黃師奶廚藝小百科

黃師奶烘培工作坊

想跟黃師奶整靚靚動物cupcake, 請即報名參加
黃師奶烘焙工作坊啦! 黃師奶烘焙工作坊

黃師奶專欄

日日煮星級「煮」廚


SalaD blog 星級blogger


點煮網推介用戶


myTaste.tw

Google+ Badge

黑芝麻軟包 (湯種法)

2013092253055305
<<黑芝麻軟包 (湯種法)>>
尋晚同今朝金鐘又好亂喇~~黃師奶一早起身~睇到新聞直播~嘩~當堂又O哂咀~乜又搞到咁大單呢~?!見到有D青年仲頭破血流~好似旺角嗰邊咁~~件事都已經2個月有多~真係唔知幾時先收到科呢~!

好似好耐冇出過麵包post!~呵~又黎整返篇先~呵呵呵~~家下開始天氣涼咗~室溫發酵真係會煩咗少少~好彩黃師奶家下部爐有發酵功能~呵~今個冬天可以繼續搓包包~~

材料: 高筋粉 350g, 牛油 35g , 糖 35g, 鹽 4g, 酵母 6 g, 牛奶110 g, 湯種115g, 蛋一隻
鋪面黑芝麻: 隨意

STEP 1
除黑芝麻外, 將材料搓成麵糰再發酵50分鐘~

STEP 2
將麵糰放氣後壓篇~~再鬆弛15分鐘

STEP 3
整形~發酵40 分鐘

STEP 4
預熱焗爐180度15 分鐘掃上蛋水~灑上黑芝麻焗包包約12 分鐘即成~!~~

大家可以Click入 黃師奶廚藝小百科 facebook 粉絲專頁度交流吓吖~!!!

芝士軟包 (米飯麵糊)

20140917芝士包飯種
<<芝士軟包 (米飯麵糊)>>
好喇~懶咗幾日~又蒲返上黎先~嗱嗱嗱~黃師奶唔係懶..只係腸胃炎呀又….對上一次腸胃炎係..2個星期期….2星期後一食少少生冷嘢又黎過…真係PAT PAT 受罪…家下唔敢亂食嘢….生冷凍飲乜都唔敢食呀~糟~~~~!!

哈~好似好耐冇出D麵包POST喎~今日又黎返個先~今次個包加咗芝士~哈~用咗芝士焗包真係又香又好味~黃先生好鍾意食~~黃師奶將D包包請咗俾朋友食~大家都好俾面讚不絕口~~真係多謝欣賞~哈~~

米飯麵糊做法
材料: 1杯米 , 2杯水
做法: 用家用電飯煲按"煮飯"功能, 煮成比較稀爛嘅米飯; 放涼備用

主麵糰做法
材料: 米飯麵糊150g, 高筋粉200g, 全麥麵粉40g, 酵母6g, 糖30g, 牛油30g, 雞蛋一個, 牛奶50g, 芝士碎50g
鋪面用芝士碎隨意

STEP 1
將所有材料拌勻並搓揉至起筋; 發酵約1小時至倍大

STEP 2
排氣後再滾圓; 鬆弛15分鐘

STEP 3
整形後再發酵約45分鐘

STEP 4
預熱焗爐180度15分鐘, 掃上蛋水再灑上芝士碎焗包包約12-15分鐘即成

大家可以Click入 黃師奶廚藝小百科 facebook 粉絲專頁度交流吓吖~!!!

免揉法包(低溫冷藏發酵法)

20140423法包
<<免揉法包(低溫冷藏發酵法)>>
今朝又天陰陰LU~睇黎一陣好快又落大雨呢~!呢幾日見各大FORUM都討論緊BIG 6人喺到臭篤小一派位問題~真係見到都想打佢一鑊金~誇區讀書辛苦喎!丁頁!咁你又誇境生仔?!唔通要香港人就返你哋?!不過算啦~我哋呢D香港人係唔會明白佢吔唸乜~

法包呢家嘢呢~真係唔係個個都愛整~如何你係做麵包高手~你就應用知道要做得好食有幾難~!!爐唔夠熱~根本做得唔好食~仲有發酵時間同濕度控制都好高要求~SO FAR 黃師奶最滿意係用老種做嘅法包~哈~不過今次介紹低溫冷藏發酵法先~得閒再講其他~!

