黃師奶廚藝小百科

<<雞年 – 蘿蔔糕>>
今日已經係年廿八喇~大家執乾淨屋企未呀?!而黃師奶呢~就冇執屋LU~其實日日都已經執~間屋都好整齊~所以冇呢個習慣~呵~家下囡囡瞓咗覺~等佢醒咗再去行花市~~見識下~!

材料: 蘿蔔三斤
餡料: 半條臘肉, 一條臘腸, 一條膶腸, 6隻冬菇, 蝦米及瑤柱隨意
調味料: 一茶匙雞粉, 一茶匙糖, 一茶匙胡椒粉及五香粉少許
粉漿: 粘米粉80g, 鷹粟粉160g, 蘿蔔湯400g (完全拌勻)
煮蘿蔔水: 浸菇水150g杯

STEP 1
蘿蔔刨絲~其中約一碗蘿蔔切粗絲; 冬菇浸軟後去蒂切粒(浸菇水留用)

STEP 2
蝦米及瑤柱浸軟; 臘肉,臘腸同膶腸用熱水沖淨後切粒

STEP 3
燒紅鑊後將臘肉,臘腸同膶腸炒香~炒到好香出油後拌入蝦米, 冬菇粒及瑤柱爆香盛起

STEP 4
原鑊拌入蘿蔔連刨蘿蔔時的汁炒片刻~加150g浸菇水煮至蘿蔔剛軟身再下調味

STEP 5
將剛煮起的蘿蔔隔去上湯, 留起蘿蔔上湯約400g用黎開粉漿

STEP 6
唔駛開火~再拌入其他餡料兜勻

STEP 7
拌入粉漿~不斷兜勻~ 再開慢火兜勻至收水~收水後熄火再完全拌勻所有餡料

STEP 8
將器皿掃油後拌入餡料鋪平 , 大水隔水蒸約60分鐘後即成~

<<雞年 – 芋蝦>>
HAPPY FRIDAY!~今日下午黃先生放假~哈~咁黃師奶就有時間出去剪個頭髮~話哂下星期過年~點都要見下人..執下個樣…廢事嚇親人~!

又來個應節小食~芋蝦呢~刨下刨下~之後就係炸喇~~今年唔炸得多呀!~因為黃師奶仲咳到死死下~都係整咗少少俾黃先生食下應下節呢~!

材料:芋頭550G, 沾米粉約1.5個湯匙 , 糯米粉約1.5個湯匙 , 鹽及五香粉少少 , 紹酒一茶匙, 芝麻適量

STEP 1
芋頭洗刨去皮刨絲~

STEP 2
芋頭絲加埋其他材料拌勻;

STEP 3
燒熱油後轉細火~炸至金黃盛起隔去油份即成~!

<<猴年 – 年糕>>
今日已經係年廿六喇~黃師奶喺到同大家拜過早年~祝大家來年幸福滿滿~~開開心心~!呵~~年宵市場已經開哂喇~大家去行咗未?!黃師奶唸住一陣同囡囡去八下~買返個氣球過佢玩下~~~

出埋呢底年糕~都係時候收爐~!今次冇玩顏色呀~因為餵媽媽奶~點都要健康D~!年糕做法好簡單~拌勻D材料就得~!方便過蘿蔔乾糕嗰D多多聲~大家快D整返底啦~!

材料: 棷漿 420 ml , 糯米粉 240g , 澄麵粉 60g , 糖190g , 橄欖油 3茶匙

STEP 1
將粉類篩2次

STEP 2
慢火溫熱棷漿, 拌入糖煮至溶化

STEP 3
將有糖棷漿與粉類拌勻至無粉粒, 注入橄欖油拌勻. 再將粉漿篩3次 (咁會更滑)

STEP 4
倒入其餘粉漿, 大火隔水蒸約30分鐘, 待涼脫模即成~!

<<猴年 – 芋頭糕>>
天氣真係怪~早嗰幾日天氣凍到2-3度~搞到要開暖爐~呢幾日呢?!嘩~好似大地回春咁….濕到爆…即變咗長開抽濕機…怪到暈…仲有十日到就過年..唔知道到時咩天氣呢?!

今日來個芋頭糕先~!芋頭糕D功夫就簡單好多~切芋頭點都好過刨蘿蔔吖~!呵呵~~煎香咗做早餐~加少少辣醬好好味呢~!大家都整返D黎應下節啦~!

材料: 芋頭一斤
餡料: 半條臘肉, 一條臘腸, 一條膶腸, 6隻冬菇, 蝦米及瑤柱隨意
調味料: 一茶匙雞粉, 一茶匙五香粉, 一茶匙胡椒粉
粉漿: 粘米粉170g, 澄麵粉10g, 浸菇水2杯 (完全拌勻)
煮芋頭水: 浸菇水2杯

STEP 1
芋頭 去皮切粒; 冬菇浸軟後去蒂切粒(浸菇水留用)

STEP 2
蝦米及瑤柱浸軟; 臘肉,臘腸同膶腸用熱水沖淨後切粒

STEP 3
燒紅鑊後將臘肉,臘腸同膶腸炒香~炒到好香出油後拌入蝦米, 冬菇粒及瑤柱爆香盛起

STEP 4
原鑊拌入芋頭炒香~之後盛起一碗芋頭粒留用

STEP 5
注入2杯浸菇水後將芋頭煮至滾起 後下調味料試味~再拌入其他餡料及芋頭粒兜勻

STEP 6
拌入粉漿~不斷兜勻至收水~收水後熄水再完全拌勻所有餡料

STEP 7
將器皿掃油後拌入餡料鋪平, 大水隔水蒸約30分鐘後即成~

<<猴年 – 千層紅棗糕>>
呢2日真係堅凍~!成世女都未試過咁凍咁~一落到街~D風大到呢…..家住49樓嘅黃師奶呢…成晚好似打風咁….D風聲勁到呢…而黃師奶又成晚驚囡囡凍…搞到呢2晚冇乜點瞓~!做咗人媽媽~好似鐵人咁~!

今日已經係年十六喇~仲有2個星期就過年~黃師奶亦都開始糕糕ING喇~今年第一炮來個紅棗糕先~!今次玩逐層蒸~!如果懶的話~一次過蒸係冇問題嘅~!!黃師奶想D紅棗味再出D~所以用咗香棗片糖~!大家試下啦~!

材料: 去核紅棗300G , 水 1升 , 木薯粉250 . 澄麵25G , 香棗片糖2-3片

STEP 1
紅棗洗淨後注入水後煮30分鐘, 加入香棗片糖後煮溶熄火焗約2小時 ; 將粉類拌勻

STEP 2
將紅棗輕輕按壓後隔出紅棗水約800ML ( 過篩2-3次)

STEP 3
將紅棗水跟粉類伴勻至無粉粒再過篩

STEP 4
煲滾水後先蒸第一層(每層5-6分鐘); 注入最後一層後再蒸約15-20分鐘即成~!