黃師奶廚藝小百科

黃師奶烘培工作坊

想跟黃師奶整靚靚動物cupcake, 請即報名參加
黃師奶烘焙工作坊啦! 黃師奶烘焙工作坊

黃師奶專欄

日日煮星級「煮」廚


SalaD blog 星級blogger


點煮網推介用戶


myTaste.tw

Google+ Badge

舊日文章

餐包 (米飯麵糊)

20140520飯飯包2
<<餐包 (米飯麵糊)>>
黃師奶同黃先生去完大澳返黎~哈~玩得好開心架~不過真係好熱呢~嗰間文物酒店真係好靚呀!~間房又大又舒服~如果有機會再去~哈~黃師奶唸應該唔會夏天去~因為好易變燒豬~呵呵呵~

呢張相係影得衰咗少少~希望大家唔好介意~黃師奶係有少少想突出返呢款包嘅軟熟度呀!~~今次呢個麵包呢~黃師奶係用咗米飯黎做個種~再加埋入主麵糰到整包~真係軟熟到呢~黃師奶真係冇買錯原味本書呀!~真係勁多嘢學呢~!!

米飯麵糊做法
材料: 1杯米 , 2杯水
做法: 用家用電飯煲按"煮飯"功能, 煮成比較稀爛嘅米飯; 放涼備用

主麵糰做法
材料: 米飯麵糊150g, 高筋粉240g, 酵母6g, 糖30g, 牛油30g, 雞蛋一個, 牛奶50g
鋪面用芝麻少許

STEP 1
將所有材料拌勻並搓揉至起筋; 發酵約1小時至倍大

STEP 2
排氣後再滾圓; 鬆弛15分鐘

STEP 3
整形後再發酵約45分鐘

STEP 4
預熱焗爐180度15分鐘, 掃上蛋水再焗包包約12-15分鐘即成

大家可以Click入 黃師奶廚藝小百科 facebook 粉絲專頁度交流吓吖~!!!

東芝變頻式蒸氣微波爐(型號: ER-GD400HK)食譜分享之莎樂美 PIZZA

20140427PIZZA
<<東芝變頻式蒸氣微波爐(型號: ER-GD400HK)食譜分享之莎樂美 PIZZA>>
黃師奶喜歡做薄脆 PIZZA~因為鍾意香脆口感~呵呵呵~家下黃師奶有咗呢部東芝變頻式蒸氣微波爐~家下做 PIZZA真係話咁易~PIZZA做得好食~首要條件係部爐夠熱~!!因為如果爐溫唔夠熱的話~咁就需用更長時間去焗熟個 PIZZA…麵糰就會吸哂啲醬汁從而令到 PIZZA 口感變得糊口喇~黃師奶今次用水波爐~爐內溫度可以迅速加熱至350度~有部可以瞬間將爐內溫度提升嘅水波爐~真係好方便喔~!

麵糰材料: 高筋粉 125g, 橄欖油 8g, 鹽少許, 水 70-75g餡料: 芝士碎, 莎樂美腸,茄膏少許

STEP 1
將麵糰材料拌勻, 搓至光滑即可, 無需起筋~麵糰於室溫靜止約 45分鐘備用

STEP 2
按”OVEN” 240度(有水蒸氣)按 PREHEAT; 用叉子將麵糰吉滿小孔再入焗爐後按”OVEN” 240度(有水蒸氣),時間定為 10分鐘焗至金黃

STEP 3
麵糰上搽上茄膏~鋪上莎樂美腸及芝士; 再按”OVEN” 240度(有水蒸氣),時間定為 5分鐘焗至芝士融化即成

大家可以Click入 黃師奶廚藝小百科 facebook 粉絲專頁度交流吓吖~!!!