材料: 高筋麵粉250g , 全麥麵粉50g, 熱水210g , 鹽少許 , 酵母約5-6g. 糖約10g

STEP 1
將糖伴入熱水中至完全溶化放涼備用

STEP 2
將所有材料拌勻並搓成糰 (無須有筋性)~ 室溫發酵約1小時

STEP3
將麵糰包好(記得包好呀!~裡面有空氣實衰) 再放入雪櫃發酵約14小時後取出回溫

STEP 4
排氣後再滾圓; 鬆弛15分鐘

STEP 5
整形後再發酵至2倍大

STEP 6
預熱焗爐230度15分鐘, 將麵糰灑上少許水; 焗約20-25分鐘至金黃即成 (當麵糰焗約10分鐘後, 再灑水一次)

大家可以Click入 黃師奶廚藝小百科 facebook 粉絲專頁度交流吓吖~!!!

東芝變頻式蒸氣微波爐(型號: ER-GD400HK)食譜分享之莎樂美 PIZZA

20140427PIZZA
<<東芝變頻式蒸氣微波爐(型號: ER-GD400HK)食譜分享之莎樂美 PIZZA>>
黃師奶喜歡做薄脆 PIZZA~因為鍾意香脆口感~呵呵呵~家下黃師奶有咗呢部東芝變頻式蒸氣微波爐~家下做 PIZZA真係話咁易~PIZZA做得好食~首要條件係部爐夠熱~!!因為如果爐溫唔夠熱的話~咁就需用更長時間去焗熟個 PIZZA…麵糰就會吸哂啲醬汁從而令到 PIZZA 口感變得糊口喇~黃師奶今次用水波爐~爐內溫度可以迅速加熱至350度~有部可以瞬間將爐內溫度提升嘅水波爐~真係好方便喔~!

麵糰材料: 高筋粉 125g, 橄欖油 8g, 鹽少許, 水 70-75g餡料: 芝士碎, 莎樂美腸,茄膏少許

STEP 1
將麵糰材料拌勻, 搓至光滑即可, 無需起筋~麵糰於室溫靜止約 45分鐘備用

STEP 2
按”OVEN” 240度(有水蒸氣)按 PREHEAT; 用叉子將麵糰吉滿小孔再入焗爐後按”OVEN” 240度(有水蒸氣),時間定為 10分鐘焗至金黃

STEP 3
麵糰上搽上茄膏~鋪上莎樂美腸及芝士; 再按”OVEN” 240度(有水蒸氣),時間定為 5分鐘焗至芝士融化即成

大家可以Click入 黃師奶廚藝小百科 facebook 粉絲專頁度交流吓吖~!!!

東芝變頻式蒸氣微波爐(型號: ER-GD400HK)食譜分享之橄欖油麵包(中種法)

20140517OLIVE OIL 包
<<東芝變頻式蒸氣微波爐(型號: ER-GD400HK)食譜分享之橄欖油麵包>>
自從有咗部東芝變頻式蒸氣微波爐(型號: ER-GD400HK)之後~黃師奶嘅烘焙世界真係變得唔同哂~~呵呵呵~升咗呢好多呢~黃師奶最欣賞呢部水波爐嘅其他一個賣點就係佢嘅發酵功能喔~而且烘焙時仲可以加入水蒸氣~呵~咁黃師奶以 後一年四季都又香又軟熟嘅包包食喔~唔駛再擔心冬天發酵問題喔~!讚~~~

中種麵糰
材料: 高粉200g, 水135g, 酵母約1茶匙

主麵糰
材料: 高粉100g, 水65g, 鹽少許, 糖30g, 橄欖油20g, 中種麵糊全部

STEP 1
將中種麵糰嘅材料搓成麵糰(無須起筋);

