黃師奶廚藝小百科

黃師奶烘培工作坊

想跟黃師奶整靚靚動物cupcake, 請即報名參加
黃師奶烘焙工作坊啦! 黃師奶烘焙工作坊

黃師奶專欄

日日煮星級「煮」廚


SalaD blog 星級blogger


點煮網推介用戶


myTaste.tw

近期迴響

Google+ Badge

紅酒炆羊膝

20170709羊羊紅1
<<紅酒炆羊膝>>
一早天氣唔太曬~同囡囡去咗轉公園~見佢玩得好開心~一陣間就變咗水人….冇錯…係水人….D汗多到嚇死人….

今日見吉吉島有羊膝賣~就買返家炆黎試下~平時通常都焗架~今次炆出黎好JUICY~個汁仲可以送飯同意粉~唔錯呢~!

材料: 羊膝2隻, 紅蘿蔔一條(去皮切大件) , 洋蔥一個(去衣切大件)
汁料:  紅酒250ML, 上湯500ML
調味料: 去皮蕃茄約4個, 黃糖約二茶匙, 鹽少許, 香草隨意

STEP 1
羊膝先出水去減啲油

STEP 2
爆香洋蔥再拌入羊膝略略煎香

STEP 3
拌入香草, 蕃茄及紅蘿蔔兜炒片刻後注入紅酒及上湯後用炆焗方法大火煮滾轉細~火炆煮約30分鐘後熄火焗30分鐘~!再重覆~~!

STEP 4
食前翻熱15分鐘再焗15分鐘即成~!

 

大家可以Click入 黃師奶廚藝小百科 facebook 粉絲專頁度交流吓吖~!!!

支竹羊腩煲

20151210羊羊
<<支竹羊腩煲>>
黃師奶日日追男親女愛~~話咁快做埋呢2日又完LU~~呢套劇真係好好睇呀~以前D劇真係冇家下咁膠~!黃昏做嗰套茶是故鄉濃都好好睇~重播都有追嘅衝動~!家下新嗰D呢?!黃師奶就寧願瞓覺都唔睇LU~

天氣凍凍哋~街市有羊腩賣LU~見咁耐冇食過~就買咗斤半返家炆LU~~阿肉佬係咁同我講話佢用咗3個羊頭煲湯好正~!!吖~~不過黃師奶就冇興趣食羊頭湯喇~就咁用蠔油炆黎食~!~食完暖笠笠~!

材料: 羊腩1.5斤, 炸支竹4兩, 蒜茸1湯匙, 乾蔥4-5粒(切片), 薑3-4片, 上湯適量, 半小碗紹酒
調味: 蠔油3-4湯匙

STEP 1
將羊腩汆水盛起備用

STEP 2
爆香乾蔥及薑片再拌入羊腩兜炒片刻; 下蒜茸炒香

STEP 3
下蠔油後不斷兜炒~再灒酒後下上湯至蓋過所有材料後煮滾再轉小火炆煮約半小時後熄火蓋上蓋焗半小時

STEP 4
拌入炸支竹後再煮滾~再轉小火炆煮約半小時後熄火蓋上蓋焗半小時

STEP 5
食前再翻熱~焗片刻~再拌上生菜/腐乳即可~

大家可以Click入 黃師奶廚藝小百科 facebook 粉絲專頁度交流吓吖~!!!

蒜蜜羊架

20150508羊羊HONEY
<<蒜蜜羊架>>
嘩~呢幾日真係唔知咩事~今朝仲要冇啦啦黑雲TIM呀!~黃師奶一聽到個黑雲消息~就炸炸林咁去超市買餸喇~~冇計啦~街市條路又遠又濕~家下個肚咁大~唔敢行去喇~落超市~都見到唔少人走咗去掃貨~好似打仗咁呀~好誇張呢~!

之前吉吉島特價~黃師奶又買左D羊架返來~黃先生好LIKE 食架~今次黃師奶就咁用海鹽蒜茸等黎醃~最好醃過夜啦~焗前可以界返幾刀先~因為咁樣會易熟好多呢~焗完之後REST返10分鐘~咁就好JUICY 呢~!

調味:海鹽及黑胡椒隨意 , 香草碎少許, 蒜茸適量及蜜糖2大匙, 橄欖油2大匙 (拌勻)

STEP 1
將羊架印乾水份, 用調味醃最少4小時備用 (醃過夜更好)

STEP 2
預熱焗爐220度, 焗約20-25分鐘至五成熟

STEP 3
將焗好羊架用錫紙包好再放上熱碟上REST 10分鐘即成

大家可以Click入 黃師奶廚藝小百科 facebook 粉絲專頁度交流吓吖~!!!

焗羊架

20140910羊羊
<<焗羊架>>
下星期又話打風LU!~唔知打唔打得成呢?!今年好似冇乜點打過風咁~家下都九月天~中秋都過咗~天氣仲好翳焗~個風打得成都應該會涼返D!~唔係真係焗到冇朋友呀!~~

黃師奶好少可成排羊架咁焗~哈~黃先生鍾意食羊肉~呢個羊架佢不停讚話好食好JUICY!~~黃師奶覺得用咗鹽同黑胡椒醃過已經好夠味~~不過PATPAT痕見有個汁張相靚D~大家可以SKIP咗個汁冇問題~哈~~

材料: 羊架約270g
調味: 鹽及黑胡椒隨意 , 香草碎少許
醬汁: 可隨個人喜好

STEP 1
將羊架印乾水份, 用調味醃最少4小時備用 (醃過夜更好)

STEP 2
預熱焗爐220度, 焗約20-25分鐘至五成熟

STEP 3
將焗好羊架用錫紙包好再放上熱碟上REST 10分鐘即成

 

大家可以Click入 黃師奶廚藝小百科 facebook 粉絲專頁度交流吓吖~!!!

蠔皇羊腩煲

20131226羊羊
<<蠔皇羊腩煲>>
哈~今朝黃師奶好HIGH喔~話說同黃先生去食早餐~有個路人甲問黃先生~

路人甲: 你條頸巾好靚喔~買定織架?!
黃先生: 哦~我老婆織俾我架~
路人甲望住我: 好靚呀織得~可唔可以教我織呀?!
黃師奶: 可以~

哈~之後黃師奶就同黃先生講~~呢個世界係得佢唔欣賞我織嘅作品架咋~~

呢幾日凍冰冰~最啱食個羊腩煲~呵呵~~買咗返黎汆水~~人懶呀!~就咁用個蠔油炆下算~~黃師奶炆嘢慣咗炆下焗下~一來慳煤氣~二來咁樣會腍身JUICY D ~~如果見炆到乾水就加少少~最後下個鹽/生抽調味就OK~ 食完暖笠笠~YUMMY!~~

材料: 羊腩一斤, 炸支竹2両, 馬蹄10粒, 半小碗紹酒
料頭: 薑3片, 蔥段及蒜隨意 , 乾蔥(切小片)
調味: 蠔油2湯匙

STEP 1
將羊腩汆水盛起備用

STEP 2
爆香料頭~拌入羊腩兜炒片刻

STEP 3
下蠔油後不斷兜炒~再灒酒至好香好香~~下水至蓋過所有材料後煮滾再轉小火炆煮約半小時後熄火蓋上蓋焗半小時

STEP 4
拌入馬蹄及炸支竹後再煮滾~再轉小火炆煮約半小時後熄火蓋上蓋焗半小時

STEP 5
食前再翻熱(可下少許鹽調味)~焗片刻~再拌上生菜/腐乳即可~

大家可以Click入 黃師奶廚藝小百科 facebook 粉絲專頁度交流吓吖~!!!