黃師奶廚藝小百科

黃師奶烘培工作坊

想跟黃師奶整靚靚動物cupcake, 請即報名參加
黃師奶烘焙工作坊啦! 黃師奶烘焙工作坊

黃師奶專欄

日日煮星級「煮」廚


SalaD blog 星級blogger


點煮網推介用戶


myTaste.tw

Google+ Badge

舊日文章

麻婆豆腐(簡易版)

20180809豬豬
<<麻婆豆腐>>
好大雨呀!~月月呢個年紀真係好搞笑~佢見到咁大雨~大大聲話~"嘩~!媽媽~好多水雨呀!!"..嗰下真係笑爆咀~我問佢係咪想講好多雨水呀..! 調轉黎講..意思好唔同喎.!!

見到超市出咗D咩咩川味麻辣醬~哈~黃師奶又忍住買下試下咩口味~麻辣就一般辣~不過好在夠方便~幾啱我哋D懶人~!

材料: 豬絞肉一碗, 滑豆腐一磚
豬肉醃料: 生抽半湯匙, 糖及生粉各1茶匙, 胡椒粉及麻油少許, 水2湯匙
調味: 川味麻辣醬約2湯匙, 紅油隨意

STEP 1
豆腐切丁後灑少許鹽等一會再隔去多餘水份

STEP 2
豬絞肉跟醃料伴勻備用

STEP 3
慢火爆香川味麻辣, 拌入豬絞肉略略兜炒片刻下豆腐後兜勻

STEP 4
灒酒煮至收汁後加少許辣椒油即成 (可加生粉水埋芡)

 

大家可以Click入 黃師奶廚藝小百科 facebook 粉絲專頁度交流吓吖~!!!

翠綠蝦仁

20180524蝦蝦
<<翠綠蝦仁>>
今早起身見黃雨~勁驚一陣返學勁呢HEA~好彩到放學都冇落過雨~不過家下打BLOG時又黃雨~呢個天好古怪呢~!

天氣又差又熱~少咗去街市~屋企有急凍蝦仁看門口~用黎炒翠肉瓜~簡簡單單又好味~~唔錯呢~!

材料: 蝦仁1碗, 翠肉瓜1條, 蒜茸少許
蝦仁醃料: 鹽及胡椒粉少許
調味: 鹽及辣椒碎少許

STEP 1
翠肉瓜洗淨後切小塊; 蝦仁洗淨後抺乾水份跟醃料拌勻備用

STEP 2
爆香蒜茸後將蝦仁煎香盛起

STEP 3
拌入翠肉瓜炒透後將蝦仁回鑊下調味即成

大家可以Click入 黃師奶廚藝小百科 facebook 粉絲專頁度交流吓吖~!!!

西蘭花炒帶子

20180601菜菜
<<西蘭花炒帶子>>
呢幾日天氣涼返唔少呀~同早前嗰2星期真係差好遠~雖則天氣唔多好~不過真係舒服好多呢~!

今次煮D帶子係刺身食用架~雖則貴少少~不過又好味D喎~間唔中一次半次冇所謂啦~!

材料: 西蘭花1棵, 帶子8-10隻
帶子醃料: 胡椒少許
調味: 鹽及蒜茸少許

STEP 1
西蘭花用鹽水浸洗乾淨後汆水片刻盛起

STEP 2
將帶子煎香後西蘭花回鑊炒透下少許調味即成

 

大家可以Click入 黃師奶廚藝小百科 facebook 粉絲專頁度交流吓吖~!!!

翡翠蝦仁

20171016蝦仁
<<翡翠蝦仁>>
少咗上黎除草..冇計..前幾日阿女夜晚扭咗2晚計..冇咩點瞓過…搞到自己病鬼咗…病到CC下..唉

自從月月返學後~就少咗日日去街市呢~屋企雪櫃就多咗唔少急凍食材~蝦仁就係其中之一~剥好哂~唔駛整時先搞咁…真係幾方便呢~!