STEP 2
將麵糰放入水波爐中後按”OVEN” 40度(有水蒸氣),時間定為90分鐘

STEP 3
將已發酵好嘅中種麵糰拌入主麵糰中將所有材料搓至起筋; 再將麵糰放入水波爐中後按”OVEN” 40度(有水蒸氣),時間定為45分鐘

STEP 4
將麵糰取出放氣在室溫鬆弛15分鐘;

STEP 5
整形後再將麵糰放入水波爐中後按”OVEN” 40度(有水蒸氣),時間定為40分鐘

STEP6
按”OVEN” 190度(有水蒸氣)按PREHEAT; 將麵糰噴濕再入焗爐後按”OVEN” 190度(有水蒸氣),時間定為15分鐘焗至金黃即成

大家可以Click入 黃師奶廚藝小百科 facebook 粉絲專頁度交流吓吖~!!!

免揉提子包(免揉法)

20140415包包
<<免揉提子包>>
一連4日假期又完咗lu!~呵~不過唔緊要啦~黎緊仲有五一同埋佛誕2日假期呢~!呵呵呵~今個假期~黃師奶就好忙lu!~教咗d 幼稚園學生整蛋糕曲奇~哈~~不過忙得黎都開心~點解?!之唔係做緊自己鍾意做嘅事真係完全唔同囉~呵~

黃師奶又黎愉懶LU!~哈~~今次整咗個唔駛搓到起筋嘅包包~搓好成糰後就咁喺室溫到發酵~由於發酵時間太長~~所以成個廚房都好大陣酒香味~哈~呢款包包啱哂懶人整~黃師奶都覺得口感幾特別~剛出爐切一片~~加杯茶~唔錯喔~!

材料: 高筋麵粉330g , 麥粉70g, 鹽少許 , 糖20g , 酵母約1茶匙, 水300g , 提子乾隨意

STEP 1
將所有材料搓成一糰 (無須搓至起筋), 再室溫發酵13-14小時

STEP 2
枱面上灑上少許高筋麵粉, 將發酵好的麵糰放於工作枱上再排氣

STEP 3
將麵糰搓成一大個圓形麵糰再發酵約1小時

STEP 4
預熱焗爐220度15分鐘

STEP 5
將麵糰灑上少許水; 焗約30分鐘即成 (當麵糰焗約10分鐘後, 再灑水一次)

大家可以Click入 黃師奶廚藝小百科 facebook 粉絲專頁度交流吓吖~!!!

香草麵包 (中種法)

20140324包包2
<<香草麵包>>
天氣開始熱~又到黃師奶最討厭嘅夏天….又要捱半年..先可以乾乾爽爽咁~~今個星期要開始拎定D厚衫去洗~WELL~總唔會一下子洗哂~不過清減D囉~唔係下個月~有排執呀!~~討厭~!

家下香港有富澤商店~買日本烘焙真係超方便~雖然呢間嘢價錢貴~不過黃師奶覺得d料整出黎嘅麵包好好味~今次呢個包係參照咗"第二本烘焙書"嘅其中一個食譜再改量~剛焗起時香噴噴~黃先生又忍唔住偷食喔~~呵呵~

中種麵糊
材料: 高粉130g, 水250g, 酵母半茶匙

主麵糰
材料: 高粉280g, 牛奶30g, 鹽少許, 糖2茶匙, 富澤嘅烘焙專用香料3湯匙, 中種麵糊全部

STEP 1
將中種麵糊嘅材料拌勻至冇粉粒糊狀~發酵約2小時備用

STEP 2
將已發酵好嘅中種麵糊拌入主麵糰中所有材料再搓至起筋; 發酵約1小時

STEP 3
將麵糰取出放氣再鬆弛15分鐘; 整形再發酵1小時

STEP 4
預熱焗爐220度約10分鐘; 噴濕麵糰將麵糰焗約20分鐘至金黃即成 (焗咗10分鐘開爐再噴多次水, 咁個面會脆架喇)~

大家可以Click入 黃師奶廚藝小百科 facebook 粉絲專頁度交流吓吖~!!!