東芝變頻式蒸氣微波爐(型號: ER-GD400HK)食譜分享之橄欖油麵包(中種法)

20140517OLIVE OIL 包
<<東芝變頻式蒸氣微波爐(型號: ER-GD400HK)食譜分享之橄欖油麵包>>
自從有咗部東芝變頻式蒸氣微波爐(型號: ER-GD400HK)之後~黃師奶嘅烘焙世界真係變得唔同哂~~呵呵呵~升咗呢好多呢~黃師奶最欣賞呢部水波爐嘅其他一個賣點就係佢嘅發酵功能喔~而且烘焙時仲可以加入水蒸氣~呵~咁黃師奶以 後一年四季都又香又軟熟嘅包包食喔~唔駛再擔心冬天發酵問題喔~!讚~~~

中種麵糰
材料: 高粉200g, 水135g, 酵母約1茶匙

主麵糰
材料: 高粉100g, 水65g, 鹽少許, 糖30g, 橄欖油20g, 中種麵糊全部

STEP 1
將中種麵糰嘅材料搓成麵糰(無須起筋);

STEP 2
將麵糰放入水波爐中後按”OVEN” 40度(有水蒸氣),時間定為90分鐘

STEP 3
將已發酵好嘅中種麵糰拌入主麵糰中將所有材料搓至起筋; 再將麵糰放入水波爐中後按”OVEN” 40度(有水蒸氣),時間定為45分鐘

STEP 4
將麵糰取出放氣在室溫鬆弛15分鐘;

STEP 5
整形後再將麵糰放入水波爐中後按”OVEN” 40度(有水蒸氣),時間定為40分鐘

STEP6
按”OVEN” 190度(有水蒸氣)按PREHEAT; 將麵糰噴濕再入焗爐後按”OVEN” 190度(有水蒸氣),時間定為15分鐘焗至金黃即成

大家可以Click入 黃師奶廚藝小百科 facebook 粉絲專頁度交流吓吖~!!!

水牛芝士帕爾瑪火腿薄餅

20140517PIZZA
<<水牛芝士帕爾瑪火腿薄餅>>
呢幾日天氣又濕又熱~睇黎夏天終於到LU~~怕熱嘅黃師奶又要捱3-4個月…嗚嗚嗚~~你哋唔明黃師奶又幾咁怕熱…一熱就會出汗..一出汗又會醃到D濕疹好痕…所以唯有長開冷氣…捱貴電費…

黃師奶今日又整PIZZA~呵呵~嗱~黃先生愛吃薄脆批~厚批唔係佢杯茶~哈~黃師奶冇加到酵母架~亦唔駛搓到PIZZA起筋~所以個PIZZA麵糰食譜超易做~今次呢個PIZZA 黃先生激讚~話咁快又清哂~!

麵糰材料: 高筋麵粉125g , 橄欖油8g , 水70-75g , 鹽少許
餡料: 水牛芝士及Parma Ham隨意
調味: 橄欖油及黑胡椒少許

STEP 1
將麵糰材料搓成糰(無須起筋); 鬆弛45分鐘

STEP 2
預熱焗爐240度15分鐘

STEP 3
將麵糰壓平~用叉子喺麵糰上吉出多個小孔; 灑上少許橄欖油及黑胡椒於麵糰上

STEP 4
將麵糰以240度火焗至金黃香脆; 再放上水牛芝士焗約5分鐘再鋪上Parma Ham即成

 

 

大家可以Click入 黃師奶廚藝小百科 facebook 粉絲專頁度交流吓吖~!!!

芝士包 (老麵)

20140503芝士包包
<<芝士包>>
呢2日睇新聞~見到阿局長收到黃金郵包~哈~係咪黃師奶心腸衰呢~真係一句抵你死喇~包容包容~都唔明點解局長你會去報警咁唔包容囉~香港係需要包容架~唔通周街柯紙就可以包容~送紙俾人就唔得?!

今次呢個麵包加咗老麵麵糰~黃師奶覺得唔錯唔錯~暫時最欣賞係將老麵麵糰加入法棍到做~呵呵呵~老麵麵糰記得唔好加得太多入主麵糰~始終老麵麵糰係一d發酵過度而帶酸性~一下子加得多~好易出事喔~

材料: 老麵麵糰50g , 高筋麵粉250g , 全麥麵粉50g , 酵母1茶匙 , 糖20g , 雞蛋1隻 , 100g芝士碎(X夫) , 牛油溶液30g , 水140g

老麵麵糰做法 (以下份量我可以做到2次麵包用)
材料: 高筋麵粉150g , 水75g , 鹽少許 , 酵母約2g
將所有材料拌勻後搓成麵糰(無須起筋)再放室溫發酵4小時 (有多就50g一pack 放雪櫃放到4日)

主麵糰做法

STEP 1
將所有材料拌勻並搓揉至起筋; 發酵約1小時至倍大

STEP 2
排氣後再滾圓; 鬆弛15分鐘

STEP 3
整形後再發酵約45分鐘

STEP 4
預熱焗爐180度15分鐘, 掃上蛋水再焗包包約12-15分鐘即成

大家可以Click入 黃師奶廚藝小百科 facebook 粉絲專頁度交流吓吖~!!!