材料: 蝦仁1碗, 露筍5-6大條, 蒜茸1大匙
醃料: 鹽及胡椒少許

STEP 1
露筍洗淨後去除根部切小塊汆水備用; 蝦仁抺乾水份後跟醃料拌勻備用

STEP 2
爆香蒜茸後拌入蝦仁兜炒至半熟後拌入露筍煮透即成~!

大家可以Click入 黃師奶廚藝小百科 facebook 粉絲專頁度交流吓吖~!!!

翡翠杏鮑菇

20171008菇菇
<<翡翠杏鮑菇>>
又少咗上黎除草…唉..囡囡出疹…燒咗4-5日…呢幾日佢扭到爆炸..夜晚又瞓得差…仲要出玫瑰疹…一年內出咗2次…真係玩C人….

喺一田見到D杏鮑菇同露筍好抵賣~又新鮮~唸都冇唸又買返家炒埋佢~哈~加少少蠔油~好簡單~不過味道幾好架~!

材料: 杏鮑菇1包, 露筍隨意
汁料: 蠔油1湯匙, 水3湯匙, 糖少許

STEP 1
露筍洗淨後切去尾部; 杏鮑菇用濕毛巾抺乾淨後切塊

STEP 2
將露筍汆水約2分鐘盛起

STEP 3
煎香杏鮑菇後下汁料兜炒片刻後將露筍回鑊兜勻即成

大家可以Click入 黃師奶廚藝小百科 facebook 粉絲專頁度交流吓吖~!!!

鹹魚滑雞豆腐煲

20170621雞雞魚
<<鹹魚滑雞豆腐煲>>
呢幾日聽嘢唔多清楚…今日走咗去睇醫生..原來耳煙管塞咗…應該係感冒處理得唔好~搞到咁~又冇幾舊水….食住藥仲要湊女~煩~!

呢個餸好香鹹魚味~唔錯唔錯~爆香D鹹魚嗰陣真係隔離屋都聞到~呵呵~~個汁仲好好送飯~大家可以一試喔~!

材料: 雞1隻 , 百頁豆腐一大塊(切細件) ,  鹹魚半舊, 薑2片, 紹酒小半碗
雞肉醃料: 鹽適量
汁料: 生抽約1湯匙 , 老抽半湯匙, 糖一茶匙 , 胡椒粉少許, 麻油少許, 水大半碗

STEP 1
雞與醃料拌勻醃4小時; 鹹魚去骨拆肉

STEP 2
爆香薑~拌入雞件煎香至金黃盛起

STEP 3
炒香鹹魚後將雞件回鑊後兜炒片刻再拌入百頁豆腐後灒酒

STEP 4
加汁料蓋過所有材料後煮滾轉細火炆煮約25-30分鐘至收汁 (可加生粉水埋芡) 即成~

大家可以Click入 黃師奶廚藝小百科 facebook 粉絲專頁度交流吓吖~!!!

釀蘑菇

20170608菇菇
<<釀蘑菇>>
今朝月月喺樓下扭食糖爆喊…黃師奶就唔想就範…唯有等佢喊飽佢再同佢返屋企冇得去公園…隻衰豬真係一路大喊喊到返家繼續喊..最後緊係知衰啦~不過沿途好多花生友…厚多士…煩到呢~!

見到超市有超大蘑菇賣~哈~咁就即買返家試~煮時釀咗少少豬肉~再煎香~唔錯架~大家可以一試~!

材料: 大蘑菇2隻 (用布清潔乾淨), 豬柳梅約200G, 雞蛋一隻 (發勻)
汁料: 生抽約1湯匙, 糖1茶匙, 胡椒粉少許, 麻油及生粉各1茶匙, 水半碗
醃料: 生抽約1湯匙, 糖1茶匙, 胡椒粉少許, 麻油及生粉各1茶匙, 水3湯匙

STEP 1
豬絞肉與醃料(除水外)拌勻醃約20分鐘備用

STEP 2
將醃好嘅豬肉慢慢加入水~!之後向同一個方向攪至起膠! (可以放入個保鮮袋到撻)~記得d水要完全吸收哂喔

STEP 3
將蛋汁拌入豬肉中至完全吸收

STEP 4
蘑菇沾上生粉後再釀入豬肉

STEP 5
將釀好的蘑菇煎香2後再灑上汁料煮至熟透即成~!

