝小百科 facebook 粉絲專頁度交流吓吖~!!!

4歲喇~~!!

66368812_2876755385699467_377204274410553344_n
YEAH!~~~

我家月月今日4歲喇~~~! 媽媽祝你生日快樂~! 快高長大!~健健康康!~ 日日開心笑~!!

唸唸下日子真係過得好快呀!~~媽媽仲記得你剛剛出世嗰時咩情景~仲有你初生時嘅呢HEA 情況~~話咁快就4歲大喇~!希望你大個咗仲好似家下咁同媽媽咁親蜜啦~!

家下隻衰豬放學時已經有男仔話等埋佢走…過多幾年…可能都唔係我送佢返學放學….小朋友真係大得好快呢~!哈哈~~~

大家可以Click入 黃師奶廚藝小百科 facebook 粉絲專頁度交流吓吖~!!!

大阪2019

IMG_1289 IMG_0958 IMG_0957 IMG_0713

哈~黃師奶返咗黎喇~今次同月月去咗大阪玩呀!~~同上幾次旅行一樣~有咗月月之後~都冇咩SHOPPING同參觀景點架喇~全部都變咗親子之行~同隻衰豬去咗麵包起人館~又去玩LEGO同睇小動物~唔少得就係去PLAYHOUSE同遊樂場~月月真係玩得好開心架~~

今次去到天氣麻麻哋~好在冇太大陽~而月月呢?喺飛機到都睇咗1/3程~搭車又冇咩扭計~算係好乖喇~~去完今次~應該短期都唔會再去喇~~因為…佢爸爸冇咁多假呢~~嗚嗚~~~

大家可以Click入 黃師奶廚藝小百科 facebook 粉絲專頁度交流吓吖~!!!