免揉提子包(免揉法)

20140415包包
<<免揉提子包>>
一連4日假期又完咗lu!~呵~不過唔緊要啦~黎緊仲有五一同埋佛誕2日假期呢~!呵呵呵~今個假期~黃師奶就好忙lu!~教咗d 幼稚園學生整蛋糕曲奇~哈~~不過忙得黎都開心~點解?!之唔係做緊自己鍾意做嘅事真係完全唔同囉~呵~

黃師奶又黎愉懶LU!~哈~~今次整咗個唔駛搓到起筋嘅包包~搓好成糰後就咁喺室溫到發酵~由於發酵時間太長~~所以成個廚房都好大陣酒香味~哈~呢款包包啱哂懶人整~黃師奶都覺得口感幾特別~剛出爐切一片~~加杯茶~唔錯喔~!

材料: 高筋麵粉330g , 麥粉70g, 鹽少許 , 糖20g , 酵母約1茶匙, 水300g , 提子乾隨意

STEP 1
將所有材料搓成一糰 (無須搓至起筋), 再室溫發酵13-14小時

STEP 2
枱面上灑上少許高筋麵粉, 將發酵好的麵糰放於工作枱上再排氣

STEP 3
將麵糰搓成一大個圓形麵糰再發酵約1小時

STEP 4
預熱焗爐220度15分鐘

STEP 5
將麵糰灑上少許水; 焗約30分鐘即成 (當麵糰焗約10分鐘後, 再灑水一次)

大家可以Click入 黃師奶廚藝小百科 facebook 粉絲專頁度交流吓吖~!!!

乾果麵包 (中種法)

20140406包包
<<乾果麵包>>
剛剛個星期~黃師奶就已經pack 好哂d厚衫厚被去洗~一落到去洗衣鋪~就話做到5月唔做lu~唉…早前咪話黃師奶住嗰到會改革嘅…連洗衣鋪..診所..小鋪..全部5月就byebye…"丁頁"!d商場為咗搵人仔..搞到我哋d居民好唔方便呀!!

嗱~家下天氣暖返咁多~黃師奶就變返日日做包的日子~今次呢款包包呢~就用咗好多唔同乾果果仁做餡料~其實黃師奶冇落蛋架~但係點解個包咁黃呢?就係因為黃師奶加埋d 乾果入去搓同發酵~黃先生激讚話好食~哈~~

中種麵糊
材料: 高粉130g, 水250g, 酵母半茶匙

主麵糰
材料: 高粉280g, 水30g, 鹽少許, 糖20g, 乾果(隨意)80g, 中種麵糊全部

STEP 1
將中種麵糊嘅材料拌勻至冇粉粒糊狀~發酵約2小時備用

STEP 2
將已發酵好嘅中種麵糊拌入主麵糰中所有材料(等差不多起筋就加埋d乾果再搓)搓至起筋; 發酵約1小時

STEP 3
將麵糰取出放氣再鬆弛15分鐘; 整形再發酵1小時

STEP 4
預熱焗爐220度約10分鐘; 噴濕麵糰將麵糰焗約25分鐘至金黃即成 (焗咗10分鐘開爐再噴多次水, 咁個面會脆架喇)~

大家可以Click入 黃師奶廚藝小百科 facebook 粉絲專頁度交流吓吖~!!!

