黃師奶廚藝小百科

<<鹽焗蝦>>
其實每日我同月月都會去行下樓下個公園~因為實在唔想屈住喺屋企~希望月月身心可以健康一啲~行下HEA下竟然撞到鄭嘉穎湊仔喎!~以前喺TKO就成日撞見TBB D 人~估唔到家下都會撞到~!

今日買咗游水蝦~唔想就咁白烚呀!~咁就鹽焗啦~簡簡單單食咗鮮味呢~!

材料: 蝦斤
調味: 鹽適量 (鋪滿個煲底), 黑胡椒1-2茶匙

STEP 1
將鮮蝦洗淨; 抺乾水份備用

STEP 2
白鑊烘香鹽及黑胡椒 (約2-3分鐘), 拌入鮮蝦後蓋上蓋煮約4-5分鐘即成 (時間要睇返鮮蝦大小而定)

 

大家可以Click入 黃師奶廚藝小百科 facebook 粉絲專頁度交流吓吖~!!!

<<龍蝦湯>>
呢個湯….大大話話5年冇煲過…因為太多步驟~仲要買材料拎餐死….不過前幾日黃先生生日…佢發過噏風話我好耐冇煲…咁就即煲啦~~

今次我買咗3隻龍蝦煲~好鮮甜~嗱~唔係大大隻嗰D呀!~不過又唔係細細隻~中碼啦~太大用黎煲湯好嘥~太細又落3隻又太少~哈~

材料: 龍蝦3隻, 西芹兩大條, 紅蘿蔔一條, 薯仔兩個, 洋蔥兩個, 蕃茄三個, 茄膏兩湯匙~百里香少少(自己鍾意用乜就用乜啦~)~魚湯六杯+清水兩杯

STEP 1
龍蝦先放尿~斬件起肉~~~再用180度焗爐焗45分鐘至香香~~

STEP 2
洋蔥去皮切絲~薯仔/紅蘿蔔/西芹/蕃茄去皮後切丁~

STEP 3
煮溶少少牛油後爆香洋蔥~加入茄膏兜勻~再拌入薯仔/紅蘿蔔/西芹/蕃茄炒香~最後放入已焗好嘅龍蝦~炒香~加入香草~~

STEP 4
再注入魚湯+水 ~~大火煮滾後再小火煲最少3個小時 ~(煲好d變咗龍蝦上湯)

STEP 5
隔去龍蝦殼~將蔬菜類食材用攪拌器打爛~~再加入適量龍蝦上湯煮至合適濃度

STEP 6
燒紅鑊後爆香少少蒜茸~拌入龍蝦肉~炒透~加入湯中煮滾即食~!!

 

大家可以Click入 黃師奶廚藝小百科 facebook 粉絲專頁度交流吓吖~!!!

<<花甲蒸水蛋>>
家下月月嗰爸爸工作比以前忙咗好多~為咗唔想月月太夜瞓~家下轉咗留返D飯暖住俾佢食~我哋自己就食咗先~有時都唔太敢煮菜..幾暖住D菜變得好黃呢~!

今日買咗D蜆~加咗D蛋落去蒸~阿女就專食水蛋~我哋就食蜆~呢個食法唔錯~!

材料: 花甲一斤, 蛋3隻, 上湯250ml

STEP 1
花甲用鹽水浸泡最少3小時後煲滾水再煮至開口

STEP 2
先將碟蒸熱至水滾; 將已煮熟嘅花甲拌入碟中; 蛋及上湯拌勻

STEP 3
將STEP 2 蛋汁倒入碟中後蓋錫箔紙, 大火蒸3分鐘後焗20分鐘即成

 

大家可以Click入 黃師奶廚藝小百科 facebook 粉絲專頁度交流吓吖~!!!

<<焗鮮魷>>
呢幾日終於落出雨喇~天氣冇咁翳焗~唔駛日日乾蒸咁~雖則7月已經過咗一大半~不過夏天仲未離我而去..真係好辛苦~!

買咗條魷魚~唔駛食豉椒炒魷~咁就放入焗爐算數~慳水慳力~仲唔駛咁熱呢~!

材料: 魷魚1條
汁料: 蒜茸約2茶匙, 生抽約1湯匙, 水小半碗, 紹興酒約2湯匙, 辣椒絲隨意, 麻油及魚露少許, 胡椒粉少許

STEP 1
魷魚洗淨去內臟後切細件, 跟汁料拌備用

STEP 2
預熱焗爐180度15分鐘

STEP 3
將魷魚焗約15分鐘即成

大家可以Click入 黃師奶廚藝小百科 facebook 粉絲專頁度交流吓吖~!!!

<<氣炸鍋 – 蝦>>
今日天氣陰陰涼~不過就KEEP住潮濕咗好多日呀!~究竟乾燥嘅冬天幾時返黎呀!~~見到堆衫都頭痛…抽濕機要長開抽衫呢…

哈~呢期仲係試緊新玩具~今次用黎整蝦~望落去見個殼好似好香口咁~不過係唔似炸完咁脆同易入口…所以呢~都係白烚好啲~洗都冇咁煩~哈~~

材料: 海中蝦約一斤
調味: 蒜茸辣椒絲少許

STEP 1
海中蝦洗淨後跟調味拌勻

STEP 2
放入氣炸鍋用180度火煮約6分鐘即成~!

大家可以Click入 黃師奶廚藝小百科 facebook 粉絲專頁度交流吓吖~!!!