甲蟲朱古力包 (湯種法)

20140227甲虫包
<<甲蟲朱古力包>>
終於踏入咗非常非常濕嘅季節…家下每朝瞓醒望出窗…真係以為自己升咗天..窗外白濛濛一片…要捱過埋4月~呢D咁嘅陰濕日子先會好D…天氣濕濕咁…個人都特別懶~特別唔舒服~討厭~

好喇~今日個麵包造型係甲蟲~其實黃師奶只係發酵完用個SCONE模~CUT個圓餅出黎~之後就界咗個T字喺麵糰上~記住呀~個T字唔好界得太大力~唔係一焗就爆開哂~好樣衰..D甲蟲花紋黃師奶就係用入爐朱古力整~你哋可以用提子乾都冇問題~

材料: 高筋粉 200g 牛油 30g , 糖 30g, 鹽 4g, 酵母 6 g, 牛奶90 g, 湯種75g, 入爐朱古力少許(用黎做甲蟲啲花紋)

STEP 1
將材料搓成麵糰再發酵50分鐘~

STEP 2
將麵糰放氣後壓篇~~再發酵15分鐘

STEP 3
再整形~(其實我只係用個scone模cut 佢出黎, 再喺麵糰上界咗個T字)~發酵40 分鐘

STEP 4
預熱焗爐180度15 分鐘, 加上入爐朱古力及掃上蛋水後焗包包約12 分鐘~再劃上眼睛即成~!~

大家可以Click入 黃師奶廚藝小百科 facebook 粉絲專頁度交流吓吖~!!!

豬仔甜包 (湯種法)

20140227豬仔包
<<豬仔甜包>>
呢期真係星星熱~黃師奶都喺到勁追~~哈~~其實都敏俊又唔係特別靚仔吖~~不過身型又好fit~~哈~係咪因為有超能力~~所以咁易就搞到大家咁著迷?! 黃師奶真係超鍾意佢~~實在太型~~家下日日喺家成日大叫都敏俊~就黎俾人送入青山架喇~~

今次個包包整咗豬仔型~黃師奶建議大家個豬鼻同埋個豬耳唔好整得太過立體~始終個麵糰仲要發酵~而焗嗰時又會再變大d…太個立體個型焗出黎反而冇咁好睇呢~大家可以試下喔~!

材料: 高筋粉 350g 牛油 35g , 糖 45g, 鹽 4g, 酵母 6 g, 牛奶110 g, 湯種115g, 蛋一隻

STEP 1
將材料搓成麵糰再發酵50分鐘~

STEP 2
將麵糰放氣後壓篇~~再鬆弛15分鐘

STEP 3
整形~發酵40 分鐘

STEP 4
預熱焗爐180度15 分鐘掃上蛋水~焗包包約15 分鐘即成~!~~

大家可以Click入 黃師奶廚藝小百科 facebook 粉絲專頁度交流吓吖~!!!

杏仁餐包 (湯種法)

20131209杏仁包
<<杏仁餐包>>
大家追MY盛LADY!~最欣賞係邊個呢?黃師奶最欣賞係袁琛~哈~~江美儀呀!!!佢做電台節目好聽架~拍戲又做得好喎!~~~睇佢打電話投訴話電視劇穿崩嗰下真係笑爆咀~~哈~~真係好搞笑~~

嗱~今日又整包包~~有日黃先生同黃師奶行超市~~見到J字頭嗰隻腸做特價~黃先生話要買喎!~做早餐喎!~咁有腸冇包點得吖~即係焗埋D 包包~咁黃先生個早餐就豐富D~返工都醒神D!~~~

材料: 高筋粉 350g 牛油 35g , 糖 35g, 鹽 4g, 酵母 6 g, 牛奶110 g, 湯種115g, 蛋一隻 , 杏仁碎50g
鋪面芝麻: 隨意

STEP 1
除杏仁碎外, 將材料搓成麵糰再發酵50分鐘~

STEP 2
將麵糰放氣後壓篇~~再鬆弛15分鐘

STEP 3
再搓入杏仁碎~整形~發酵40 分鐘

STEP 4
預熱焗爐180度15 分鐘掃上蛋水~灑上芝麻焗包包約15 分鐘即成~!~~

大家可以Click入 黃師奶廚藝小百科 facebook 粉絲專頁度交流吓吖~!!!