牛油法棍 (中種法)

20140330牛油法包
<<牛油法棍>>
呢期黃先生因為電影節關係~少咗返家食飯~黃師奶都少咗煮飯~多咗開爐~哈~焗爐呀!~烘焙真係玩到上哂癮~家下好似整餅整蛋糕係整黎睇多過食~~係時候控制下自己~咁玩落去唔係法子…

嗱~今次黃師奶就參考<<原味>>本書~將佢嘅牛油法棍改一改~改返做自己口味~哈哈~剛焗起~黃先生激讚~外脆內軟~!well..最爆係佢話叫我俾磗腐乳佢喎…要黎送法包好味喎….頂佢唔順呀!~

中種麵糰: 200g 高筋粉, 半茶匙酵母, 130g 水
主麵糰: 100g高筋粉, 鹽少許, 60g水, 20g無鹽牛油

STEP 1
將中種麵糰嘅材料搓成無粉粒狀麵糰; 放於室溫中發酵2小時

STEP 2
將已發酵好的中種麵糰跟主麵糰拌勻並搓至起筋; 發酵約1小時至2倍大

STEP 3
將麵糰分割排氣後滾圓; 鬆弛15分鐘

STEP 4
將麵糰整形後再發酵約45分鐘; 焗爐預熱220度約10分鐘

STEP 5
將麵糰用小刀界開後噴水放入焗爐以210度高溫先焗10分鐘取出再噴水; 焗多約10分鐘或至金黃即成

大家可以Click入 黃師奶廚藝小百科 facebook 粉絲專頁度交流吓吖~!!!

香草麵包 (中種法)

20140324包包2
<<香草麵包>>
天氣開始熱~又到黃師奶最討厭嘅夏天….又要捱半年..先可以乾乾爽爽咁~~今個星期要開始拎定D厚衫去洗~WELL~總唔會一下子洗哂~不過清減D囉~唔係下個月~有排執呀!~~討厭~!

家下香港有富澤商店~買日本烘焙真係超方便~雖然呢間嘢價錢貴~不過黃師奶覺得d料整出黎嘅麵包好好味~今次呢個包係參照咗"第二本烘焙書"嘅其中一個食譜再改量~剛焗起時香噴噴~黃先生又忍唔住偷食喔~~呵呵~

中種麵糊
材料: 高粉130g, 水250g, 酵母半茶匙

主麵糰
材料: 高粉280g, 牛奶30g, 鹽少許, 糖2茶匙, 富澤嘅烘焙專用香料3湯匙, 中種麵糊全部

STEP 1
將中種麵糊嘅材料拌勻至冇粉粒糊狀~發酵約2小時備用

STEP 2
將已發酵好嘅中種麵糊拌入主麵糰中所有材料再搓至起筋; 發酵約1小時

STEP 3
將麵糰取出放氣再鬆弛15分鐘; 整形再發酵1小時

STEP 4
預熱焗爐220度約10分鐘; 噴濕麵糰將麵糰焗約20分鐘至金黃即成 (焗咗10分鐘開爐再噴多次水, 咁個面會脆架喇)~

大家可以Click入 黃師奶廚藝小百科 facebook 粉絲專頁度交流吓吖~!!!

甲蟲朱古力包 (湯種法)

20140227甲虫包
<<甲蟲朱古力包>>
終於踏入咗非常非常濕嘅季節…家下每朝瞓醒望出窗…真係以為自己升咗天..窗外白濛濛一片…要捱過埋4月~呢D咁嘅陰濕日子先會好D…天氣濕濕咁…個人都特別懶~特別唔舒服~討厭~

好喇~今日個麵包造型係甲蟲~其實黃師奶只係發酵完用個SCONE模~CUT個圓餅出黎~之後就界咗個T字喺麵糰上~記住呀~個T字唔好界得太大力~唔係一焗就爆開哂~好樣衰..D甲蟲花紋黃師奶就係用入爐朱古力整~你哋可以用提子乾都冇問題~

材料: 高筋粉 200g 牛油 30g , 糖 30g, 鹽 4g, 酵母 6 g, 牛奶90 g, 湯種75g, 入爐朱古力少許(用黎做甲蟲啲花紋)

STEP 1
將材料搓成麵糰再發酵50分鐘~

STEP 2
將麵糰放氣後壓篇~~再發酵15分鐘

STEP 3
再整形~(其實我只係用個scone模cut 佢出黎, 再喺麵糰上界咗個T字)~發酵40 分鐘

STEP 4
預熱焗爐180度15 分鐘, 加上入爐朱古力及掃上蛋水後焗包包約12 分鐘~再劃上眼睛即成~!~

大家可以Click入 黃師奶廚藝小百科 facebook 粉絲專頁度交流吓吖~!!!