大家可以Click入 黃師奶廚藝小百科 facebook 粉絲專頁度交流吓吖~!!!

黑椒蘑菇焗雞翼

20170504雞雞
<<黑椒蘑菇焗雞翼>>
HAPPY FRIDAY!~今日見返太陽伯伯喇~尋日一早場雨真係好大~本來唸住今日都唔會好天~誰不知又唔錯喎~不過天氣有D焗咁呢~!

買咗盒蘑菇俾囡囡食~點知隻衰豬試都唔肯試…咁就夜晚食飯焗雞翼嗰陣加埋落去~食得唔好嘥~食起上黎又有蘑菇香味~唔錯架~!

材料: 雞槌+雞翼約1磅, 蘑菇1盒(用紙巾抺乾淨)
醃料:  鹽及黑胡椒粉各1-2茶匙, 香草碎少許, 牛油溶液小半碗

STEP 1
將雞件洗淨後跟醃料醃最少4小時; 蘑菇用少許鹽及黑胡椒調味

STEP2
預熱焗爐220-230度

STEP 3
將雞件及蘑菇焗約30分鐘即成(各人爐火唔同~要注意喔)

 

大家可以Click入 黃師奶廚藝小百科 facebook 粉絲專頁度交流吓吖~!!!

鮮蝦豆腐蒸水蛋

20170317豆腐蛋蛋蝦
<<鮮蝦豆腐蒸水蛋>>
大家有冇追特首論壇呀?!黃師奶唔識政治~不過都覺得幾好睇架~好睇在睇下薯片叔叔有時串人都幾搞笑~睇LIVE仲見到好多LIKE LIKE 俾薯片叔叔~最後邊個做特首?仲有幾日就知LU~

呢個餸有豆腐~又有水蛋~哈~清清哋咁又好送飯~真係唔錯架~而且都幾啱小朋友食~媽媽們可以試下喔~!

材料: 蝦仁10-12隻, 豆腐一磗, 蛋3隻, 上湯250ml
蝦仁醃料: 鹽及胡椒粉少許

STEP 1
豆腐切丁 ( 豆腐可於煮前灑少許鹽蒸約5分鐘再切隔去水份) ; 蝦仁洗淨後抺乾再跟醃料拌勻

STEP 2
先將碟蒸熱至水滾; 將蝦仁及豆腐放入碟中; 蛋及上湯拌勻

STEP 3
將STEP 2 蛋汁倒入碟中後蓋錫箔紙, 大火蒸5分鐘後焗20分鐘即成~!

 

大家可以Click入 黃師奶廚藝小百科 facebook 粉絲專頁度交流吓吖~!!!

醬油拼盤

20160708豉油蛋
<<醬油拼盤>>
好潮濕呀!~~一早起床~就好似入咗仙境一樣~濕到呢….望唔到過對面架…衫又未乾….仲要狂抽濕抽乾佢….呢D天氣真係唔知要捱幾耐呢~!

今日呢~就整咗呢個醬汁拼盤~浸咗成個下午~好入味喔~整呢D拼盤小食幾好架~唔駛睇火~浸住就入味~啱哂黃師奶呢個日日忙湊女嘅媽媽~呵呵~

材料: 炸豆腐6磗, 熟透全蛋3隻
汁料: 萬字醬油2/3杯, 開水約1杯 , 紹酒1大匙,冰糖一粒, 陳皮一小塊

STEP 1
將汁料煮至大滾後拌入炸豆腐/雞蛋大火煮約3-5分鐘後熄火浸約4小時即成~

 

大家可以Click入 黃師奶廚藝小百科 facebook 粉絲專頁度交流吓吖~!!!