黃師奶廚藝小百科

<<牛肉片炒銀針粉>>
WOO~返多2日~就放聖誕節假喇~心情實在無比興奮~我就約咗時段聽日先去轉海洋公園~不過又好驚人多到爆…但係未來一周好似天氣麻麻~如果聽日唔去…又唔知要等到幾時呢~!

買咗一包銀針粉~冇用上湯煮~快炒加埋牛肉~再加少少蒜茸椒絲調味~辣辣哋咁幾好味呢~!

材料: 牛肉250g , 洋蔥半個(切絲) , 銀針粉2碗, 老抽適量(調色), 蔥段椒絲少許
牛肉醃料: 生抽半湯匙, 蒜茸半湯匙, 糖及生粉各1茶匙, 胡椒粉及油少許, 水一湯匙|
調味: 蒜茸及豆瓣醬一大匙

STEP 1
牛肉跟醃料伴勻備用

STEP 2
燒紅鑊爆香洋蔥炒至軟身後拌入牛肉快炒至轉色

STEP 3
拌入銀針粉後加入老抽兜勻下調味再炒至乾身拌入蔥段椒絲炒透即成

<<豉椒排骨煲仔飯>>
呢家天氣一早一晚涼咗唔少~!最近湊完返學~就行一個地鐵站返家~感覺都幾舒服~當做下運動都唔錯~不過天氣熱時就咪搞…香港太濕焗始終…

秋風起~又煮下煲仔飯~!豉椒惹味~仲加埋少少飯焦~~唔錯唔錯!~!

材料:  白米2杯 , 水約 1.75杯(因為肉有肉汁, 所以我減咗水份)
豬肉材料: 腩排400g , 生粉一茶匙及麻油適量
腩排醃料: 生抽一湯匙, 老抽少許, 糖一茶匙, 胡椒粉少許, 蒜茸豆豉椒絲隨意

STEP 1
腩排洗淨後與醃料醃約二十分鐘再拌入調味醃一會 ; 煮前再將醃好嘅腩排與少許麻油及生粉拌勻~~

STEP 2
將白米洗淨; 煮滾白米加水煮至收乾水份

STEP 3
拌入腩排後蓋上蓋用小火煮約8-10分鐘, 如果想要飯焦~呢個時候可以較至中火煮多2分鐘

STEP 4
熄火後不要開蓋再焗最少15分鐘~食時灑上煲仔飯豉油即可~

<<臘味飯>>
呢幾日見到唔少口罩返咗貨~不過呢~價錢都唔平呀!~眼見家下日本同南韓都搞成咁~斷估仲會有一排緊張~今次呢個肺炎..唔知幾時先完呢…

家下少咗落街~唯有一次過買定多D食糧呢~家有臘肉~咁就蒸埋個飯~簡簡單單咁又一餐~!

材料:  臘腸兩條, 臘鴨脾一隻 , 白米2杯 , 水約 2杯多少少

STEP 1
將臘味用熱水沖一沖

STEP 2
將白米洗淨; 煮滾白米加水煮至收乾水份

STEP 3
拌入臘味後蓋上蓋用小火煮約7-8分鐘, 如果想要飯焦~呢個時候可以較至中火煮多2分鐘

STEP 4
熄火後不要開蓋再焗最少15分鐘~食時灑上煲仔飯豉油即可~

<<乾炒牛河>>
呢幾日天氣返風~條氣管真係準過天文台…早前已經開始咳~呢D氣管病睇黎冇乜得醫….我唸我第時長眠原因都係因為咳死多….

是日炒河粉~街市買少少~都夠你炒一大碟~不過呢~炒河好肥…食多幾餐實變肥師奶~!

材料: 牛肉250g , 洋蔥一個(切絲) , 炒河粉3碗, 老抽適量(調色), 蔥段少許
牛柳醃料: 生抽半湯匙, 蒜茸半湯匙, 糖及生粉各1茶匙, 胡椒粉及油少許, 水一湯匙

STEP 1
牛柳跟醃料伴勻備用; 炒河粉先分開一條條;

STEP 2
燒紅鑊爆香洋蔥炒至軟身後拌入牛柳快炒至轉色

STEP 3
拌入炒河粉後加入老抽兜勻炒至乾身拌入蔥段炒透即成

<<臘味飯>>
家下天氣好舒服~一早同月月公咗草地玩~吹下泡泡行下公園~咁又半日~隻衰豬跑起上黎都成頭汗架~不過呢~相比起夏天~真係舒服好多呢~!

秋風起~又係時候食臘味~哈~加多條菜~簡簡單單咁又一餐~!

材料:  臘腸兩條, 臘鴨脾一隻 , 白米2杯 , 水約 2杯

STEP 1
將臘味用熱水沖一沖

STEP 2
將白米洗淨; 煮滾白米加水煮至收乾水份

STEP 3
拌入臘味後蓋上蓋用小火煮約7-8分鐘, 如果想要飯焦~呢個時候可以較至中火煮多2分鐘

STEP 4
熄火後不要開蓋再焗最少15分鐘~食時灑上煲仔飯豉油即可~